அரைக்க, வதக்க தேவையில்லை... 10 நிமிசத்துல சோம்பேறி சிக்கன் ரெடி; பேச்சுலர்ஸ் நோட் பண்ணுங்க!

சமைக்க நேரம் இல்லையா? பெரிய சமையலறை உபகரணங்கள், நிறைய பாத்திரங்கள், அரைக்கும் வேலை, வதக்கும் சிரமம் என எதற்குமே அவசியமில்லாத ஒரு சுவையான சிக்கன் ரெசிபி எப்படி செய்வது என்று சிஸ்டர் சமையல் இன்ஸ்டா பக்கத்தில் செய்து காட்டியிருப்பது பற்றி பார்ப்போம். சோம்பேறித்தனம் கொஞ்சம் அதிகமாக இருக்கும் பேச்சுலர்களுக்கும், அவசரமாக சாப்பிட விரும்புபவர்களுக்கும் இந்த முறை ஒரு வரப்பிரசாதம். எல்லா பொருட்களையும் மொத்தமாகப் போட்டு, அடுப்பில் வைத்தால் போதும்; பத்து நிமிடங்களுக்குள் அட்டகாசமான 'சோம்பேறி சிக்கன்' தயார். 

தேவையான பொருட்கள்:

சிக்கன் 
பெரிய வெங்காயம் 
இஞ்சி பூண்டு விழுது     
எண்ணெய் 
மஞ்சள் தூள் 
மல்லித்தூள்     
மிளகாய் தூள் 
சிக்கன் மசாலா தூள் 
உப்பு 
கொத்தமல்லி மற்றும் புதினா இலைகள் 
கொத்தமல்லி 

செய்முறை:

முதலில், சமைக்க வேண்டிய கனமான பாத்திரம் (வடச்சட்டி அல்லது கடாய்) ஒன்றை எடுத்துக் கொள்ளுங்கள். அதில், சுத்தமாகக் கழுவிய சிக்கன் துண்டுகளை முழுவதுமாகப் போடுங்கள். பிறகு, நறுக்கி வைத்த வெங்காயம், இஞ்சி-பூண்டு விழுது, மஞ்சள் தூள், மல்லித்தூள், மிளகாய் தூள், சிக்கன் மசாலா தூள், உப்பு மற்றும் கொத்தமல்லி/புதினா இலைகள் ஆகிய அனைத்தையும் ஒரே நேரத்தில் சிக்கனுடன் சேர்க்கவும். இந்தக் கலவையின் மீது சமையல் எண்ணெயை ஊற்றி, கை அல்லது கரண்டியைப் பயன்படுத்தி அனைத்து மசாலாக்களும் சிக்கனில் நன்றாகப் பற்றிக்கொள்ளும் வகையில் நன்கு பிசைந்து விடுங்கள்.

View this post on Instagram

A post shared by Sister's Samayal (@sistersamayal)

இதில் ஒரு துளி தண்ணீர் கூட சேர்க்கத் தேவையில்லை. அப்படியே பாத்திரத்தை அடுப்பில் தூக்கி வைத்து, மிதமான தீயில் வேக வைக்கத் தொடங்குங்கள். சிக்கனில் இருந்து வெளிவரும் தண்ணீரே போதும். சிக்கன் நன்றாக வெந்து வரும்போது, அடி பிடித்துவிடாமல் இருக்க அவ்வப்போது மட்டும் மெதுவாகக் கிண்டி விடுங்கள். தண்ணீர் சுண்டி, எண்ணெய் பிரிந்து வரும்வரை சமைக்கவும். கடைசியில், நறுக்கிய கொத்தமல்லி இலைகளைத் தூவி இறக்கினால், சுவையான 'சோம்பேறி சிக்கன்' தயார். இது சூடான சாதம், சப்பாத்தி அல்லது தோசைக்குச் சிறந்த ஜோடியாக இருக்கும்.