ஒரு சொட்டு எண்ணெய் சேர்க்காமல் ஸ்நாக்ஸ்: சோயா வச்சு இப்படி ட்ரை பண்ணுங்க!

மாலை பள்ளி முடிந்து வரும் குழந்தைகளுக்கு ஆரோக்கியமான மற்றும் வயிறு நிரம்பும் ஒரு சிற்றுண்டி கொடுக்க விரும்பினால், இந்த எண்ணெய் இல்லாத சோயா கட்லெட் சரியான தேர்வாகும். இது மிகவும் சுலபமாகச் செய்யக்கூடியது. இதனை எப்படி செய்வது என்று சிந்துவின் சுவை இன்ஸ்டா பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

சோயா சங்ஸ் (நறுக்கியது)
பச்சை மிளகாய்
இஞ்சி
பூண்டு (ஒரு பல்)
சின்ன வெங்காயம்
கொத்தமல்லி
சீரகம் (ஒரு டீஸ்பூன்)
வேகவைத்த உருளைக்கிழங்கு (மீடியம் சைஸ்)
உப்பு (ஒரு டீஸ்பூன்)
மிளகாய் தூள்
கார்ன்ஃப்ளார் மாவு (இரண்டு டீஸ்பூன்)
பிரட் க்ரம்ப்ஸ் (இரண்டு முதல் மூன்று டீஸ்பூன்)

செய்முறை:

முதலில் சோயாவை நன்கு ஊறவைத்து, அதிலுள்ள தண்ணீரை முழுமையாகப் பிழிந்து எடுத்துக்கொள்ளவும். பின்னர், அதை ஒரு மிக்ஸர் அல்லது சப்பரில் போட்டு பல்ஸ் (நறுக்கி) செய்து எடுத்துக்கொள்ளவும். மற்றொரு மிக்ஸரில் இரண்டு பச்சை மிளகாய், சிறிதளவு இஞ்சி, ஒரு பல் பூண்டு, சிறிய வெங்காயம், கொத்தமல்லி மற்றும் ஒரு டீஸ்பூன் சீரகம் சேர்த்து நன்கு பல்ஸ் செய்து எடுத்துக்கொள்ளவும். இந்த கலவையை சோயாவுடன் சேர்க்கவும்.

வேகவைத்து மசித்த மீடியம் சைஸ் உருளைக்கிழங்கை பைண்டிங்காக (உருளைக்கிழங்கை மசித்து) சோயா கலவையுடன் சேர்த்துக்கொள்ளவும். அத்துடன் ஒரு டீஸ்பூன் உப்பு, மிளகாய் தூள், இரண்டு டீஸ்பூன் கார்ன்ஃப்ளார் மாவு மற்றும் இரண்டு முதல் மூன்று டீஸ்பூன் பிரட் க்ரம்ப்ஸ் சேர்த்து, அனைத்தையும் ஒன்றாக நன்கு பிசைந்துகொள்ளவும்.

பிசைந்த மாவை சிறு உருண்டைகளாகப் பிடித்து, தட்டையான கட்லெட் வடிவத்தில் மாற்றிக்கொள்ளவும். அவனை 375°F (190°C) வெப்பநிலையில் ப்ரீஹீட் செய்து, கட்லெட்டுகளை வைத்து 20 நிமிடங்கள் பேக் செய்யவும். நடுவில் ஒருமுறை கட்லெட்டுகளைத் திருப்பிவிடவும், அதனால் இருபுறமும் சமமாக வேகும்.

மேலும் மிருதுவான கட்லெட்டுகள் வேண்டுமானால், பேக் செய்த பிறகு, ப்ரோயில் மோடில் (அதிக வெப்பநிலை) 2-3 நிமிடங்கள் வைத்து எடுத்துக்கொள்ளலாம். பேக்கிங் ஒரு விருப்பமான முறைதான். தேவைப்பட்டால், நீங்கள் தவா ஃப்ரை அல்லது ஷேலோ ஃப்ரை (குறைந்த எண்ணெய் உபயோகத்துடன்) செய்தும் கட்லெட்டுகளைத் தயாரிக்கலாம். இப்போது மிருதுவான மற்றும் சத்தான சோயா கட்லெட் தயார்.