உங்ககிட்ட 5 நிமிசம் தான் இருக்கு; அதுக்குள்ள சும்மா சுருக்குன்னு ஒரு ரெசிபி!

நல்லா சூடாகவும் காரசாரமாகவும் சாப்பிடத் தோன்றுகிறதா? ஆனால் சமைக்க அதிக நேரம் இல்லையா? கவலை வேண்டாம், அதற்குச் சைட் டிஷ் எதுவுமே இல்லாமல், வெறும் சாதத்துடன் பிசைந்து சாப்பிட ஏற்ற ஒரு அட்டகாசமான ரெசிபிதான் இந்த லெமன் காரத் தொக்கு. இந்த ரெசிபியை வெறும் 5 நிமிடத்தில் எப்படி செய்வது என்று பார்ப்போம். இதன் தனிச்சிறப்பு என்னவென்றால், சமைக்கும் நேரமும் குறைவு, அதே சமயம் இதன் சுவை மிகவும் அருமையாக இருக்கும். அலுவலகம் செல்பவர்கள், விடுதி மாணவர்கள் அல்லது அவசரமாகச் சமைக்க நினைப்பவர்களுக்கு இது ஒரு சிறந்த தேர்வாகும். இதனை எப்படி செய்வது என்று ஷாரு கிச்சன் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

மிளகாய்தூள் 
உப்பு 
எலுமிச்சை சாறு 
எண்ணெய் 
கடுகு, உளுந்த பருப்பு 
கடலைப்பருப்பு 
பூண்டு 
கருவேப்பிலை 

செய்முறை:

ஒரு பவுலில் 1 டேபிள் ஸ்பூன் மிளகாய்தூள் மற்றும் சுவைக்கேற்ப உப்பைச் சேர்க்கவும். அதன் பிறகு, ஒரு முழு எலுமிச்சை பழத்தின் சாற்றை இதனுடன் ஊற்றி, கட்டி இல்லாமல் நன்றாகக் கலந்து ஒரு பக்கமாக வைக்கவும். ஒரு கடாயில் 2 டேபிள் ஸ்பூன் எண்ணெயை ஊற்றி சூடாக்கவும். எண்ணெய் சூடானதும், அதில் 1 டீஸ்பூன் கடுகு மற்றும் உளுந்த பருப்பைப் போட்டுப் பொரிய விடவும். கடுகு பொரிந்த பின், 1 டேபிள் ஸ்பூன் கடலைப்பருப்பைச் சேர்த்து, அது பொன்னிறமாகும் வரை வறுக்கவும். பின்னர், தட்டி வைத்த 10 பல் பூண்டு மற்றும் சிறிதளவு கருவேப்பிலையைச் சேர்த்து, பூண்டு பொன்னிறமாகும் வரை நன்றாகத் தாளிக்கவும்.

View this post on Instagram

A post shared by sharu kitchen (@sharu_kitchen)

தாளிப்பு சரியான பதத்துக்கு வந்ததும், நாம் கலந்து வைத்திருக்கும் எலுமிச்சை மற்றும் மிளகாய்தூள் கலவையை அதில் சேர்த்து நன்றாகக் கிளறவும். சிறிது நேரம் நன்றாகக் கலந்துவிட்டு அடுப்பை அணைத்து விடலாம். இந்தச் சுட சுட காரசாரமான லெமன் காரத் தொக்கை சூடான சாதத்துடன் பிரட்டிச் சாப்பிட்டுப் பாருங்கள். இதைச் சாப்பிட வேறு சைட் டிஷ்ஷே தேவையில்லை; ஒரு அப்பளம் இருந்தால் மட்டுமே போதும்.