என்ன பெரிய பட்டர் தோசை... இந்த மாதிரி சுட்டு சாப்பிட்டு இருக்கீங்களா? செம்ம சாஃப்ட்!

வழக்கமான, மொறுமொறுப்பான தோசைகளை சுட்டு அலுத்துவிட்டதா? அப்படியானால், நீங்கள் கண்டிப்பாக முயற்சி செய்ய வேண்டிய ஒரு ரெசிபி தான் இந்த 'பன் தோசை'. பெயருக்கு ஏற்றார் போலவே, இது உப்பி, பஞ்சு போல சாஃப்ட்டாக இருக்கும். இந்த பன் தோசை, பட்டர் தோசைக்கு நிகரான சுவையையும் மென்மையையும் கொண்டது. மிகக் குறைந்த நேரத்தில், எளிமையான பொருட்களுடன் இதனைத் தயாரிக்கலாம் என்பதால், இது காலை உணவுக்கும், மாலை நேர சிற்றுண்டிக்கும் ஏற்ற ஒரு ஆரோக்கியமான தேர்வாகும். இதனை எப்படி செய்வது என்று செஃப் ஷன்ஜித் இன்ஸ்டா பக்கத்தில் செய்து காட்டியிருப்பது பற்றி பார்ப்போம்.  

தேவையான பொருட்கள்:

ரவை: 1/2 கப்
தயிர்: 1/2 கப்
தண்ணீர்: 1/2 கிளாஸ்
உப்பு 
பேக்கிங் பவுடர்  
எண்ணெய் 
கடுகு, சீரகம், கடலைப்பருப்பு, உளுத்தம் பருப்பு
இஞ்சி, பச்சை மிளகாய், கருவேப்பிலை
வெங்காயம், கேரட்

செய்முறை:

ஒரு பாத்திரத்தில் அரை கப் ரவை, அரை கப் தயிர் மற்றும் அரை கிளாஸ் தண்ணீர் சேர்த்து, ரவை நன்கு ஊறும் வரை (சுமார் 15-20 நிமிடங்கள்) ஊற வைக்கவும். ஊறிய ரவைக் கலவையை மிக்ஸியில் இட்டு, லேசாக ஒரு சுற்றுச் சுத்தி (அரைக்காமல்) எடுத்துக்கொள்ளவும். அதனுடன் தேவையான அளவு உப்பு சேர்த்து தனியாக வைக்கவும். ஒரு சிறிய வாணலியில் எண்ணெய் ஊற்றி, கடுகு, சீரகம், கடலைப்பருப்பு, உளுத்தம் பருப்பு ஆகியவற்றைத் தாளிக்கவும். பின்னர் நறுக்கிய இஞ்சி, பச்சை மிளகாய், கருவேப்பிலை, வெங்காயம், கேரட் சேர்த்து வதக்கி, இந்தக் கலவையை மாவுடன் சேர்த்து நன்றாகக் கலக்கவும்.

View this post on Instagram

A post shared by Litwin Shanjit (@chefshanjit)

தோசை ஊற்றுவதற்குச் சற்று முன், மாவில் கொஞ்சமாக பேக்கிங் பவுடர் சேர்த்து ஒருமுறை கலந்து, ஐந்து நிமிடம் விடவும். பன் தோசையைச் சுட, தாளிப்புக் கரண்டி அல்லது ஆப்பச் சட்டியைப் பயன்படுத்தவும். சட்டியில் லேசாக எண்ணெய் தடவி, மாவை ஊற்றவும். 10 முதல் 15 வினாடிகளில் தோசை 'பன்' போல உப்பி வரும். ஓரங்களில் எண்ணெய் ஊற்றி, பொன்னிறமானதும் திருப்பிப் போட்டு, ஒரு நிமிடம் வேக வைத்து எடுக்கவும். சூடான, செம்ம சாஃப்ட்டான பன் தோசையை உங்களுக்குப் பிடித்த சட்னியுடன் சேர்த்துப் பரிமாறலாம்.