இட்லி மீந்து போச்சா? உப்புமா ரொம்ப பழசு; இந்த வடை தட்டி எடுங்க; ஈவினிங் ஸ்நாக்ஸ் ரெடி!

காலையில் ஆசையாகச் செய்த இட்லிகள் சில நேரங்களில் மிச்சமாகிவிடுவதுண்டு. இந்த மிச்சமான இட்லிகளை வைத்து எப்போதும் ஒரே மாதிரி உப்புமா செய்து சாப்பிடுவது போர் அடித்துவிட்டதா? அப்படியானால், இதோ உங்களுக்கு ஒரு அசத்தலான மாற்று வழிதான் இந்த இன்ஸ்டன்ட் இட்லி வடை, மாலை நேர சிற்றுண்டிக்கு மிகச் சிறந்த தேர்வாகும். வெறும் சில நிமிடங்களில் சுலபமாகத் தயாரிக்கக்கூடிய இந்த வடையின் சுவை, நீங்கள் வழக்கமாகச் செய்யும் உளுந்து வடையைக்கூட மறக்கச் செய்யும் அளவுக்குப் பிரமாதமாக இருக்கும்.  உப்புமா, தாளித்த இட்லி என வழக்கமாகச் செய்வதை விட்டுவிட்டு, சுவையான மொறுமொறுப்பான இட்லி வடை செய்வது எப்படி என்று ஹோம்மேக்கர் ரெசிபி இன்ஸ்டா பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

மீதமுள்ள இட்லி 
வெங்காயம்
கறிவேப்பிலை 
அரிசி மாவு
எண்ணெய்
உப்பு 

செய்முறை:

முதலில், மிச்சமான இட்லிகளை எடுத்து, அதை ஒரு பாத்திரத்தில் சேர்த்து, கட்டிகள் இல்லாமல் மாவு போல நன்கு உதிர்த்துக்கொள்ளவும்.  உதிர்த்த இட்லியுடன், பொடியாக நறுக்கிய வெங்காயம், கறிவேப்பிலை மற்றும் உப்பு (தேவைப்பட்டால்), பச்சை மிளகாய் ஆகியவற்றைக் கலக்கவும். அடுத்து, இதில் இரண்டு தேக்கரண்டி அரிசி மாவைச் சேர்க்கவும். அரிசி மாவு வடைக்கு நல்ல மொறுமொறுப்பைக் கொடுக்க உதவும்.

View this post on Instagram

A post shared by Homemaker Recipes (@homemakerrecipes)

தண்ணீர் சேர்க்காமல், இந்த கலவையை சப்பாத்தி மாவைவிடச் சற்றுக் குறைந்த இளகுவான பதத்தில் பிசையவும். இட்லியில் உள்ள ஈரப்பதமே போதுமானதாக இருக்கும். (கலவை மிகவும் கெட்டியாக இருந்தால், மிகக் குறைந்த அளவு தண்ணீரைத் தெளித்துப் பிசையவும்).  பிசைந்த மாவைச் சிறிய உருண்டைகளாக உருட்டி, உங்கள் உள்ளங்கையில் வைத்து, நடுவில் ஒரு ஓட்டை போட்டு வடை வடிவில் தட்டவும். ஒரு வாணலியில் எண்ணெய் ஊற்றி, மிதமான சூட்டில் வைத்து, தட்டி வைத்த வடைகளை மெதுவாகப் போடவும்.

வடைகளை எண்ணெயில் போட்ட உடனேயே திருப்பிப் போடாமல், ஒருபுறம் சற்று வெந்து நிறம் மாறிய பிறகு, திருப்பிப் போட்டு பொன்னிறமாகும் வரை நன்கு பொரித்தெடுக்கவும். சுவையான சூடான இட்லி வடையைத் தேங்காய் சட்னி அல்லது சாம்பாருடன் சேர்த்துப் பரிமாறலாம்.