5 நிமிசத்துல தக்காளி தோசை... மாவு இல்லாத நேரத்தில் இப்படி செஞ்சு அசத்துங்க!

தோசை மாவு இல்லாத நேரங்களில் அல்லது அவசரமாக ஒரு சிற்றுண்டி தேவைப்படும்போது, வெறும் பத்தே நிமிடத்தில் இந்த 'இன்ஸ்டன்ட் தக்காளி தோசையைத் தயார் செய்து சுவைக்கலாம். இது ரவா தோசையைப் போலவே மெல்லியதாகவும் நீர்க்கவும் கரைக்கப்படுவதால், சுட்டவுடன் மொறுமொறுவென இருக்கும். ஆறிய பிறகு, வழக்கமான ரவா தோசையைப் போலவே மென்மையாக மாறிவிடும். வீட்டில் மாவு இல்லை என்ற கவலையே வேண்டாம், இந்த எளிமையான மற்றும் சுவையான தோசையை உடனடியாக செய்து அசத்துங்கள். இதனை எப்படி செய்வது என்று மாயாஸ்கிச்சன் இன்ஸ்டா பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

பழுத்த தக்காளி 
சின்ன வெங்காயம் 
பூண்டு பல் 
காஷ்மீரி மிளகாய் 
அரிசி மாவு    1 கப்
ரவை 
கோதுமை மாவு (அ) மைதா மாவு 
சீரகம் 
கொத்தமல்லி தழை, கருவேப்பிலை 
பச்சை மிளகாய்
வெங்காயம் 
உப்பு 
தண்ணீர்
எண்ணெய் 

செய்முறை:

ஒரு மிக்ஸி ஜாரில் இரண்டு பழுத்த தக்காளி, நான்கு சின்ன வெங்காயம், நான்கு பல் பூண்டு மற்றும் நிறத்திற்காக இரண்டு காஷ்மீரி மிளகாய் ஆகியவற்றைச் சேர்த்து நன்றாக அரைத்துக் கொள்ளவும். அரைத்த விழுதை ஒரு பாத்திரத்தில் எடுத்துக்கொண்டு, அதனுடன் ஒரு கப் அரிசி மாவு, அரை கப் ரவை, மற்றும் கால் கப் கோதுமை மாவு (அதற்குப் பதிலாக மைதா மாவும் சேர்க்கலாம்) சேர்க்கவும்.

இப்போது தேவையான அளவு உப்பு சேர்த்து, ரவா தோசைக்கு கரைப்பது போல நீர்க்க, அதிக தண்ணீர் ஊற்றி நன்றாகக் கரைத்துக் கொள்ளவும். மாவு நீர்க்க இருப்பது மிகவும் அவசியம். ஊற வைத்தல்: இந்தக் கலவையில், சீரகம், நறுக்கிய கொத்தமல்லி தழை, கருவேப்பிலை, பச்சை மிளகாய் மற்றும் கொஞ்சமாக நறுக்கிய வெங்காயம் சேர்த்து நன்கு கலக்கவும். மாவு நன்கு ஊறுவதற்காக, இதனை 10 நிமிடம் அப்படியே வைக்கவும்.

View this post on Instagram

A post shared by Ajitha Raja (@mayaskitchentamil)

தோசை ஊற்றுதல்: சூடான தோசைக்கல்லில் இந்த நீர்க்க உள்ள மாவை மெலிதாக ஊற்றி, தேவையான அளவு எண்ணெய் சேர்த்து மூடி வைத்து வேக வைக்கவும். தோசை நன்கு வெந்து பொன்னிறமாக வந்ததும், மொறுமொறுவென இருக்கும்போதே எடுத்துப் பரிமாறலாம். விருப்பமிருந்தால் திருப்பிப் போட்டும் வேக வைக்கலாம்.