வாழைக்காய் வறுவல், பொரியல் போர் அடிக்குதா? இப்படி கிரேவி ட்ரை பண்ணுங்க; எல்லாத்துக்கும் பெஸ்ட்!

வாழைக்காயை வைத்து நாம் பெரும்பாலும் என்ன செய்வோம் பொரியல் இல்லைனா வறுவல் இவ்வளவு தான் செய்வோம். அதை தவிர்த்து வேறு எதுவும் செய்ய மாட்டோம். இதை தினமும் சாப்பிடும் போது உங்கள் வீட்டில் உள்ளவர்களுக்கு போர் அடித்துவிடும். இதனால் பலரும் வாழைக்காய் பக்கமே போக மாட்டார்கள். எல்லோருக்கும் பிடிக்கும் வகையில் வாழைக்காயை வைத்து எப்படி சுவையான கிரேவி செய்யலாம் என்று இந்த தொகுப்பில் விரிவாக பார்க்கலாம்.

தேவையான பொருட்கள்

வாழைக்காய்

மிளகாய் தூள் - 1 ஸ்பூன்

மஞ்சள் தூள் - 3/4 ஸ்பூன்

சீரகத் தூள் - 3/4 ஸ்பூன்

இஞ்சி பூண்டு பேஸ்ட் - 3/4 ஸ்பூன்

தனியா தூள் - 1/2 ஸ்பூன்

கரம் மசாலா - 1/2 ஸ்பூன்

உப்பு - 1 ஸ்பூன்

சோம்பு - 1 ஸ்பூன்

வெங்காயம் - 1

கறிவேப்பிலை - தேவையான அளவு

தக்காளி - 1

தேங்காய் - தேவையான அளவு

எள் - 1/2 ஸ்பூன்

பொட்டு கடலை - தேவையான அளவு

செய்முறை

மிளகாய் தூள், மஞ்சள் தூள், இஞ்சி பூண்டு பேஸ்ட், சீரக தூள், தனியா தூள், கரம் மசாலா ஆகியவற்றை நன்றாக தண்ணீர் ஊற்றி கெட்டியாக கலந்து எடுத்துக் கொள்ளுங்கள். இதில் வெட்டி வைத்த வாழைக்காயை போட்டு நன்கு கலந்து எடுத்துக் கொள்ளவும். இந்த கலவையை 10 நிமிடம் அப்படியே ஊற வைக்கவும். 10 நிமிடங்களுக்கு பிறகு தோசை தவாவில் போட்டு நன்கு பொரித்து எடுத்துக் கொள்ளவும். 

View this post on Instagram

A post shared by Kuralarasi/swetha (@myselftime_87)

ஒரு கடாயில் சிறிதளவு எண்ணெய் ஊற்றி நன்கு சூடானதும் சோம்பு சேர்த்து நன்கு வதக்கவும். கறிவேப்பிலை, வெங்காயம் சேர்த்து வதங்கியது தக்காளியை சேர்த்து வதக்கவும். நன்கு வதங்கியதும் இஞ்சி பூண்டு பேஸ்ட் சேர்த்து வதக்கவும். இதில் மஞ்சள் தூள், மிளகாய் தூள், தனியா தூள், உப்பு சேர்த்து வதக்க வேண்டும். இதில் சிறிது தண்ணீர் சேர்த்து கொதித்ததும் வறுத்த வாழைக்காயை சேர்த்து கொதிக்கவிட வேண்டும்.

ஒரு மிக்ஸி ஜாரில் தேங்காய், எள், சோம்பு மற்றும் பொட்டுக்கடலை சேர்த்து நன்கு அரைத்து எடுத்துக் கொள்ளவும். இந்த கலவையை வாழைக்காய் உடன் சேர்த்து மிதமான தீயில் பத்து நிமிடம் கொதிக்க வைத்து எடுத்தால் வாழைக்காய் கிரேவி ரெடி. இதனை சூடான சாதம், தோசை, இட்லி, சப்பாத்தி என எல்லாவற்றுடனும் சேர்த்து சாப்பிடலாம்.