புரதம், வைட்டமின்கள் ஏராளம்... லஞ்சுக்கு இந்த ரெசிபி கொடுத்து அனுப்புங்க; சிம்பிள் ஸ்டெப்ஸ்!

பன்னீர் பிரியாணி சுவை மற்றும் சத்துக்கள் நிறைந்த ஒரு அற்புதமான உணவு. இதில் புரதத்தின் ஆதாரமாக பன்னீர் சேர்வதால், குழந்தைகள் மற்றும் பெரியவர்களின் அன்றாட ஊட்டச்சத்து தேவையை எளிதில் பூர்த்தி செய்யலாம். குறிப்பாக, இதைச் செய்வது மிக எளிது என்பதால், காலையில் அவசரமாக லஞ்ச் பாக்ஸுக்கு பேக் செய்ய இது ஒரு சிறந்த தேர்வாகும். வைட்டமின்கள் மற்றும் தாதுக்கள் நிறைந்த காய்கறிகள் மற்றும் மசாலாப் பொருட்களை சேர்ப்பதன் மூலம் இதை மேலும் ஆரோக்கியமாக்கலாம். பன்னீரின் மென்மையான அமைப்பும், மசாலாப் பொருட்களின் நறுமணமும் சேர்ந்து ஒரு அருமையான மதிய உணவை உங்கள் லஞ்ச் பாக்ஸில் தயார் செய்து அனுப்புங்கள். இதனை எப்படி செய்வது என்று ரேகாஸ்குசினா இன்ஸ்டா பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

பாஸ்மதி அரிசி
பன்னீர்
பெரிய வெங்காயம்
தக்காளி
இஞ்சி பூண்டு விழுது
தயிர்
மிளகாய் தூள்
பிரியாணி மசாலா / கரம் மசாலா
பட்டை, கிராம்பு, ஏலக்காய், பிரிஞ்சி இலை
புதினா மற்றும் கொத்தமல்லி இலைகள்
எண்ணெய் / நெய்
உப்பு

செய்முறை:

பாஸ்மதி அரிசியை 20 நிமிடங்கள் ஊறவைத்து, 70% மட்டுமே வேகவைத்து தனியாக வடிகட்டி வைக்கவும். ஒரு கடாயில் நெய் அல்லது எண்ணெய் ஊற்றி, பன்னீர் துண்டுகளை லேசாக பொன்னிறமாகும் வரை (வீடியோவில் உள்ளது போல) வறுத்து தனியாக எடுத்து வைக்கவும். அதே கடாயில், மீதமுள்ள நெய்யில் முழு மசாலாப் பொருட்களை சேர்த்து வறுக்கவும். பின்னர் நீளமாக நறுக்கிய வெங்காயத்தை சேர்த்து நன்கு பொன்னிறமாகும் வரை வதக்கவும். இஞ்சி பூண்டு விழுது சேர்த்து அதன் பச்சை வாசனை நீங்கும் வரை வதக்கவும். அடுத்து, தக்காளி சேர்த்து நன்றாக மசியும் வரை சமைக்கவும். மிளகாய் தூள், மசாலாப் பொடி மற்றும் தேவையான அளவு உப்பு சேர்த்து ஒரு நிமிடம் கிளறவும். அடுப்பை மிதமான தீயில் வைத்து, தயிரை சேர்த்து மசாலாவுடன் நன்கு கலக்கவும். 

View this post on Instagram

A post shared by Rekha S (@rekhascucina)

பின்னர் வறுத்து வைத்த பன்னீர் துண்டுகள் மற்றும் புதினா, கொத்தமல்லி இலைகளில் பாதியைச் சேர்க்கவும். இப்போது, சமைத்த மசாலா கலவையின் மேல் வேகவைத்த சாதத்தை சமமாக பரப்பி, மீதமுள்ள புதினா, கொத்தமல்லி இலைகளை தூவவும். கடாயை இறுக்கமான மூடியால் மூடி, குறைவான தீயில் 10 முதல் 15 நிமிடங்கள் 'தம்' போடவும். இது சாதம் மற்றும் மசாலா இரண்டும் ஒன்றாக கலக்க உதவும். 15 நிமிடங்களுக்குப் பிறகு, சூடான, சத்தான பன்னீர் பிரியாணியை மெதுவாக கிளறி, லஞ்ச் பாக்ஸில் பேக் செய்து அனுப்பலாம். தயிர் பச்சடியுடன் பரிமாற சுவை அதிகமாக இருக்கும்.