மட்டன் சாப்பிடும் ஆசை பறந்து போகும்... புரட்டாசி மாசம் இந்த சுக்கா மிஸ் பண்ணாதீங்க மக்களே!

சோயா சுக்கா புரதம் நிறைந்த ஒரு அற்புதமான சைவ உணவு. புரட்டாசி மாதத்தில் நான்வெஜ் சாப்பிட நினைப்பவர்கள் இந்த வெஜ் சுக்கா ட்ரை பண்ணுங்க. இதை எளிதாகவும் விரைவாகவும் தயாரித்து, சப்பாத்தி, பரோட்டா, சாதம் அல்லது ரசம் சாதத்துடன் தொட்டுச் சாப்பிடலாம். சைவ பிரியர்களுக்கு விருந்து வைக்கும் இந்த ரெசிபியை எப்படி செய்வது என்று பேபி மா சமையல் இன்ஸ்டா பக்கத்தில் செய்து காட்டியிருப்பது பற்றி பார்ப்போம். 

தேவையான பொருட்கள்:

சோயா சங்க்ஸ் - 1 கப்
சின்ன வெங்காயம் - 15 (அல்லது பெரிய வெங்காயம் - 1)
இஞ்சி பூண்டு விழுது - 1 தேக்கரண்டி
கறிவேப்பிலை - சிறிதளவு
எண்ணெய் - 3 மேஜைக்கரண்டி
உப்பு - தேவையான அளவு
சோம்பு (பெருஞ்சீரகம்) - 1 தேக்கரண்டி
மிளகு - 1.5 தேக்கரண்டி
சீரகம் - 1 தேக்கரண்டி
மல்லி விதை - 1 தேக்கரண்டி
காய்ந்த மிளகாய் - 3

செய்முறை:

முதலில் சோயா சங்க்ஸ்களை கொதிக்கும் சுடுநீரில் போட்டு 10 நிமிடம் ஊற வைக்கவும். பிறகு, தண்ணீரை நன்றாகப் பிழிந்து எடுத்து தனியே வைக்கவும். சோயாவில் தண்ணீர் அதிகம் இல்லாமல் பார்த்துக்கொள்ள வேண்டும். வறுத்து அரைக்க வேண்டிய மசாலாப் பொருட்களை (சோயா தவிர) வெறும் வாணலியில் மிதமான சூட்டில், வாசனை வரும் வரை வறுக்கவும். ஆறிய பிறகு, அவற்றை மிக்சியில் கொரகொரப்பான பொடியாக அரைத்துத் தனியே எடுத்து வைக்கவும்.

ஒரு அகலமான வாணலியில் எண்ணெய் ஊற்றி சூடாக்கி, அதில் சிறிதளவு கறிவேப்பிலை மற்றும் சோம்பு சேர்த்து தாளிக்கவும். பிறகு, நறுக்கிய சின்ன வெங்காயம் அல்லது பெரிய வெங்காயத்தைச் சேர்த்து, பொன்னிறமாகும் வரை நன்கு வதக்கவும். இஞ்சி பூண்டு விழுதையும் சேர்த்து, அதன் பச்சை வாசனை போகும் வரை வதக்க வேண்டும்.

View this post on Instagram

A post shared by 👩‍🍳 (@baby_maa_samayal)

இப்போது, பிழிந்து வைத்திருக்கும் சோயா சங்க்ஸ் மற்றும் தேவையான அளவு உப்பைச் சேர்த்து, 5 நிமிடம் நன்கு பிரட்டி விடவும். கடைசியாக, அரைத்து வைத்திருக்கும் மசாலா பொடியைச் சேர்த்து, மேலும் 5 முதல் 7 நிமிடங்கள் மிதமான தீயில் நன்கு வறுக்கவும். மசாலா சோயாவில் நன்றாக ஊறி, மட்டன் சுக்கா பதத்திற்கு வந்ததும், அடுப்பை அணைத்து சூடாகப் பரிமாறவும்.