கம கம நெய் வாசம்... குழந்தைகளுக்கு ஏற்ற சத்தான புலாவ் சாதம்; லஞ்ச் பாக்சில் இப்படி செஞ்சு கட்டிக் குடுங்க

அனைவரும் விரும்பி சாப்பிடும் பிரியாணிக்கு அடுத்த இடத்தில் இருப்பது புலாவ். இந்த உணவை செய்வதற்கு எளிதாகவும், சாப்பிட சுவையாகவும் இருப்பதால் அனைவரும் விரும்பி சமைக்கும் ஒரு உணவாக உள்ளது. பல்வேறு காய்கறிகளைப் பயன்படுத்தி வெஜிடபிள் புலாவ் சமைத்தாலும், பச்சை  பட்டாணி புலாவ் தயாரிப்பது எப்படி என்று பார்க்கலாம். 

தேவையான பொருட்கள்

பாஸ்மதி அரிசி - 1 கப் 

பச்சை பட்டாணி : 1/2 கப் 

வெங்காயம் : 2 

தக்காளி : 2

இஞ்சி பூண்டு விழுது: 1 டீஸ்பூன்

பச்சை மிளகாய்: 2 

பட்டை - 1 சிறிய துண்டு

கிராம்பு - 2

ஏலக்காய் - 1

பிரியாணி இலை - 1

சீரகம் - 1/2 டீஸ்பூன்

நெய் : 2 டேபிள்ஸ்பூன்

தண்ணீர் : 1.5 கப் 

உப்பு : தேவையான அளவு

கொத்தமல்லி இலைகள் - சிறிதளவு

செய்முறை:

குக்கர் அல்லது ஒரு அடிகனமான பாத்திரத்தில் நெய் ஊற்றி சூடாக்கவும். அதில் பட்டை, கிராம்பு, ஏலக்காய், பிரியாணி இலை மற்றும் சீரகம் சேர்த்து பொரிய விடவும். சீரகம் பொரிந்ததும், நறுக்கிய வெங்காயம் மற்றும் பச்சை மிளகாய் சேர்த்து, வெங்காயம் பொன்னிறமாகும் வரை நன்றாக வதக்கவும்.

அடுத்து இஞ்சி பூண்டு விழுது சேர்த்து, அதன் பச்சை வாசனை போகும் வரை வதக்கவும். அதன்பிறகு, நறுக்கிய தக்காளி சேர்த்து சிறிது வதக்கவும். பின்னர் பச்சை பட்டாணியைச் சேர்த்து, ஒரு நிமிடம் வதக்கவும். ஊற வைத்த அரிசியை தண்ணீரை வடித்துவிட்டு, பட்டாணியுடன் சேர்த்து மெதுவாக கலக்கவும். 
பின்னர் தேவையான அளவு உப்பு மற்றும் 1.5 கப் தண்ணீர் சேர்க்கவும்.

தண்ணீரை சரிபார்த்து, நன்கு கலந்து, ஒரு கொதி வந்ததும் குக்கரை மூடி வைக்கவும். 1 அல்லது 2 விசில் வந்ததும் அடுப்பை அணைக்கவும். குக்கரில் ப்ரஷர் அடங்கியவுடன் கொத்தமல்லி இலைகளைத் தூவி, அரிசி உடையாமல் மெதுவாக கிளறி விடவும்.

அவ்வளவுதான்! உங்கள் சுவையான மற்றும் மணமான பச்சை பட்டாணி புலாவ் தயார்! இதை ராய்தா (தயிர் பச்சடி) அல்லது உருளைக்கிழங்கு வறுவலுடன் சேர்த்து பரிமாறவும்.