அம்ரித்பால் கைது... அனல் பறந்த பஞ்சாப் அரசியல்; பகவந்த் மான் முயற்சிக்கு பா.ஜ.க பாராட்டு

அம்ரித்பால் சிங்கிற்கு எதிராக பஞ்சாப் காவல்துறையின் கைது நடவடிக்கை மேற்கொண்டிருக்கும் நிலையில், பகவந்த் மான் தனது மாநில இளைஞர்களை "மதத்தின் பெயரால் திறக்கப்படும் இயக்கங்களுக்கு கச்சாப் பொருளாக மாற்ற அனுமதிக்க மாட்டோம் என்று உறுதியளித்தார்.

தீவிர காலிஸ்தான் ஆதரவு போதகரும், வாரிஸ் பஞ்சாப் டி தலைவருமான அம்ரித்பால் சிங் ஞாயிற்றுக்கிழமை கைது செய்யப்படுவதற்கு முன்னதாக, பஞ்சாப் அரசியலில் கொந்தளிப்பு நீடித்தது. அம்ரித்பால் மற்றும் அவரது உதவியாளர்கள் மீது பஞ்சாப் போலீசார் மார்ச் 18-ம் தேதி அதிரடி நடவடிக்கையை மேற்கொண்டனர்.

பஞ்சாப் முதலமைச்சரும், ஆம் ஆத்மி கட்சியின் தலைவருமான பகவந்த் மான் அம்ரித்பாலுக்குப் பின் செல்வதாக உறுதியளித்தார்.

மத்திய உள்துறை அமைச்சர் அமித்ஷா மற்றும் அஸ்ஸாம் முதல்வர் ஹிமந்தா பிஸ்வா சர்மா ஆகியோர் முதல்வர் பகவந்த் மான் நடவடிக்கைக்கு முழுமையான பாராட்டுகளை வழங்கியதன் மூலம் பாகவந்த் மானின் நடவடிக்கை பா.ஜ.க-விடமிருந்து பாராட்டைப் பெற்றது.

மார்ச் 21-ம் தேதி அம்ரித்பாலின் மாமா ஹர்ஜித் சிங் மற்றும் அவரது பல உதவியாளர்கள் கைது செய்யப்பட்டு, கடுமையான தேசிய பாதுகாப்புச் சட்டத்தின் (என்.எஸ்.ஏ) கீழ் குற்றம் சாட்டப்பட்ட ஒரு நாளுக்குப் பிறகு, பகவந்த் மான் ஹிந்தியில் வெளியிட்ட ஒரு வீடியோ செய்தியில், மாநிலத்தின் சூழலை துஷ்பிரயோகம் செய்ய முயற்சிக்கும் சக்திகளுக்கு எதிராக நடவடிக்கை எடுக்கப்படும் என்று அறிவித்தார்.

அம்ரித்பாலின் பெயரை குறிப்பிடாமல், “கடந்த சில நாட்களாக சில வெளிநாட்டு சக்திகளின் தூண்டுதலின் பேரில் சில சக்திகள் மாநிலத்தில் சூழ்நிலையைக் கெடுக்க முயன்றனர். நாட்டின் சட்டத்திற்கு எதிராகப் பேசி, வெறுப்புப் பேச்சுக்களைக் கொடுத்தனர்.

அவர்கள் மீது நடவடிக்கை எடுக்கப்பட்டுள்ளது. அவர்கள் அனைவரும் கைது செய்யப்பட்டு மிகக் கடுமையான தண்டனை வழங்கப்படும். ஆம் ஆத்மி அரசு இதுபோன்ற எந்த சக்திகளையும் மாநிலத்தில் தலை தூக்க அனுமதிக்காது.” என்று கூறினார்.

மூன்று நாட்களுக்குப் பிறகு, போலீஸ் கைது நடவடிக்கை நடந்துகொண்டிருந்த நிலையில், பகவந்த் மான் மீண்டும் ஒரு செய்தியை வெளியிட்டார். அதில், “தனது மாநில இளைஞர்களை மதத்தின் பெயரால் திறக்கப்பட்ட தொழிற்சாலைகளுக்கு கச்சாப் பொருட்களாக ஆக்க அனுமதிக்க மாட்டோம்” என்று கூறினார்.

மதத்தின் பெயரால் கடைகளைத் திறந்து இளைஞர்களை தவறாக வழிநடத்த முயல்பவர்கள் தங்கள் முயற்சி வெற்றியடையும் என்று கனவில் கூட நினைக்கக் கூடாது என்று பகவந்த் மான் கூறினார். ஆம் ஆத்மி அரசுக்கு எதிரான அனுபவமின்மை குற்றச்சாட்டுகளை எதிர்த்த முதல்வர் பகவந்த் மான், “ஆட்சி அமைக்கவும், ஆட்சியை நடத்தவும், இதயங்களை வெல்வதற்கும், நம்பிக்கையை தக்கவைப்பதற்கும் ஆம் ஆத்மிக்கு தெரியும். உங்கள் நம்பிக்கை எனக்கு தைரியத்தை அளிக்கிறது. நம் மாநிலத்தை நாட்டிலேயே நம்பர் ஒன் மாநிலமாக மாற்றுவோம்” என்று கூறினார்.

அம்ரித்பாலைப் பற்றி வெளிப்படையாகக் குறிப்பிடுகையில், “மற்றவர்களின் மகன்களை ஆயுதம் ஏந்தும்படி தூண்டுவதும், இளைஞர்களைத் தங்களைத் தியாகம் செய்யத் தூண்டுவதும் எளிது. நடவடிக்கையை அவர்களே எதிர்கொள்ளும் போது, அது கடினமாகிவிடும்.” என்று பகவந்த் மான் கூறினார்.

இதற்கிடையில், தேர்தல் பின்னடைவுகள் மற்றும் சட்ட சிக்கல்களால் சூழப்பட்ட எஸ்.ஏ.டி 1990-களில் இருந்து கட்சியை ஒரு வலிமைமிக்க அரசியல் சக்தியாக மாற்றிய பாந்திக் அரசியலில் இழந்த இடத்தை மீண்டும் பெறுவதற்கான வாய்ப்பை உணர்ந்தது.

காவல்துறை அம்ரித்பாலின் ஆதரவாளர்களுக்கு எதிரான நடவடிக்கையை மேற்கொண்டு அவர்களில் பலரைக் காவலில் வைத்துள்ளது. எஸ்.ஏ.எடி இந்த நடவடிக்கையை விமர்சித்து, காவல்துறையால் கைது செய்யப்பட்ட இளைஞர்களுக்கு உதவ ஒரு சட்டப் பிரிவை அமைப்பதாகக் கூறியது.

அக்கட்சியின் முன்னாள் எம்.எல்.ஏ ஹரிந்தர்பால் சிங் சந்துமஜ்ரா தி இந்தியன் எக்ஸ்பிரஸ்ஸிடம் கூறியதாவது: “இருபதுகளின் தொடக்கத்தில் உள்ள இளைஞர்கள் எந்தக் காரணமும் இன்றி தடுத்து வைக்கப்பட்டிருக்கும் இத்தருணத்தில், சீக்கிய சமூகத்தைப் பிரதிநிதித்துவப்படுத்தும் பிராந்தியக் கட்சியான அகாலிதளம் முன்வர வேண்டும் என்று மூத்த தலைவர்களிடையே விவாதித்த பின்னர், இளம், அப்பாவி இளைஞர்களுக்கு உதவ கட்சி முடிவு செய்தது. சீக்கிய சமூகத்தைத் தவிர, இந்த பிரச்சினை மனித உரிமைகள் மற்றும் பேச்சு சுதந்திரம், கருத்து சுதந்திரம் ஆகியவற்றைப் பற்றியது. சுக்பீர் பாதல் கூறுகையில், “வெறும் சந்தேகத்தின் பேரில் ஏராளமான இளைஞர்கள் கண்மூடித்தனமாக கைது செய்யப்படுவது அதிர்ச்சியளிக்கிறது.” என்று கூறினார்.

இதைத் தொடந்து, அம்ரித்பால் மீதான அடக்குமுறையின் போது, மார்ச் 28-ம் தேதி மாநிலத்தில் பகவந்த் மான் மற்றும் சீக்கிய மதகுருமார்களுக்கு இடையே ஒரு புதிய மோதலைக் கண்டது.

அகல் தக்த் ஜதேதார் கியானி ஹர்ப்ரீத் சிங், சீக்கிய சமூகத்தின் அப்பாவி இளைஞர்களின் உரிமைகளைப் பற்றி பேசுவது தனது உரிமை மற்றும் கடமை என்று பதிலடி கொடுத்தார்.

ஒரு நாள் கழித்து, அம்ரித்பால் சரணடையத் திட்டமிட்டுள்ளார் என்ற தகவல்களுக்கு மத்தியில் பஞ்சாப் காவல்துறை இரண்டு கோவில்களில் பாதுகாப்பை பலப்படுத்தியது. பின்னர் அம்ரித்பாலின் வீடியோ அறிக்கை வந்தது. அதில் அவர் தனக்கு எதிரான காவல்துறை வேட்டையை ‘சமூகத்தின் மீதான தாக்குதல்’ என்று குறிப்பிட்டார். ‘சர்பத் கல்சா (சீக்கியர்களின் கூட்டம்)-க்கு அழைப்பு விடுத்து உலகம் முழுவதும் சீக்கியர்களை அணிதிரட்ட முயன்றார். கறுப்புத் தலைப்பாகை மற்றும் சால்வை அணிந்திருந்த அம்ரித்பால், காலிஸ்தான் அல்லது தனி மாநிலம் பற்றி எதுவும் குறிப்பிடவில்லை. ஆனால் பைசாகி (ஏப்ரல் 14) அன்று தல்வண்டி சாபோவில் உள்ள தக்த் ஸ்ரீ தாம்தாமா சாஹிப்பில் சர்பத் கல்சா என்று அழைக்குமாறு கியானி ஹர்ப்ரீத் சிங்கிடம் வலியுறுத்தினார்.

போலீஸ் வேட்டை தொடர்ந்தது - மார்ச் 21-ம் தேதி டெல்லியில் அம்ரித்பால் இருப்பதாகவும், மார்ச் 25-ம் தேதிக்குள் நேபாளில் இருப்பதாகவும் செய்திகள் வந்தன. அம்ரித்பாலில் இருந்து அகாலி தக்த் தலைவருக்கு வீடியோ செய்தி வந்ததை அடுத்து, ஹோஷியார்பூர் மாவட்டத்தில் போலீசார் தங்கள் தேடுதல் நடவடிக்கைகளை தொடர்ந்தனர். பின்னர் அம்ரித்பால் இமாச்சல பிரதேசத்திற்கு சென்றதாக கூறப்படுகிறது. அவரது உதவியாளர் பாபல்பிரீத் சிங் ஏப்ரல் 10-ம் தேதி அமிர்தசரஸில் கைது செய்யப்பட்டார்.

ஏப்ரல் 21-ம் தேதி குடியேற்ற அதிகாரிகள் அம்ரித்பாலின் மனைவி கிரண்தீப் கவுரை இங்கிலாந்துக்கு விமானத்தில் ஏற விடாமல் தடுத்து நிறுத்தி விசாரித்தனர். பஞ்சாபில் உள்ள சீக்கிய மதகுருமார்கள் மற்றும் எஸ்.ஏ,டி இந்த நடவடிக்கையின் பின்னணியில் உள்ள மாநில அரசாங்கத்தின் நோக்கம் குறித்து கேள்வி எழுப்பினர். இது இளைஞர்களிடையே பயங்கரமான சூழ்நிலையை உருவாக்குகிறது என்று குற்றம் சாட்டினர்.

ஒரு வீடியோ செய்தியில், அகல் தக்த் ஜதேதார், கிரண்தீப் கவுரை அமிர்தசரஸ் விமான நிலையத்தில் நிறுத்துவது எந்தக் கோணத்திலும் சரியல்ல, ஏனெனில் அவர் வெளிநாட்டில் உள்ள தனது பெற்றோர் வீட்டிற்குச் செல்கிறார்.

சங்ரூர் எம்.பி.யும், எஸ்ஏடி (அமிர்தசரஸ்) தலைவருமான சிம்ரஞ்சித் சிங் பகவந்த் மான், பிரிட்டிஷ் தூதர் மற்றும் மத்திய உள்துறை அமைச்சருக்கு கடிதம் எழுதினார். அதில், கிரண்தீப் கவுரை தடுத்து வைத்தது, குற்றச்சாட்டுகள் அல்லது சிவப்பு நோட்டீஸ் இல்லாமல் அவரை இங்கிலாந்து செல்லும் விமானத்தில் ஏற மறுப்பது குறித்து ஆட்சேபனைகளை எழுப்பினார்.

அம்ரித்பாலுக்கு எதிரான பகவந்த் மான் அரசாங்கத்தின் நடவடிக்கையும் பா.ஜ.க பாராட்டியது. ஏப்ரல் 17-ம் தேதி டிவி9, பாரத் வர்ஷ்-க்கு அளித்த பேட்டியில், அஸ்ஸாம் முதல்வர் ஹிமந்தா பிஸ்வா சர்மா, பஞ்சாப் முதல்வர் பகவந்த் மான்-ஐப் பாராட்டினார். அவர், “சரியான நேரத்தில் சரியான நடவடிக்கையை (காலிஸ்தானிகளுக்கு எதிராக) எடுத்ததற்காக பஞ்சாப் முதலமைச்சருக்கு நான் நன்றி தெரிவிக்க விரும்புகிறேன். இந்த விஷயத்தில் எனக்கு எந்த அரசியல் பிரச்சினையும் இல்லை.” என்று கூறினார்.

ஏப்ரல் 21-ம் தேதி பெங்களூரில் ஒரு ஊடக சந்திப்பில் அமித்ஷா கூறியதாக ஏ.என்.ஐ செய்தி நிறுவனம் குறிப்பிட்டது. அதில், “காலிஸ்தானின் அலை இல்லை. பல முறை, சிலர் முயற்சி செய்கிறார்கள். ஆனால், அரசாங்கம் அதன் வேலையைச் செய்துள்ளது. பஞ்சாப் அரசு சிறப்பாக செயல்பட்டுள்ளது. மத்திய அரசு ஆதரவு தெரிவித்துள்ளது. நாங்கள் நிலைமையை உன்னிப்பாக கவனித்து வருகிறோம்” என்று கூறினார்.

"தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil”