சந்திரயான்-3 தரையிறங்கும் தளத்திற்கு பெயர் சூட்டியதில் எந்த சர்ச்சையும் இல்லை: இஸ்ரோ தலைவர்

இஸ்ரோ தலைவர் எஸ் சோமநாத் ஞாயிற்றுக்கிழமை கூறுகையில், சந்திரயான் -3 திட்டத்தில் இருந்து இந்திய விண்வெளி ஆராய்ச்சி நிறுவனம் முக்கியமான மற்றும் சுவாரஸ்யமான தரவுகளைப் பெற்றுள்ளது, இது வரும் நாட்களில் விளக்கப்படும், என்று கூறினார்.

செய்தியாளர்களிடம் பேசிய சோமநாத், சந்திரயான்-3 தரையிறங்கும் தளத்திற்கு ‘சிவ்சக்தி பாயிண்ட்’ என்று பிரதமர் பெயர் சூட்டியதில் எந்த சர்ச்சையும் இல்லை, என்று கூறினார்.

இதையும் படியுங்கள்: ஆக.23- ‘தேசிய விண்வெளி தினம்’ ; சந்திரயான் 3 தரையிறங்கிய இடம் ‘சிவ சக்தி’ : மோடி அறிவிப்பு

“ரோவர் திட்டமிட்டபடி நகர்கிறது. ரோவரில் இருந்து இதுவரை பெறப்படாத மிகவும் சுவாரஸ்யமான தரவை நாங்கள் பெற்று வருகிறோம். இதுகுறித்து வரும் நாட்களில் விஞ்ஞானிகள் விளக்கம் அளிப்பார்கள்,” என்று சோமநாத் கூறினார்.

தரையிறங்கும் தளத்திற்கு பெயர் சூட்டுவது குறித்து சோமநாத் கூறியதாவது: ”தரையிறங்கும் இடத்திற்கு பெயர் வைக்க நாட்டிற்கு முழு உரிமை உள்ளது. தரையிறங்கும் இடத்திற்கு பெயர் வைப்பது முதல் முறை அல்ல. நிலவில் ஏற்கனவே பல இந்திய பெயர்கள் உள்ளன. சந்திரனில் சாராபாய் பள்ளம் உள்ளது. மற்ற நாடுகளும் தங்கள் அறிவியல் சாதனைகள் தொடர்பான இடங்களுக்கு பெயரிட்டுள்ளன. சிறிய சோதனைகள் உட்பட அனைத்து இடங்களுக்கும் பெயரிடப்படும். அது ஒரு பாரம்பரியம்.’’

நிலவின் தென் துருவத்தில் தரையிறங்க பல நாடுகளின் சந்திர பயணங்கள் முயற்சி செய்ததாக சோமநாத் கூறினார். ”சந்திரனின் தென் துருவத்தில் உள்ள பள்ளத்தாக்குகள் மற்றும் மலைகள் மற்றும் சூரிய ஒளி 14 நாட்களுக்கு மட்டுமே கிடைக்கும் என்பதைக் கருத்தில் கொள்ளும்போது தென் துருவத்தில் தரையிறங்குவது என்பது மிகவும் ஆபத்தானது. ரோவர் தரையிறங்குவதற்கு ஒரு சமமான பகுதியைக் கண்டுபிடிப்பது மிகவும் கடினமாக இருந்தது. பல தோல்விகளுக்கு இவையே காரணம்,” என்று சோமநாத் கூறினார்.

"ஆய்வு செய்யப்படாத தென் துருவத்தின் அறிவியல் திறன் காரணமாக நாங்கள் ஆபத்தை கையில் எடுத்தோம். இரசாயன கூறுகள் மற்றும் நீர் கண்டுபிடிக்க வாய்ப்புகள் உள்ளன. சூரிய ஒளியின் 14 நாட்களுக்குப் பிறகு, ரோவர் மற்றும் லேண்டர் தூங்கும் பயன்முறைக்குச் செல்லும், சூரிய ஒளி திரும்பியதும், தானாகவே செயல்பாட்டு பயன்முறைக்கு மாறும். அது நடந்தால், இன்னும் 14 நாட்கள் கிடைக்கும் அதிர்ஷ்டம் உள்ளது. இருப்பினும், இது நிறைய ஆபத்து கூறுகளை உள்ளடக்கியது,'' என்று சோமநாத் கூறினார்.

சனிக்கிழமை திருவனந்தபுரம் வந்தடைந்த சோமநாத் அருகே வெங்கனூரில் உள்ள ஸ்ரீ பாலா திரிபுர சுந்தரி தேவி கோவிலில் சிறப்பு வழிபாடுகளில் பங்கேற்ற பிறகு, செய்தியாளர்களிடம் பேசினார்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil