மிக்சி பிளேடு மொட்டையாய் போச்சா? ஷார்ப் ஆக்க காலி மாத்திரை அட்டை; இப்படி யூஸ் செஞ்சு பாருங்க!

நவீன சமையலறையின் இன்றியமையாத அங்கமாக இருப்பது மிக்சி (Mixi). கரம் மசாலா அரைப்பது முதல் இட்லி, தோசைக்கான மாவு தயாரிப்பது வரை, மிக்சியின் பயன்பாடு தினசரி சமையலில் அளப்பரியது. ஆனால், காலப்போக்கில் ஜாரில் உள்ள பிளேடுகள் மழுங்கிப் போவது தவிர்க்க முடியாத ஒன்று. பிளேடுகள் கூர்மை குறைந்தால், அரைக்கும் பொருட்கள் சரியாக அரைபடாமல், அரைக்கும் நேரம் அதிகரிக்கும்; சில சமயங்களில் மாவை மீண்டும் மீண்டும் அரைக்க வேண்டிய சூழல் ஏற்படும். இதனால் மிக்சியில் அதிகப்படியான வெப்பம் ஏற்பட்டு, அதன் ஆயுளும் குறைய வாய்ப்புள்ளது. 

புதிய பிளேடுகள் வாங்குவது என்பது கூடுதல் செலவு வைக்கும் விஷயம். இந்தச் செலவைத் தவிர்க்கவும், மழுங்கிய பிளேடுகளை மீண்டும் கூர்மைப்படுத்தவும் ஒரு எளிய, யாரும் அறிந்திராத சூப்பர் டிப்ஸ் பற்றி நளினிமனிக் இன்ஸ்டா பக்கத்தில் கூறியிருக்கும் ட்ரிக்ஸ் பற்றி பார்ப்போம். 

இந்த அசத்தலான வீட்டுக்குறிப்பிற்குத் தேவை ஒரே ஒரு பொருள் தான் – அது நாம் உபயோகித்துவிட்டு வீசி எறியும் காலி மாத்திரை அல்லது கேப்ஸ்யூல் அட்டை. மாத்திரை அட்டையின் பின்பக்கம் உள்ள அலுமினியத் தாள் தான் நம்முடைய மிக்சி பிளேடிற்கு கூர்மையைக் கொண்டு வரப் போகிறது.

பிளேடை கூர்மையாக்கும் எளிய முறை:

மிக்சியில் உள்ள மழுங்கிப் போன ஜாரை எடுத்துக் கொள்ளுங்கள். உபயோகித்த காலி மாத்திரை அட்டையை (அலுமினியம் தாள் பக்கம்) சிறிய துண்டுகளாகக் கத்தரித்துக் கொள்ளவும். இந்த அலுமினியத் தாள் துண்டுகளை மிக்சி ஜாரில் போட்டு, மூடியை இறுக்கி மூடிவிடவும். மிக்சியை சிறிது நேரம் இயக்கி விடவும்.

View this post on Instagram

A post shared by Nalini Manickam (@nalinimanick)

நாம் மிக்சியை ஓடவிடும் போது, ஜாரினுள் இருக்கும் அலுமினியத் தாள் துண்டுகள், மழுங்கிய பிளேடுகளின் விளிம்புகளில் வேகமாக உராய்ந்து செல்லும். இந்த உராய்வு காரணமாக, பிளேடின் விளிம்புகள் மீண்டும் சீரடைந்து, இழந்துபோன கூர்மையைத் திரும்பப் பெறுகின்றன. இந்த எளிய முறையால், பழைய பிளேடையே மீண்டும் புதியது போல கூர்மையாக்க முடியும். இனி மிக்சி பிளேடு மழுங்கிவிட்டால் கவலை இல்லை. காலி மாத்திரை அட்டையை உபயோகித்து, உங்கள் நேரத்தையும் பணத்தையும் மிச்சப்படுத்துங்கள்.