இளம் நரையால் அவஸ்தை? இந்த இலை சேர்த்து அரைத்த ஆயில்; இப்படி செஞ்சு தடவிப் பாருங்க!

இன்றைய வேகமான வாழ்க்கை முறையில், இளம் நரை என்பது வயது வித்தியாசமின்றி பலருக்கும் ஒரு பெரிய சவாலாக உள்ளது. முடிக்கு நிறமளிக்கும் மெலனின் உற்பத்தி குறைவதே இதற்கு முக்கிய காரணமாகும். இந்த நரை முடிப் பிரச்சனைக்கு செயற்கை டை பயன்படுத்துவதற்குப் பதிலாக, நம் முன்னோர்கள் பயன்படுத்திய இயற்கையான இலைகளைக் கொண்ட எண்ணெயைப் பயன்படுத்துவது நிரந்தரமான மற்றும் ஆரோக்கியமான தீர்வாக அமையும். அதற்கான ஒரு தீர்வை பற்றி கோமுஸ் லைஃப்ஸ்டைல் இன்ஸ்டா பக்கத்தில் கூறியிருப்பது பற்றி பார்ப்போம்.

இளம் நரையை போக்க உதவும் சக்திவாய்ந்த மூலிகைகள்: இந்த எண்ணெய் தயாரிப்பில் பயன்படுத்தப்படும் சில முக்கியமான பொருட்கள், முடிக்கு கருமை நிறம் அளிப்பதிலும், முடி உதிர்வைத் தடுப்பதிலும் சிறந்து விளங்குகின்றன.

கருவேப்பிலை - இதில் உள்ள ஆன்டிஆக்ஸிடன்ட்கள் முடிக்கு மெலனின் உற்பத்தியை ஊக்குவித்து, நரையைப் போக்க உதவுகிறது. முடி வளர்ச்சிக்கும் நல்லது.

நெல்லிக்காய் - வைட்டமின் சி நிறைந்தது. இது இளநரையைப் போக்கி, முடி அடர்த்தியாகவும் கருமையாகவும் வளர உதவுகிறது.

செம்பருத்தி இலை/பூ - முடி உதிர்வைத் தடுத்து, வேர்க்கால்களை வலுப்படுத்தி, முடியின் நிறத்தைப் பாதுகாக்கும்.

தேங்காய் எண்ணெய் - 200 மி.லி (தூய்மையான செக்கில் ஆட்டிய எண்ணெய் சிறந்தது)

வெந்தயம் - 1 தேக்கரண்டி

கருஞ்சீரகம் - 1 தேக்கரண்டி

செய்முறை விளக்கங்கள்:

கருவேப்பிலை, நெல்லிக்காய் துண்டுகள், வெந்தயம், கருஞ்சீரகம் ஆகியவற்றை மிக்ஸியில் போட்டு தண்ணீர் சேர்க்காமல் நன்றாக அரைத்து ஒரு பசை போல எடுத்துக்கொள்ளவும். ஒரு கனமான பாத்திரத்தில் தேங்காய் எண்ணெயை ஊற்றி, மிதமான தீயில் வைக்கவும். எண்ணெய் லேசாக சூடானதும், நீங்கள் அரைத்து வைத்திருக்கும் மூலிகைப் பசையை அதனுடன் சேர்க்கவும்.

அடுப்பை மிகவும் குறைந்த தீயில் வைத்து, மூலிகைகளின் சத்துக்கள் அனைத்தும் எண்ணெயில் நன்றாக இறங்கும் வரை கொதிக்க விடவும். இந்த கலவை சிறிது நேரம் கழித்து, அதில் உள்ள ஈரப்பதம் நீங்கி, மூலிகைப் பொருட்கள் அடர் பழுப்பு அல்லது கறுப்பு நிறமாக மாறும். மூலிகைகள் நன்றாகப் பொரிந்து, சத்துக்கள் எண்ணெயில் இறங்கியதும், அடுப்பை அணைத்து, எண்ணெயை முழுவதுமாக ஆற விடவும். ஆறிய பின்னர், ஒரு சுத்தமான பருத்தித் துணி அல்லது மெல்லிய வடிகட்டி கொண்டு எண்ணெயைத் தெளிவான முறையில் வடிகட்டி ஒரு பாட்டிலில் சேமிக்கவும். 

வாரத்திற்கு இரண்டு அல்லது மூன்று முறை இந்த எண்ணெயைப் பயன்படுத்தலாம். சிறிதளவு எண்ணெயை எடுத்து, விரல் நுனிகளால் முடியின் வேர்க்கால்களில் படும்படி நன்றாகத் தேய்த்து மசாஜ் செய்ய வேண்டும். குறிப்பாக நரை முடி அதிகம் இருக்கும் இடங்களில் கவனம் செலுத்தி மசாஜ் செய்வது அவசியம். குறைந்தது ஒரு மணி நேரம் முதல் இரண்டு மணி நேரம் வரை இந்த எண்ணெய் தலையில் ஊற வேண்டும். சிறந்த பலனைப் பெற, இரவு முழுவதும் எண்ணெயை ஊற வைத்து, மறுநாள் காலையில் குளிர்ந்த நீரில் குளிப்பது கூடுதல் பலன் தரும்.

View this post on Instagram

A post shared by gomathy (@gomus.lifestyle)

தலையில் எண்ணெய் தடவிய பின், வேதியியல் கலப்பில்லாத மிதமான ஷாம்பு அல்லது சீயக்காய் போன்ற இயற்கை நுரைப்பானைப் பயன்படுத்திக் குளிப்பது சிறந்தது. முடிந்தவரை, தலைக்குக் குளிக்கும் போது வெந்நீரைப் பயன்படுத்துவதைத் தவிர்க்கவும். இளம் நரை என்பது ஒரு நாள் இரவில் மாறிவிடாது. இந்த இயற்கை எண்ணெயை தொடர்ந்து பொறுமையுடன் பயன்படுத்தி வந்தால், சிறிது சிறிதாக உங்கள் இளம் நரை மறையத் தொடங்குவதைக் கண்கூடாகக் காணலாம்.  

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.