சும்மா சாதரண சண்டைக்குக் கூட விவகாரத்து நோட்டீஸ்? இந்த வலையில சிக்காதீங்க- எச்சரிக்கும் வழக்கறிஞர்

டெல்லி வழக்கறிஞர் அமிஷ் 

மணவாழ்க்கையில் பிணக்குகள் ஏற்படுவது சகஜம். நான் ஒரு குடும்ப நல வழக்கறிஞராகப் பல தம்பதிகளைச் சந்திக்கும்போது, ஒரு பொதுவான விஷயத்தைக் கவனிக்கிறேன். கணவன் அல்லது மனைவி இருவரும் தாங்கள் புறக்கணிக்கப்படுவதாகவும், தனிமைப்படுத்தப்படுவதாகவும் உணர்கிறார்கள். தங்கள் துணைக்கு ஒரு சட்ட அறிவிப்பு அனுப்பினால் அல்லது விவாகரத்து வழக்கு, அல்லது தாம்பத்திய உரிமைகளை மீட்டெடுப்பதற்கான வழக்கு (restitution of conjugal rights) தொடுத்தால், தங்கள் துணை தங்கள் முக்கியத்துவத்தை உணர்ந்து, திரும்பி வந்து மன்னிப்புக் கேட்டு, தங்களுக்குத் தேவையான அன்பையும், கவனத்தையும் தருவார்கள் என்று அவர்கள் ஆழ்மனதில் நினைக்கிறார்கள்.

ஆனால், இது ஒரு பெரிய தவறான புரிதல்!

நீங்கள் ஒரு வழக்கறிஞரை அணுகும்போது, அவர் "ஆம், இந்த வழக்கைத் தொடரலாம்!" என்று சொல்வார். 

ஒரு சட்ட அறிவிப்பு அல்லது விவாகரத்து மனுவை வழக்கறிஞர் தயாரிக்கும்போது, நீதிமன்றத்தில் உங்கள் வழக்கு வலுவாக இருக்க வேண்டும் என்பதற்காக, நடந்த சம்பவங்களைவிடவும் பல மடங்கு மிகைப்படுத்தப்பட்ட குற்றச்சாட்டுகளைச் சேர்க்கும்படி பொதுவாக அறிவுறுத்துவார். இந்தக் குற்றச்சாட்டுகள் சட்டப்படி விவாகரத்துக்கு ஏற்ற காரணங்களாக இருந்தாலும், உங்கள் உண்மையான நோக்கம் – அதாவது துணையைத் திருத்தி உறவைச் சீர்படுத்துவது – இதனால் சிதைந்துவிடும்.

சமரசப் பாதைக்கு முட்டுக்கட்டை!

இத்தகைய மிகைப்படுத்தப்பட்ட குற்றச்சாட்டுகளைப் படிக்கும்போது, உங்கள் துணைக்கு நிச்சயம் கோபம் ஏற்படும். அவர்கள் ஒரு வழக்கறிஞரை அணுகி, இன்னும் கடுமையான எதிர் குற்றச்சாட்டுகளுடன் பதிலளிக்கும்படி அறிவுறுத்தப்படுவார்கள். இதனால் சமரசத்திற்கான வாய்ப்பு முற்றிலும் இல்லாமல் போய்விடும். ஒரு சிறிய தவறான புரிதலால் ஆரம்பித்த பிரச்சனை, சட்டச் சண்டையாக மாறி, உறவுகளை நிரந்தரமாகப் பாதித்துவிடும் அபாயம் உள்ளது.

ஆகவே, நீங்கள் பிரிந்து செல்வது குறித்து 100% உறுதியாக இல்லாவிட்டால், தயவுசெய்து உங்கள் துணைக்கு ஒரு சட்ட அறிவிப்பை அனுப்பவோ அல்லது அவர்களுக்கு எதிராக எந்த வழக்கையும் தொடரவோ வேண்டாம். ஏனெனில், ஒருமுறை சட்டப் போர் தொடங்கிவிட்டால், உறவுகளை மீண்டும் இணைப்பது மிகவும் கடினம். சட்ட நடவடிக்கைகள் உறவுகளை மேம்படுத்துவதற்குப் பதிலாக, மேலும் விரிசல் அடையவே செய்யும்.

மாறாக, மனம் விட்டுப் பேசுதல், குடும்ப ஆலோசனை பெறுதல் போன்ற மாற்று வழிகளை ஆராய்வது உறவை மீட்டெடுக்க உதவும்.