உங்க தோட்டத்து செடிகள் கொத்து கொத்தா காய்க்கணுமா? இந்த 5 தண்ணிய இனி தூர ஊத்தாதீங்க

உங்கள் தோட்டத்து செடிகள் செழித்து வளரவும், ஏராளமான காய்கறிகளையும், பழங்களையும் கொடுக்கவும் இயற்கை உரங்கள் இன்றியமையாதவை. கடைகளில் விற்கும் செயற்கை உரங்களில் தீங்கு விளைவிக்கும் ரசாயனங்கள் இருக்கலாம். மேலும், அவை மண்ணில் இருக்கும் நன்மை செய்யும் நுண்ணுயிரிகளையும், பூச்சிகளையும் அழித்துவிடும். ஆனால், வீட்டில் இருக்கும் பொருட்களைக் கொண்டே மிக எளிதாக இயற்கை உரங்களைத் தயாரிக்கலாம் என்பது உங்களுக்குத் தெரியுமா? வாங்க! வீட்டில் எளிதாகத் தயாரிக்கக்கூடிய 5 இயற்கை உரங்களைப் பற்றிப் பார்ப்போம்:

அரிசி கழுவிய நீர்

சாதம் வடித்த பிறகு மீதமாகும் நீரில் ஸ்டார்ச் மற்றும் சிறிதளவு நைட்ரஜன், பாஸ்பரஸ், பொட்டாசியம் (NPK) ஆகியவை உள்ளன. இவை செடிகளின் ஆரோக்கியமான வளர்ச்சிக்கு மிகவும் முக்கியமான சத்துக்கள். அரிசி கழுவிய நீரை அப்படியே செடிகளுக்கு ஊற்றலாம். இதில் NPK அளவு குறைவாக இருப்பதால், அதிகமாக ஊற்றிவிட்டாலும் செடிகளுக்கு எந்தப் பாதிப்பும் ஏற்படாது. ஆனால், சாதம் வடிக்கும்போது உப்பு சேர்க்காமல் இருப்பது முக்கியம். மேலும், இந்த நீரை உடனுக்குடன் பயன்படுத்துவது நல்லது.

முட்டை வேகவைத்த நீர்

முட்டை வேகவைத்த நீரைத் தூக்கி எறியாதீர்கள். அதுவும் ஒரு சிறந்த இயற்கை உரம். இதில் சிறிதளவு ஊட்டச்சத்துக்களும், கால்சியமும் உள்ளன. முட்டை ஓடுகளை தனியாக வேகவைத்தும் அந்த நீரைப் பயன்படுத்தலாம். வேகவைத்த முட்டை ஓடுகளைப் பொடியாக்கி கம்போஸ்டில் சேர்க்கலாம் அல்லது செடிகளின் வேர்ப்பகுதியில் தூவலாம். இது நத்தைகள் மற்றும் புழுக்களைத் தடுக்கவும் உதவும்.

உருளைக்கிழங்கு வேகவைத்த நீர்

உருளைக்கிழங்கு வேகவைத்த நீரில் ஸ்டார்ச் மற்றும் பல பயனுள்ள ஊட்டச்சத்துக்கள் நிறைந்துள்ளன. இதையும் உப்பு சேர்க்காமல் ஆற வைத்து செடிகளுக்கு ஊற்றலாம்.

காய்கறி வேகவைத்த நீர்

காய்கறிகளை வேகவைத்த அல்லது ஆவியில் வேகவைத்த நீரும் செடிகளுக்கு நல்ல உரமாகும். ஆனால், சில காய்கறிகளை வேகவைத்த நீரில் இருந்து துர்நாற்றம் வீசக்கூடும். குறிப்பாக முட்டைக்கோஸ், காலிஃபிளவர் போன்றவற்றை வேகவைத்த நீரை வீட்டுக்குள் இருக்கும் செடிகளுக்குப் பயன்படுத்த வேண்டாம். வெளிப்புறத் தோட்டச் செடிகளுக்கு இது மிகவும் நல்லது.

மீன் தொட்டி நீர்

நீங்கள் நன்னீர் மீன் தொட்டி வைத்திருந்தால், அந்த நீரை செடிகளுக்கு ஊற்றலாம். மீன்களின் கழிவுகள் மற்றும் தாவரங்களின் எச்சங்கள் செடிகளுக்கு நல்ல உரமாக இருக்கும். ஆனால், உப்புத்தண்ணீர் மீன் தொட்டி நீரைப் பயன்படுத்த வேண்டாம். அது செடிகளை அழித்துவிடும்.