இந்த தீபாவளிக்கு புது லுக்! ரம்யா பாண்டியன் 'ஹேண்ட் கிராஃப்டட் கவுட்சர் பிளவுஸ்' டிரை பண்ணுங்க

சமீபகாலமாக, திருமணங்கள், வரவேற்பு நிகழ்வுகள் மற்றும் முக்கிய விழாக்களில் பிரபலங்கள் அணிந்து வரும் கவுட்சர் பிளவுஸ் டிசைன்கள், ஃபேஷன் ஆர்வலர்கள் மத்தியில் பெரும் தாக்கத்தை ஏற்படுத்தியுள்ளன. இந்த ஸ்டைலான பிளவுஸ்களைப் பற்றியும், அவற்றில் உள்ள ட்ரெண்டிங் அம்சங்களைப் பற்றியும் இங்கே காணலாம்.

கவுட்சர் பிளவுஸ் என்றால் என்ன?

கவுட்சர் (Couture) என்ற பிரெஞ்சு வார்த்தையின் பொருள், 'தனிப்பயனாக்கப்பட்ட உயர் ஃபேஷன்' என்பதாகும். அதாவது, இயந்திரங்களின் உதவியின்றி, ஒரு வடிவமைப்பாளரால் முழுக்க முழுக்கக் கையால் வடிவமைக்கப்பட்டு, வாடிக்கையாளரின் அளவுகளுக்கு ஏற்பப் பிரத்யேகமாக உருவாக்கப்படும் ஒரு கலைப்படைப்புதான் கவுட்சர் பிளவுஸ்.

இதில், ஒவ்வொரு ஜர்தோசி (Zardozi) வேலைப்பாடும், ஒவ்வொரு நூலும், ஒவ்வொரு கல்லும் ஒரு நோக்கத்துடன், பல நாட்கள் உழைப்பைக் கொண்டு நேர்த்தியாகப் பதிக்கப்பட்டிருக்கும். இதன் தனித்துவமே, இந்த டிசைனை வேறு யாரும் நகலெடுக்க முடியாது என்பதுதான்.

சிற்பம்போல் நிற்கும் ப்ளஞ்ச் நெக்லைன் (Sculptural Plunge Neckline)

சமீபத்திய ஃபேஷனில் ப்ளஞ்ச் நெக்லைன்கள் மிகவும் பிரபலம். ஆனால், கவுட்சர் வடிவமைப்பில், இது வழக்கமான வடிவத்தை மீறி, ஆழமான கோணங்கள் மற்றும் வடிவமைப்பு நுணுக்கங்களுடன் (Sculptural Elements) வருகிறது. ஆடை அங்கங்கே மடிப்புடன், நெஞ்சின் பகுதிக்கு ஒரு முப்பரிமாண அழகைத் தருகிறது. இதற்குப் பிரத்யேக 'பாடி ஷேப்பிங்' நுட்பங்களைப் பயன்படுத்துகிறார்கள்.

ட்ராமாடிக் ஸ்லீவ்ஸ் (Dramatic Sleeves)

பிளவுஸின் அழகைக் காட்டுவது அதன் கைதான். கவுட்ர் டிசைன்களில், கைகளின் நீளம் மற்றும் வடிவத்தில் அதிகம் கவனம் செலுத்தப்படுகிறது. பஃப் ஸ்லீவ்ஸ், கேப் ஸ்லீவ்ஸ், மிரர் வொர்க் ஸ்லீவ்ஸ் கொண்ட பிளவுஸ்கள் இப்போது ட்ரெண்டிங்.

'பார்ட்னர்' டிசைன்கள் (Dual Fabric & Partner Design)

புடவையின் மெட்டீரியலுக்கு முற்றிலும் மாறான, வேறொரு ஆடம்பரமான துணியில் (வெல்வெட், ஆர்கன்சா) பிளவுஸை வடிவமைப்பது தற்போது புதிய டிரெண்ட். மேலும், ஒரே பிளவுஸில் ஜர்தோசியும், கட்-டானாவும் (Cutdana) இணைந்து வருவது போன்ற இரண்டு விதமான நுட்பங்களை இணைக்கும் 'பார்ட்னர் டிசைன்களும்' ரசிகர்களை ஈர்த்து வருகின்றன.

பிளவுஸ் அல்ல, அது ஒரு போர்ட்ரெய்ட்!

கவுட்சர் பிளவுஸ்களின் முதுகுப் பகுதி, ஒரு கலைப்படைப்பாகவே மாற்றப்படுகிறது. பூக்கள், பறவைகள், விலங்குகள் அல்லது கோவில் கோபுரங்கள் போன்ற வடிவங்களை பிளவுஸின் பின்பக்கதில் முழுக்க கையால் எம்பிராய்டரி செய்து, ஆடைக்கு ஒரு 'போர்ட்ரெய்ட்' லுக்கைக் கொடுக்கிறார்கள். இது, பிளவுஸைத் தனித்து ஜொலிக்க வைக்கிறது.

நீங்கள் கவுட்சர் பிளவுஸ் தைக்க விரும்பினால்...

சாதாரண பிளவுஸை விட கவுட்சர் வடிவமைப்பிற்கு அதிக உழைப்பும், நேரமும் தேவைப்படும். உங்களுக்கு என்ன வடிவம் பொருந்தும், புடவைக்கு என்ன வண்ணம் சிறப்பாக இருக்கும் என்பதை ஒரு ஃபேஷன் டிசைனருடன் ஆலோசித்து இறுதி செய்யுங்கள். கவுட்சர் பிளவுஸின் முக்கிய அம்சம், அது உங்கள் உடலுக்குச் சரியாகப் பொருந்தி இருக்க வேண்டும். அதற்குக் குறைந்தது இரண்டு 'ஃபைனல் ட்ரையல்ஸ்' அவசியம். ஏனெனில் கவுட்சர் பிளவுஸ் என்பது ஒரு ஃபேஷன் முதலீடு.