மனிதர்களை நிலவில் தரையிறங்கும் ஆர்ட்டெமிஸ் V திட்டம்: சந்திர லேண்டரை உருவாக்க ப்ளூ ஓரிஜிலுடன் நாசா ஒப்பந்தம்

நாசா ஆர்ட்டெமிஸ் திட்டத்தில் மனிதர்களை மீண்டும் நிலவுக்கு அனுப்பும் பணியில் ஈடுபட்டு வருகிறது. ஆர்ட்டெமிஸ் திட்டத்தின் ஒரு பகுதியாக ஆர்ட்டெமிஸ் 1 ஆளில்லா ஓரியன் விண்கலத்தை வெற்றிகரமாக விண்ணிற்கு செலுத்தியது. ஆர்ட்டெமிஸ் 2 திட்டத்திற்கு தயாராகி வருகிறது. இந்நிலையில் ஆர்ட்டெமிஸ் V மனிதர்கள் நிலவில் தரையிறங்கும் திட்டத்திற்கு தரையிறங்கும் அமைப்பை உருவாக்க ஜெஃப் பெசோஸுக்கு சொந்தமான விண்வெளி தொழில்நுட்ப நிறுவனமான ப்ளூ ஓரிஜின் நிறுவனத்தை நாசா தேர்வு செய்து ஒப்பந்தம் மேற்கொள்ளப்பட்டுள்ளது என அறிவித்துள்ளது.

3.4 பில்லியன் டாலர் மதிப்பில் நாசா- ப்ளூ ஓரிஜின் ஒப்பந்தம் மேற்கொண்டுள்ளது. அதன் மூலம் ப்ளூ ஓரிஜின் லேண்டரை வடிவமைத்து, மேம்படுத்தி, சோதனை செய்யும் மற்றும் சரிபார்க்கும் எனத் தெரிவிக்கப்பட்டுள்ளது. நாசா சந்திர சுற்றுப்பாதையில் ஏவ திட்டமிட்டுள்ள கேட்வே என்ற விண்வெளி நிலையத்துடன் இணைக்கப்படுவது உட்பட, சந்திர மேற்பரப்பில் விண்வெளி வீரர்களின் தொடர்ச்சியான பயணங்களுக்கான விண்வெளி ஏஜென்சியின் தேவைகளை லேண்டர் பூர்த்தி செய்ய வேண்டும்.

லேண்டரின் வடிவமைப்பு மற்றும் மேம்பாட்டைத் தவிர, நாசா வழங்கிய ஒப்பந்தத்தில், ஆர்ட்டெமிஸ் V மிஷனின் போது விண்வெளி வீரர்கள் லேண்டரைப் பயன்படுத்துவதற்கு முன்பு, மனிதர்கள் இல்லாத ஒரு செயல் விளக்க பணியையும் ப்ளூ ஓரிஜின் நிறுவனம் செய்து காட்ட வேண்டும் எனவும் ஒப்பந்தம் செய்யப்பட்டுள்ளது. ஆர்ட்டெமிஸ் V திட்டத்தை 2029-ல் செயல்படுத்த நாசா திட்டமிட்டுள்ளது.

ஆர்ட்டெமிஸ் V

நாசாவின் ஸ்பேஸ் லான்ச் சிஸ்டம் (எஸ்எல்எஸ்) ராக்கெட் மூலம் ஆர்ட்டெமிஸ் V திட்டத்தின் ஒரு பகுதியாக 4 விண்வெளி வீரர்கள் சந்திர சுற்றுப்பாதைக்கு அனுப்பபடுவர். ஆர்ட்டெமிஸ் 1 ​​பயணத்தின் போது விண்வெளி ஏவுதல் அமைப்புடன் சோதனை செய்யப்பட்ட ஓரியன் விண்கலத்தில் விண்வெளி வீரர்கள் ஏவப்படுவார்கள்.

ஓரியன் கேட்வே விண்வெளி நிலையத்துடன் இணைக்கப்படும். இது ஆர்ட்டெமிஸ் V பணி தொடங்கப்படுவதற்கு முன்பு சந்திர சுற்றுப்பாதையில் இருக்க வேண்டும். கேட்வேயுடன் ஓரியன் இணைக்கப்பட்ட பிறகு 2 விண்வெளி வீரர்கள் ப்ளூ ஓரிஜினின் மனித தரையிறங்கும் அமைப்புக்கு மாற்றப்படுவார்கள், அதில் அவர்கள் சந்திர தென் துருவத்திற்கு ஒரு வார பயணம் செல்வார்கள்.

ஸ்பேஸ்எக்ஸ் உடன் ஆர்ட்டெமிஸ் III

நாசா எலான் மஸ்க்கின் ஸ்பேஸ்எக்ஸ் நிறுவனத்துடன் ஆர்ட்டெமிஸ் III திட்டத்திற்கு ஒப்பந்தம் மேற்கொண்டுள்ளது. அந்த ஒப்பந்தத்தின் கீழ், ஸ்பேஸ்எக்ஸ் ஆர்ட்டெமிஸ் IV மிஷனில் லேண்டரை நிரூபிக்க அதன் வடிவமைப்பையும் உருவாக்க வேண்டும்.

ஆர்ட்டெமிஸ் III இன் போது, ​​நான்கு குழு உறுப்பினர்கள் SLS ராக்கெட்டில் சந்திர சுற்றுப்பாதைக்கு ஏவுவார்கள். அதன் பிறகு, இரண்டு குழு உறுப்பினர்கள் சந்திரனின் மேற்பரப்புக்கு ஒரு பயணத்திற்காக SpaceX மனித தரையிறங்கும் அமைப்புக்கு மாற்றப்படுவார்கள். அங்கு, அவர்கள் மீண்டும் சுற்றுப்பாதைக்கு ஒரு பயணத்திற்காக லேண்டரில் ஏறுவதற்கு முன்பு ஒரு வாரத்திற்கு மேற்பரப்பை ஆராய்வார்கள், அங்கு அவர்கள் மற்ற உறுப்பினர்களுடன் பூமிக்கு திரும்பும் பயணத்தில் சேருவார்கள்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“