ஐசிசி தரவரிசை: பும்ரா 4-வது இடம் பிடித்து அசத்தல்... கோலி தொடர்ந்து முதலிடம்!

பும்ரா ஒருநாள் போட்டி பந்துவீச்சாளர்கள் பட்டியலில் 4-வது இடத்திற்கு முன்னேற்றம்

இந்திய கிரிக்கெட் அணியின் வேகப்பந்து வீச்சாளர் பும்ரா ஒருநாள் போட்டி பந்துவீச்சாளர்கள் பட்டியலில் 4-வது இடத்திற்கு முன்னேறியுள்ளார். இந்திய அணி, இலங்கைக்கு சுற்றுப்பயணம் மேற்கொண்டு விளையாடிவருகிறது. நடந்து முடிந்த ஒருநாள் போட்டித் தொடரில் இந்திய அணி 5-0 என்ற கணக்கில் தொடரை வென்று அசத்தியது. இந்த தொடரில் சிறப்பான பந்துவீச்சை வெளிப்படுத்திய வேகப்பந்துவீச்சாளர் பும்ரா 15-விக்கெட்டுகளை வீழ்த்தி அமர்க்களப்படுத்தினார். அதோடு, தொடர் நாயகன் விருதையும் தட்டிச் சென்றார்.

ஒருநாள் போட்டி பந்துவீச்சாளர் தரவரிசை

  1. ஆஸ்திரேலிய வீரர் ஹேசில்வுட்(732)
  2. தென் ஆப்ரிக்க வீரர் இம்ரான் தாகீர் (718)
  3. ஆஸ்திரேலிய வீரர் மிட்ச்செல் ஸ்டார்க்(701)
  4. இந்திய வீரர் ஜஸ்பிரிட் பும்ரா(687)
  5. தென்ஆப்ரிக்க வீரர் கசிகோ ரபடா(685)

பும்ராவைத் தவிர்த்து மற்ற இந்திய வீரர்களும் பந்வீச்சு தரவரிசையில் முன்னேற்றம் கண்டுள்ளனர். அதன்படி, இந்திய அணியின் அக்‌ஷர் பட்டேல் 10-வது இடத்தை பிடித்துள்ளார். ஹர்த்திக் பாண்டியாக இரண்டு இடங்கள் முன்னேறி 61-வது இடத்திலும், குல்திப் யாதவ் 21 இடங்கள் முன்னேறி 89-வது இடத்திலும், சாஹல் 55 இடங்கள் முன்னேற்றம் கண்டு 99-வது இடத்திலும் உள்ளனர்.

ஒருநாள் போட்டி பேட்டிங் தரவரிசையைப் பொறுத்தவரையில் இந்திய அணி கேப்டன் விராட் கோலி தொடர்ந்து முதலிடம் வகிக்கிறார். இலங்கைக்கு அணிக்கு எதிராக ஒருநாள்போட்டித் தொடரில் சிறப்பாக விளையாடிய கோலி, 2 சதங்கள் மற்றும் ஒரு அரைசம் உட்பட 330 ரன்களை சேர்த்தார். இதன் மூலம் 887 புள்ளிகளுடன் முதலிடத்தில் கம்பீரமாக நீடிக்கிறார் விராட் கோலி. முன்னதாக கடந்த 1998-ம் ஆண்டு சச்சின் டெண்டுல்கர் 887 புள்ளிகள் பெற்றிருந்தார் என்பது குறிப்பிடத்தக்கது.

இதேபோல, பேட்டிங் தரவரிசையில் மற்ற இந்திய வீரர்களான ரோகித் சர்மா 9-வது இடத்திலும், மகேந்திர சிங் டோனி 11-வது இடத்திலும் உள்ளனர்.

இலங்கை அணி சந்தித்த படுதோல்வியினால், 2019-ம் ஆண்டு நடைபெறவுள்ள உலகக்கோப்பை போட்டியில் நேரடியாக பங்கேற்கும் வாய்ப்பை இழந்துள்ளது. நேரடியாக தகுதிபெற முடியாத அணிகள், உலக்கோப்பை தகுதி சுற்று போட்டியின் மூலம் பங்கேற்க முடியும் என்பது குறிப்பிடத்தக்கது.

Get all the Latest Tamil News and Tamil Nadu News at Indian Express Tamil. You can also catch all the latest Tamil Sports News by following us on Twitter and Facebook

The moderation of comments is automated and not cleared manually by tamil.indianexpress.com.
Just Now
X
×Close
×Close