மும்பை ஸ்டார் பவுலர் அவுட்: அவருக்குப் பதில் யார் தெரியுமா?

10 அணிகள் பங்கேற்றுள்ள இந்தியன் பிரீமியர் லீக் (ஐ.பி.எல். 2025) டி20 தொடரின் 18-வது சீசன் மார்ச் 22 ஆம் தேதி முதல் பரபரப்பாக அரங்கேறி வருகிறது. இந்நிலையில், இந்த தொடரில் இன்று வியாழக்கிழமை  இரவு 7:30 மணிக்கு ஜெய்ப்பூரில் உள்ள சவாய் மான்சிங் ஸ்டேடியத்தில் நடைபெறும் 50-வது லீக் போட்டியில் ராஜஸ்தான் ராயல்ஸ் - மும்பை இந்தியன்ஸ் அணிகள் மோதுகின்றன. இதற்காக இரு அணிகளும் தீவிரமாக தயாராகி வருகின்றன. 

இந்நிலையில், நடப்பு தொடரில்  இருந்து மும்பை அணியின் நட்சத்திர பவுலரான விக்னேஷ் புத்தூர் விலகியுள்ளார். அவரின் இரண்டு தாடை எலும்புகளிலும் வலி இருப்பதாகவும், அதனால் அவர் இந்த சீசனில் இருந்து விலகி இருப்பதாயும் மும்பை அணி நிர்வாகம்  தெரிவித்துள்ளது.  

"மும்பை இந்தியன்ஸ் மருத்துவம் மற்றும் அறிவியல் மற்றும் தொழில்நுட்பக் குழுவுடன் இணைந்து தனது மீட்பு மற்றும் மறுவாழ்வில் கவனம் செலுத்த விக்னேஷ் தொடர்ந்து அணியுடன் இருப்பார்" என்று மும்பை இந்தியன்ஸ் அதன் அறிக்கையில் தெரிவித்துள்ளது.

விக்னேஷ் புத்தூர் இந்த சீசனில் அறிமுகமான நிலையில், தனது தொடக்க சீசனிலேயே முத்திரையைப் பதித்தார். சென்னை சூப்பர் கிங்ஸ் அணிக்கு எதிராக தொடக்கப் போட்டியில் அவர் மூன்று விக்கெட்டுகளை வீழ்த்தி தனது மிரட்டலான ஐ.பி.எல் அறிமுகத்தை கிரிக்கெட் உலகிற்கு அறிவித்தார். இந்த சீசனில் அவர் ஐந்து ஆட்டங்களில் இருந்து 9.08 என்ற எகானமி ரேட்டில் ஆறு விக்கெட்டுகளை வீழ்த்தி அசத்தி இருக்கிறார். 

விக்னேஷ் புத்தூர் விலகி இருக்கும் நிலையில், அவருக்குப் பதிலாக களமிறங்கும் வீரரை அறிவித்துள்ளது. அதன்படி, லெக் ஸ்பின்னர் ரகு சர்மா மும்பை அணிக்காக மீதமுள்ள போட்டிக்காக சேர்க்கப்பட்டுள்ளார். 

யார் இந்த ரகு சர்மா? 

ரகு சர்மா, மார்ச் 1993 இல் பஞ்சாபின் ஜலந்தரில் பிறந்தவர்.  வலது கை லெக் பிரேக் பந்து வீச்சாளரான இவர் உள்நாட்டு கிரிக்கெட்டில் பஞ்சாப் மற்றும் புதுச்சேரி அணிக்காக விளையாடியுள்ளார். 11 முதல் தர போட்டிகளில், அவர் 19.59 சராசரியில் 57 விக்கெட்டுகளை வீழ்த்தியுள்ளார், சிறந்த பந்துவீச்சு புள்ளிவிவரங்கள் 7/56 ஆகும். 

லிஸ்ட் ஏ கிரிக்கெட்டில்,  ரகு சர்மா ஒன்பது போட்டிகளில் 14 விக்கெட்டுகளை வீழ்த்தியுள்ளார், சிறந்த புள்ளிவிவரங்கள் 4/37 ஆகும். அவர் 3 டி20 போட்டிகளிலும் பங்கேற்று மூன்று விக்கெட்டுகளை வீழ்த்தியுள்ளார். தற்போது அவர் ஐ.பி.எல்-லில் முதல் முறையாக பங்கேற்கிறார். 

ரகு மும்பை இந்தியன்ஸ் அணியின் துணை பந்து வீச்சாளர்களில் ஒருவராக இருந்தார், இப்போது முக்கிய அணிக்கு மாறிவிட்டார்.அவரின் அடிப்படை விலை ரூ. 20 லட்சம் என்பதால், அந்த விலைக்கே மும்பை அணி நிர்வாகம் அவரை வாங்கியுள்ளது. 

ஐ.பி.எல் 2025 புள்ளிப்பட்டியலில் ஒரு கட்டத்தில் 9வது இடத்தில் இருந்த மும்பை இந்தியன்ஸ் அணி, தங்கள் சீசனை அற்புதமாக மாற்றியுள்ளது. மும்பை அணி தனது முதல் ஐந்து ஆட்டங்களில் ஒரு வெற்றியை மட்டுமே பெற்றது. ஆனால் அதன் பின்னர், அவர்கள் தங்கள் ஐந்து எதிரணிகளை தோற்கடித்துள்ளனர். 

கடந்த வியாழக்கிழமை ராஜஸ்தான் ராயல்ஸுக்கு எதிரான மோதலில், மும்பை 12 புள்ளிகளுடன் மூன்றாவது இடத்தில் உள்ளது. இதற்கிடையில், ராஜஸ்தான் ராயல்ஸ் அணி 10 ஆட்டங்களில் இருந்து ஆறு புள்ளிகளுடன் 8வது இடத்தில் உள்ளது குறிப்பிடத்தக்கது.