உலகக் கோப்பை கிரிக்கெட்: டிக்கெட் விற்பனை எப்போது? எப்படி பெறலாம்?

13-வது ஒருநாள் (50 ஓவர்) உலகக் கோப்பை கிரிக்கெட் போட்டி இந்தியாவில் அக்டோபர் 5 ஆம் தேதி முதல் நடைபெற உள்ளது. நவம்பர் 19 ஆம் தேதி வரை நடைபெற உள்ள இந்த தொடரில் இந்தியா, நடப்பு சாம்பியன் இங்கிலாந்து, ஆஸ்திரேலியா, பாகிஸ்தான் உள்பட 10 அணிகள் பங்கேற்க உள்ளன. இதற்காக நாட்டின் 12 நகரங்களில் உள்ள மைதானங்கள் தீவிரமாக தயாராகி வருகிறது.

இந்த தொடருக்கான தொடக்க ஆட்டத்தில் இங்கிலாந்து – நியூசிலாந்து அணிகள் அகமதாபாத்தில் மோத உள்ளன. இந்திய அணி தனது தொடக்க ஆட்டத்தில் ஆஸ்திரேலியாவை சென்னையில் அக்டோபர் 8 ஆம் தேதி அன்று சந்திக்கிறது. கிரிக்கெட் ரசிகர்களால் பெரிதும் எதிர்பார்க்கப்படும் இந்தியா – பாகிஸ்தான் அணிகள் மோதும் லீக் ஆட்டம் அக்டோபர் 15ம் தேதி ஞாயிற்றுக்கிழமை அகமதாபாத்தில் உள்ள நரேந்திர மோடி ஸ்டேடியத்தில் நடைபெறும் என அறிவிக்கப்பட்டது.

ஆனால், அக்டோபர் 15ம் தேதி நவராத்திரி கொண்டாட்டத்தின் முதல் நாள் என்பதால் பாதுகாப்பு காரணங்களுக்காக போட்டியின் தேதியை மாற்ற வேண்டும் என கோரிக்கை எழுந்தது. இதன்படி, மொத்தம் 9 ஆட்டங்களின் தேதி மற்றும் நேரங்களில் மாற்றம் செய்து திருத்தப்பட்ட புதிய போட்டி அட்டவணையை சர்வதேச கிரிக்கெட் கவுன்சில் (ஐ.சி.சி.) நேற்று வெளியிட்டது. ஆனால் இடங்களில் எந்த மாற்றமும் செய்யப்படவில்லை.

இந்த திருத்தப்பட்ட புதிய போட்டி அட்டவணையின் படி, கிரிக்கெட்டில் பரம எதிரிகளான இந்தியா- பாகிஸ்தான் அணிகள் இடையிலான போட்டி அக்டோபர் 15ம் தேதிக்குப் பதிலாக அக்டோபர் 14ம் தேதி சனிக்கிழமை அதே அகமதாபாத்தில் உள்ள நரேந்திர மோடி ஸ்டேடியத்தில் நடைபெறுகிறது.

டிக்கெட் விற்பனை

இந்நிலையில், ஒருநாள் உலகக் கோப்பையின் திருத்தப்பட்ட அட்டவணையுடன், டிக்கெட் விற்பனைக்கான தேதியையும் சர்வதேச கிரிக்கெட் கவுன்சில் (ஐ.சி.சி) அறிவித்துள்ளது. இதன்படி, உலகக் கோப்பை கிரிக்கெட் திருவிழாவுக்கான ஆன்லைன் டிக்கெட் விற்பனை வருகிற 25-ம் தேதி தொடங்குகிறது. அன்று இந்திய அணி அல்லாத மற்ற ஆட்டங்கள் மற்றும் பயிற்சி ஆட்டத்திற்கான டிக்கெட் விற்பனை செய்யப்படுகிறது.

இந்திய அணி மோதும் போட்டிக்குரிய டிக்கெட்டுகள் வருகிற 30ம் தேதி முதல் செப்டம்பர் 3ம் தேதி வரை கிடைக்கும். நாக் அவுட் போட்டிகளுக்கான கடைசி டிக்கெட்டுகள் செப்டம்பர் 5 ஆம் தேதி முதல் கிடைக்கும்.

டிக்கெட் விற்பனை எப்போது தொடங்கும்?

டிக்கெட்டுகளுக்கான அவசரத்தை சமாளிக்க, டிக்கெட்டுகளின் விற்பனை வெவ்வேறு கட்டங்களில் நடைபெறும். ஆகஸ்ட் 25 முதல், இந்தியாவைத் தவிர மற்ற அனைத்து அணிகளின் பயிற்சி ஆட்டத்திற்கான (வார்ம்-அப்) விற்பனை தொடங்கும். ஆகஸ்ட் 30 முதல், கவுகாத்தி மற்றும் திருவனந்தபுரத்தில் இந்தியாவின் பயிற்சி விளையாட்டுகளுக்கான டிக்கெட்டுகளை வாங்கலாம்.

ஒரு நாள் கழித்து, சென்னையில் (ஆஸ்திரேலியாவுக்கு எதிராக, அக்டோபர் 8), டெல்லியில் ( ஆப்கானிஸ்தானுக்கு எதிராக, அக்டோபர் 11) மற்றும் புனேவில் (வங்கதேச அணிக்கு எதிராக, அக்டோபர் 19) இந்திய அணியின் போட்டிக்கான டிக்கெட்டுகள் விற்பனை தொடங்கும். செப்டம்பர் 1 முதல், ரசிகர்கள் தரம்சாலாவில் (நியூசிலாந்துக்கு எதிராக, அக்டோபர் 22), லக்னோ (இங்கிலாந்துக்கு எதிராக, அக்டோபர் 29) மற்றும் மும்பையில் (இலங்கைக்கு எதிராக, நவம்பர் 2) இந்தியாவின் போட்டிக்கான டிக்கெட்டுகளை பெறலாம். செப்டம்பர் 2 ஆம் தேதி, கொல்கத்தா (தென் ஆப்பிரிக்காவுக்கு எதிராக, நவம்பர் 5) மற்றும் பெங்களூரு (எதிர்சென்ற நெதர்லாந்து, நவம்பர் 12) இந்தியாவின் டிக்கெட் விற்பனை தொடங்கும்.

இறுதியாக, செப்டம்பர் 3 ஆம் தேதி, அக்டோபர் 14 ஆம் தேதி அகமதாபாத்தில் நடைபெறும் இந்தியா மற்றும் பாகிஸ்தானுக்கு எதிரான அதிகம் எதிர்பார்க்கப்படும் ஆட்டத்திற்கான டிக்கெட்டுகள் விற்கப்படும். அரையிறுதி மற்றும் இறுதிப் போட்டிகளுக்கான போட்டிகள் செப்டம்பர் 15ஆம் தேதி தொடங்கும்.

ரசிகர்கள் எப்படி தயாராக இருக்க வேண்டும்?

கிரிக்கெட் ரசிகர்கள் உலகக் கோப்பை கிரிக்கெட் இணையதளத்தில் வருகிற 15ம் தேதி முதல் தங்கள் பெயரை பதிவு செய்து கொண்டால், அவர்களுக்கு டிக்கெட் விற்பனை தொடர்பான தகவல்கள் முதலிலேயே தெரிவிக்கப்படும். இது அவர்களுக்கு டிக்கெட் கிடைக்க கூடுதல் வாய்ப்பாக இருக்கும் என்று ஐ.சி.சி. தெரிவித்துள்ளது. என்ற இணைய பக்கத்தில் https://www.cricketworldcup.com/register பதிவு செய்யலாம்.

டிக்கெட்களை எங்கே பெறலாம்?

பிசிசிஐ மற்றும் ஐசிசி ஆகியவை தங்களது டிக்கெட் பார்ட்னர் குறித்து உறுதிப்படுத்தவில்லை. ஆனால் இந்திய வாரியம் டிக்கெட் விநியோகத்தை புக்மைஷோ-க்கு (bookmyshow - bookmyshow.com) ஒப்படைக்கலாம் என்று தெரிகிறது.

முன்பதிவு செய்த டிக்கெட்டுகளை எப்படி பெறுவது?

ஒரு டிக்கெட்டை முன்பதிவு செய்தவுடன், ரசிகர்கள் அதை கூரியர் மூலம் பெற அல்லது நியமிக்கப்பட்ட இடத்தில் இருந்து பெற விருப்பம் வழங்கப்படுகிறது. கூரியர் வசதி மூலம் டிக்கெட் எடுக்க விரும்புவோர் ரூ.140 கூடுதலாக செலுத்த வேண்டும். ஆனால், அது இந்தியாவிற்குள் மட்டுமே கிடைக்கும். திட்டமிடப்பட்ட விளையாட்டுக்கு 72 மணிநேரத்திற்கு முன் டிக்கெட் வாங்குபவர்களுக்கு கூரியர் விருப்பங்கள் பொருந்தும். இ-டிக்கெட்டுகளுக்கு கிடைக்காது

மழை பெய்தால் ரிசர்வ் நாட்கள் இருக்குமா?

லீக் ஆட்டங்களுக்கு ரிசர்வ் நாள் கிடையாது. ஆனால் மூன்று நாக் அவுட் ஆட்டங்களுக்கும் ரிசர்வ் நாள் உள்ளது.

தமிழ்  இந்தியன்  எக்ஸ்பிரஸின்  அனைத்து செய்திகளையும் உடனுக்குடன்  டெலிகிராம்  ஆப்பில்  பெற https://t.me/ietamil