65 வயசு ஆச்சா? ரேஷன் சலுகையில் முக்கிய மாற்றம்; நீங்களும் இனி கடைக்கு போக வேண்டாம்

முதியோர்களுக்கு ஒரு பெரும் நிவாரணம் அளிக்கும் வகையில், பொது விநியோகத் திட்டத்தின் (PDS) கீழ் அத்தியாவசியப் பொருட்களை வீட்டிற்கே வந்து வழங்கும் திட்டத்திற்கான வயது வரம்பை தமிழ்நாடு அரசு 70 வயதில் இருந்து 65 ஆகக் குறைத்துள்ளது.

இது குறித்து கூட்டுறவுத் துறை அதிகாரிகள் அளித்த தகவலின்படி, நியாய விலைக் கடைகளுக்குச் செல்ல சிரமப்படும் 65 வயது மற்றும் அதற்கு மேற்பட்டவர்களுக்கும் இத்திட்டத்தின் பலனை நீட்டிக்க வேண்டும் என்று பொதுமக்களிடமிருந்து வந்த அதிகப்படியான கோரிக்கைகளின் அடிப்படையில் இந்தக் முடிவு எடுக்கப்பட்டுள்ளது.

ஒவ்வொரு மாதமும் முதல் வார இறுதியில் டெலிவரி

திருத்தப்பட்ட அட்டவணையின் ஒரு பகுதியாக, ரேஷன் பொருட்களை ஒவ்வொரு மாதமும் இரண்டாவது வாரத்திற்குப் பதிலாக, முதல் வாரத்தில் — குறிப்பாக சனி மற்றும் ஞாயிற்றுக்கிழமைகளில் — தகுதியுள்ள பயனாளிகளுக்கு வழங்கவும் துறை முடிவு செய்துள்ளது. இந்த ஆண்டு நவம்பர் மாதம் முதல், நவம்பர் 3 மற்றும் 4 ஆகிய தேதிகளில் வீட்டு விநியோகங்கள் செய்யப்படும். 

அதைத் தொடர்ந்து வரும் மாதங்களிலும் இதே நடைமுறை பின்பற்றப்படும். இந்த மாற்றம், திட்டத்தின் செயல்திறனை மேம்படுத்தவும், முதியோர் மற்றும் மாற்றுத்திறனாளி அட்டைதாரர்களுக்குப் பொருட்களை சரியான நேரத்தில் வழங்குவதை உறுதி செய்யவும் நோக்கமாகக் கொண்டுள்ளது என்று அதிகாரிகள் தெரிவித்தனர். முன்னதாக ஏற்பட்ட தாமதங்கள் மற்றும் சவால்கள் பல காரணமாக பல பயனாளிகள் வீட்டு விநியோகத்தைத் தேர்வு செய்யத் தயங்க வைத்தன என்றும் அவர்கள் மேலும் தெரிவித்தனர்.

பயனாளிகளின் எண்ணிக்கை அதிகரிப்பு

70 வயதுக்கு மேற்பட்ட முதியோர்கள் மற்றும் மாற்றுத்திறனாளிகளுக்கு உதவுவதற்காகத் தொடங்கப்பட்ட இந்த வீட்டு விநியோகத் திட்டம், முதலில் 20.42 லட்சம் முதியோர்கள் மற்றும் 1.27 லட்சம் மாற்றுத்திறனாளிகளை உள்ளடக்கியது. ஆனால், பட்டியலில் இருந்தவர்களில் சுமார் 8 சதவிகிதம் பேர் இறந்துவிட்டதாகக் கண்டறியப்பட்டதால், தரவுத்தளத்தை மாற்றி அமைக்க வேண்டிய நிலை ஏற்பட்டது. தற்போது வயது வரம்பு 65 ஆகக் குறைக்கப்பட்டிருப்பதால், புதுப்பிக்கப்பட்ட பட்டியலில் அதிகப் பயனாளிகள் சேர்க்கப்படுவார்கள், 

இதில் தவறுதலாக விடுபட்டவர்களும் அடங்குவர். இறுதிப் பட்டியல் இன்னும் சில மாதங்களில் தயாராகிவிடும். சமீப மாதங்களில் இந்தத் திட்டத்திற்குப் பெரிய அளவில் வரவேற்பு இல்லாததற்குக் கிடங்குகளில் ஏற்பட்ட தாமதங்கள் மற்றும் பயனாளிகள் மற்ற மாவட்டங்களுக்குக் குடிபெயர்ந்தது உள்ளிட்ட பல காரணங்கள் இருந்ததாக என்று மூத்த துறை அதிகாரி ஒருவர் கூறினார். 
அரசின் நோக்கம்

அத்தியாவசியப் பொருட்களான அரிசி, சர்க்கரை, கோதுமை, மண்ணெண்ணெய் போன்றவற்றை ரேஷன் கடைகளுக்கு நேரில் வர முடியாத முதிய குடிமக்களுக்கும் மாற்றுத்திறனாளிகளுக்கும் வீட்டிற்கே சென்று வழங்குவதே பி.டி.எஸ் (PDS) வீட்டு விநியோகத் திட்டத்தின் முக்கிய நோக்கமாகும். புதிய விநியோக அட்டவணை மற்றும் தகுதிக்கான வரையறையை விரிவுபடுத்தியதன் மூலம், இந்தக் கவலைகளைச் சரிசெய்து, திட்டத்தில் பங்கேற்பை அதிகரிக்க முடியும் என்று அரசு நம்புகிறது. 

இந்தச் சமீபத்திய திருத்தத்தின் மூலம், தமிழ்நாடு முழுவதும் ஆயிரக்கணக்கான கூடுதல் பயனாளிகள் இத்திட்டத்தின் மூலம் பலன் பெறுவார்கள் என்று எதிர்பார்க்கப்படுகிறது.