தி.மு.க-வை வீழ்த்த எந்த அஸ்திரத்தையும் பயன்படுத்துவோம்; விஜய் உள்பட..!: அ.தி.மு.க திடீர் அறிவிப்பு

திமுக ஆட்சியை வீழ்த்த, விஜய் உட்பட அனைத்து வியூகங்களையும் அஸ்திரங்களையும் பயன்படுத்த அதிமுக தயாராக இருப்பதாக, முன்னாள் அமைச்சர் ராஜேந்திர பாலாஜி அறிவித்துள்ளார்.

ராஜபாளையத்தில் நடைபெற்ற அதிமுக பூத் கமிட்டி நிர்வாகிகள் பயிற்சி முகாமில் செய்தியாளர்களைச் சந்தித்த அவர் பேசியதாவது:

”திமுகவை வீழ்த்திடும் வகையில், உள்நாட்டில் இருக்கின்ற அத்தனை அஸ்திரங்களையும் அதிமுக உபயோகிக்கும். எங்களுடைய பொதுச் செயலாளர் (எடப்பாடி பழனிசாமி) இதற்கான கூட்டணிகளை அமைப்பார். அதற்காக திமுகவை எதிர்க்கின்ற கட்சிகள் எல்லோருடனும் பேசுவார்கள்.

விஜய் திமுகவைத்தான் கடுமையாக எதிர்த்திருக்கிறார். திமுக ஆட்சியே வீட்டுக்கு அனுப்ப வேண்டும் என்ற கருத்தைத்தான் மையப்படுத்தி அவர் பேசியிருக்கிறார். ஆகவே, எல்லோரையும் நாங்கள் அழைப்போம். திமுகவைத் தோற்கடிக்க, திமுகவை வீட்டுக்கு அனுப்ப எல்லா அஸ்திரங்களையும் அதிமுக பயன்படுத்தும். எங்களுடைய பொதுச் செயலாளர் பயன்படுத்துவார், நாங்களும் பயன்படுத்துவோம்.

அரசு கூட்டங்களுக்கு பாதுகாப்பு அளிக்க வேண்டும்:

தொடர்ந்து, அரசு அரசியல் கூட்டங்களுக்கு அனுமதி மறுப்பது குறித்துப் பேசிய அவர்:

நீதிமன்றத் தீர்ப்பை காரணம் காட்டி அரசு நடவடிக்கைகளில் தப்பித்துக்கொள்ளக் கூடாது. அரசுதான் பொதுக்கூட்டம் எத்தனை பேர் கூடினாலும், எவ்வளவு ஆயிரம் பேர் கூடினாலும் அவர்களுக்குப் பாதுகாப்பு கொடுக்க வேண்டிய கடமை முதலமைச்சர் ஸ்டாலினுக்கும், திமுக அரசுக்கும் உண்டு.

அதை விடுத்து, அவர்கள் தப்பித்துக்கொள்வதற்கு நீதிமன்றத்தின் தீர்ப்பைச் சொல்லி, அதைக் காரணம் காட்டி அனுமதி மறுப்பது, தேமுதிகவுக்கு அனுமதி மறுப்பது, அண்ணா திமுகவுக்கு அனுமதியை மறுப்பது, நிபந்தனைகளைக் கடுமையாக்குவது போன்ற நடவடிக்கைகள் தவறான ஒரு முன்உதாரணத்தை தமிழ்நாட்டில் திமுக செய்கிறது” என்றார்.