கன்னியாகுமரி கடலில் மேல் அடுக்கு சுழற்சி: மேற்கு மாவட்டங்கள் உஷார்; சென்னைக்கு மழை எப்படி?

குமரி கடல் (கன்னியாகுமரி கடல்) பகுதியில் நிலவி வந்த வளிமண்டல மேலடுக்கு சுழற்சி (Upper Air Circulation - UAC) அடுத்த சில நாட்களில் வலுப்பெற்று, காற்றழுத்த தாழ்வுப் பகுதியாகவும், பின்னர் தாழ்வு மண்டலமாகவும் மாறி அரபிக் கடலுக்குள் நகர்ந்து, இந்திய கடற்பரப்பில் இருந்து விலகிச் செல்ல வாய்ப்புள்ளது. இந்த வானிலை மாற்றத்தின் காரணமாக, தமிழகத்தின் பெரும்பாலான மாவட்டங்களில் பரவலான மழைப்பொழிவு இருக்கும் என எதிர்பார்க்கப்படுகிறது. இதுகுறித்து தமிழ்நாடு வெதர்மேன் பிரதீப் ஜான் தனது ஃபேஸ்புக் பக்கத்தில் பதிவிட்டுள்ளார்.

மேற்கு மாவட்டங்களில் நல்ல மழைக்கு வாய்ப்பு:

பொதுவாக மழை மறைவுப் பகுதிகளாக கருதப்படும் மேற்கு மாவட்டங்களான கோயம்புத்தூர், திருப்பூர், ஈரோடு, கிருஷ்ணகிரி போன்ற மாவட்டங்களிலும் அடுத்த மூன்று நாட்களுக்குள் குறைந்தது ஒரு நாளாவது நல்ல மழை பெய்யக்கூடும் எனத் தெரிவிக்கப்பட்டுள்ளது. எனவே, இந்த மாவட்டங்களில் உள்ள பொதுமக்கள் மற்றும் விவசாயிகள் சற்று உஷாராக இருக்க அறிவுறுத்தப்படுகிறார்கள்.

சென்னை மற்றும் அதனைச் சுற்றியுள்ள பகுதிகளில் இன்று இரவு முதல் மழைப்பொழிவு அதிகரிக்கும். இந்த காலகட்டத்தில், காற்றழுத்த தாழ்வு மண்டலத்தின் "இழுவை விளைவு (pull effect)" காரணமாக, இரவு மற்றும் அதிகாலை நேரங்களில் மழை தீவிரமடைய வாய்ப்புள்ளது. சூரியன் வெளிவந்த பிறகு, மழைப் பொழிவு தனித்து காணப்படும் அல்லது குறையும். ஆனால், இரவு முதல் அதிகாலை வரையிலான நேரம் கடலோரப் பகுதிகளில் மழைக்கான உச்ச நேரமாக இருக்கும்.

மீனவர்களுக்கு எச்சரிக்கை:

அரபிக் கடலில் இந்த அமைப்பு வலுப்பெறுவதால், இன்று (அக்டோபர் 17) முதல் குமரி கடல், மாலத்தீவு கடல் மற்றும் லட்சத்தீவு பகுதிகளில் கடல் கொந்தளிப்புடன் காணப்படுவதுடன், பலத்த காற்று வீசக்கூடும். எனவே, மீனவர்கள் இந்திய வானிலை ஆய்வு மையத்தின் (IMD) அறிவிப்புகளைப் பின்பற்றி, கடலுக்குச் செல்ல வேண்டாம் என்று எச்சரிக்கப்படுகிறார்கள்.

குறிப்பாக குமரி கடல் பகுதியில் நிலவி வந்த வளிமண்டல மேலடுக்கு சுழற்சி அடுத்த சில நாட்களில் வலுப்பெற்று, காற்றழுத்த தாழ்வுப் பகுதியாகவும், பின்னர் தாழ்வு மண்டலமாகவும் மாறி அரபிக் கடலுக்குள் நகர்ந்து, இந்திய கடற்பரப்பில் இருந்து விலகிச் செல்ல வாய்ப்புள்ளதால் தமிழகத்தின் பெரும்பாலான மாவட்டங்களில் பரவலான மழைப்பொழிவு இருக்கும் என எதிர்பார்க்கப்படுகிறது.