நாய், பூனை வளர்க்க உரிமம் பெறாவிட்டால் ரூ.5000 அபராதம்: சென்னை மாநகராட்சி அதிரடி

நவம்பர் 24-ஆம் தேதி முதல், உரிமம் பெறாத செல்லப் பிராணிகளை வைத்திருப்பவர்கள் ரூ5,000 அபராதம் செலுத்த வேண்டும் என்று பெருநகர சென்னை மாநகராட்சி (GCC) கவுன்சில் தீர்மானங்களை நிறைவேற்றியுள்ளது. கூடுதலாக, காலர் அணியாத நாய்களை பொது இடங்களுக்கு அழைத்துச் செல்பவர்களுக்கு ரூ500 அபராதம் விதிக்கப்படும் என்றும் கூறப்பட்டுள்ளது.

தற்போது கூறப்பட்டுள்ள புதிய விதிகளின் ஒரு பகுதியாக, அனைத்து செல்லப் பிராணிகளுக்கும் மைக்ரோ-சிப்பிங் மற்றும் ஆண்டுதோறும் ரேபிஸ் தடுப்பூசி போடுவது கட்டாயமாக்கப்பட்டுள்ளது. இந்தச் சேவைகள் அக்டோபர் 8, 2025 முதல், புளியந்தோப்பு மற்றும் லாய்ட்ஸ் காலனி உட்பட, ஆறு பெருநகர சென்னை மாநகராட்சி (GCC) செல்லப் பிராணிகள் சிகிச்சை மையங்களில் இலவசமாக வழங்கப்படும்.

நகர்ப்புற உள்ளாட்சி அமைப்புகள் சட்டம், 1998 (விதிகள் 2023)-இன் படி, செல்லப் பிராணிகளுக்கு உரிமம் பெறுவது கட்டாயமாக்கப்பட்டுள்ளது என்று தீர்மானம் கூறியுள்ளது. மேலும் செல்லப் பிராணி உரிமையாளர்கள் தங்கள் செல்லப் பிராணியின் விவரங்கள் மற்றும் புகைப்படங்களை ஆன்லைனில் சமர்ப்பித்து, உரிமம் பெற ரூ50 கட்டணம் செலுத்த வேண்டும். இந்த விதிகள் செயல்படுத்தப்படுவதை உறுதிசெய்ய, நவம்பர் 24-ஆம் தேதி முதல் வீடு வீடாகச் சென்று ஆய்வு செய்யும் பணி தொடங்கும் என்றும், அபராதங்கள் மாநகராட்சி ஊழியர்களால் வசூலிக்கப்படும் என்றும் தீர்மானத்தில் தெரிவிக்கப்பட்டுள்ளது.

மாநகராட்சி அடுத்த 5 ஆண்டுகளுக்கு செல்லப் பிராணிகளின் பதிவுகளைப் பராமரிக்க, தடுப்பூசிகளைக் கண்காணிக்க மற்றும் அபராதங்களை நிர்வகிக்க ஒரு டிஜிட்டல் தளத்தை உருவாக்கி வருகிறது. பெருநகர சென்னை மாநகராட்சியின் மைக்ரோ-சிப்பிங் முயற்சி, நகர் முழுவதும் செல்லப் பிராணிகளின் உரிமையைக் கண்காணிக்க 2,00,000 மைக்ரோசிப்கள் மற்றும் 80 ரேடியோ-அதிர்வெண் அடையாளம் (RFID) ரீடர்களை வாங்குவதையும் உள்ளடக்கியது.

செல்லப் பிராணி உரிமையாளர்களுக்கான விரிவான, எளிதில் அணுகக்கூடிய தரவுத்தளத்தை உருவாக்குவதும், உரிமங்கள் மற்றும் தடுப்பூசிகளை நிர்வகிப்பதற்கான ஒரு திறமையான அமைப்பை உறுதிசெய்வதும் இதன் நோக்கமாகும். களப் பணிகளை எளிதாக்க மற்றும் செல்லப் பிராணி பராமரிப்பு குறித்த பொதுமக்களின் விழிப்புணர்வை மேம்படுத்த நாய்களைப் பிடிப்பவர்களுக்கான மொபைல் செயலி மற்றும் செல்லப் பிராணி உரிமத்திற்கான போர்ட்டல் ஆகியவையும் உருவாக்கப்படும் என்று பெருநகர சென்னை மாநகராட்சி தெரிவித்துள்ளது.