ஒரு வாத்து... அதன் குஞ்சுகள்... ஸ்தம்பித்துப் போன பெர்த் நகரம்! நடந்தது என்ன?

சாலை விதிகள் விலங்குகளுக்கு இல்லை! ஆச்சரியப்பட வைத்த சம்பவம்

ஆஸ்திரேலியாவில் உள்ள பெர்த் நகரின் முக்கியச் சாலைகளில் ஒன்று 'குவிநானா சாலை' (Kwinana Freeway). வாகனங்கள் படுவேகமாக, போட்டி போட்டுக்கொண்டு சீறிப் பாய்ந்து செல்லும் பரபரப்பான பகுதி அது. ஆனால், ஒரு நாள் காலை அந்தச் சாலை திடீரெனச் ஸ்தம்பித்தது. 

ஒரு வாத்தும் அதன் குஞ்சுகளும்!

அன்றைய தினம் காலையில், ஒரு தாய் வாத்து தனது குஞ்சுகளின் கூட்டத்துடன் அந்த விரைவுச் சாலையைக் கடக்க முயற்சித்தது. குட்டிக்குஞ்சுகள் மெதுவாக, தள்ளாடித் தள்ளாடிச் சாலையின் நடுவே சென்றுகொண்டிருக்க, வாகன ஓட்டிகள் அதிர்ச்சியில் உறைந்தனர்.

என்ன செய்வது என்று தெரியாமல், ஒரு வாத்துக் குடும்பத்திற்காகப் பல நூறு வாகனங்கள் வரிசையாக அணிவகுத்து நின்றன! யாரும் ஹாரன் அடிக்கவில்லை, அவசரப்படுத்தவில்லை. பொறுமையாகக் காத்திருந்தனர். வாத்துக் குடும்பம் ஒரு வழியாகச் சாலையைக் கடந்து பத்திரமாக மறுபக்கம் செல்லும் வரை, அந்தப் பரபரப்பான சாலையில் வாகனங்களின் இயக்கம் முற்றிலுமாக நிறுத்தப்பட்டது.

Traffic came to a standstill on a busy Western Australian motorway as a flock of ducks wandered across, causing drivers to slow down and wait for them to pass safely pic.twitter.com/ymzTVNyYUe

— TRT World (@trtworld) October 11, 2025

 விபத்தும், குழப்பமும்!

வாத்துக் குடும்பம் பத்திரமாகப் போனதைக் கொண்டாடுவதற்குள், எதிர்பாராத ஒரு விபத்து நடந்தது. இந்தச் சம்பவத்தைக் கவனிக்காமல், வேகமாக வந்த ஆறு கார்கள் அடுத்தடுத்து ஒன்றோடு ஒன்று மோதி விபத்தில் சிக்கின. நல்லவேளையாகப் பெரிய பாதிப்புகள் எதுவும் ஏற்படவில்லை என்று செய்திகள் தெரிவிக்கின்றன.

ஆனால், இது அன்றோடு முடியவில்லை! அடுத்த நாள் காலையிலும், அதே வாத்துக் குஞ்சுகள் அதே சாலையைக் கடந்து சென்றன! 

போக்குவரத்துத் துறையின் அவசர எச்சரிக்கை!

இந்தச் சம்பவங்கள் ஆஸ்திரேலியாவின் போக்குவரத்து நிர்வாகத்தை யோசிக்க வைத்தது. இதையடுத்து, மேற்கு ஆஸ்திரேலியாவின் வாகனப் போக்குவரத்துக் கழகம் தனது 'எக்ஸ்' பக்கத்தில், இந்த வீடியோவைப் பதிவிட்டு ஒரு முக்கியச் செய்தியை வெளியிட்டது.

"வாகன ஓட்டிகளே, நீங்கள் மிகக் கவனத்துடனும், எச்சரிக்கையுடனும் இருக்க வேண்டும்! வாத்துகள், வாத்துக் குஞ்சுகள் அல்லது வேறு ஏதேனும் வனவிலங்குகள் சாலையைக் கடக்க முற்பட்டால்... நீங்கள் உங்கள் காருக்குள்ளேயே இருங்கள். வாகனத்தில் இருந்து வெளியேற வேண்டாம்! உதவிக்கு உடனடியாகத் தொலைபேசி வழியே அழையுங்கள்."

விபத்தைத் தவிர்ப்பது மற்றும் வனவிலங்குகளுக்கு உதவுவது ஆகிய இரண்டு நோக்கங்களுக்காகவும் இந்த அறிவுரை வழங்கப்பட்டுள்ளது. ஒரு வாத்துக் குடும்பத்தின் சாகசம், பரபரப்பான நகரத்தின் ஓட்டத்தை நிறுத்தியதோடு மட்டுமல்லாமல், வனவிலங்குகள் சாலைகளைக் கடக்கும்போது கடைப்பிடிக்க வேண்டிய பாதுகாப்பு விதிகள் பற்றிய ஒரு விழிப்புணர்வையும் ஏற்படுத்தியுள்ளது!

(வனவிலங்குகளுக்காக வாகனங்கள் காத்திருக்கும் இந்த வைரல் வீடியோ, மனிதர்களுக்கும் விலங்குகளுக்கும் இடையேயான இணக்கமான வாழ்க்கையின் அவசியத்தை உணர்த்துகிறது.)