ஏ.டி.எம் பணம் எடுப்பது முதல் ரயில் டிக்கெட் வரை: மே 1 முதல் அமலுக்கு வரும் 6 முக்கிய மாற்றங்கள்!

ஏடிஎம் பணம் எடுக்கும் கட்டணம் உயர்வு முதல் ரயில் டிக்கெட் முன்பதிவுக்கான புதுப்பிக்கப்பட்ட விதிகள் வரை மே மாதம் பல நிதி மாற்றங்களைக் கொண்டு வருகிறது. சமீபத்திய ரிசர்வ் வங்கியின் ரெப்போ விகித குறைப்பு வீட்டுக் கடன் வட்டி விகிதங்களில் சரிவை ஏற்படுத்தும் அதே வேளையில், 11 மாநிலங்களில் உள்ள வங்கிகள் இணைக்கப்பட்டிருப்பது மற்றவர்களை பாதிக்கலாம். சில வருமான வரி படிவங்கள் ஏப்ரல் 30 அன்று அறிவிக்கப்பட்டதைத் தொடர்ந்து வரி செலுத்துவோர் மே மாதத்தில் தங்கள் வருமான வரி அறிக்கைகளை தாக்கல் செய்ய முடியும்.

ஏடிஎம் பணம் எடுப்பது:

ரிசர்வ் வங்கி மே 1 முதல் ஏடிஎம் பரிமாற்றக் கட்டணத்தை உயர்த்த ஒப்புதல் அளித்துள்ளது. ஒரு வங்கியின் வாடிக்கையாளர்கள் மற்றொரு வங்கியின் ஏடிஎம் சேவைகளைப் பயன்படுத்தும்போது இந்த கட்டணம் வசூலிக்கப்படுகிறது. மாதாந்திர இலவச வரம்பை மீறிய பரிவர்த்தனைகளுக்கு தற்போது வசூலிக்கப்படும் ரூ. 21 கட்டணத்திற்கு பதிலாக இனி ரூ. 23 வசூலிக்கப்படும். மெட்ரோ நகரங்களில் மாதத்திற்கு மூன்று இலவச ஏடிஎம் பரிவர்த்தனைகளும், மெட்ரோ அல்லாத பகுதிகளில் ஐந்து இலவச பரிவர்த்தனைகளும் (நிதி மற்றும் நிதி அல்லாத செயல்பாடுகள் உட்பட) வாடிக்கையாளர்களுக்கு அனுமதிக்கப்படும்.

ரயில் டிக்கெட் முன்பதிவு:

இந்திய ரயில்வேயில் தட்கல் டிக்கெட்டுகள் மே 1 முதல் ஸ்லீப்பர் அல்லது ஏசி பெட்டிகளில் செல்லுபடியாகாது. அத்தகைய டிக்கெட்டுகளை வைத்திருப்பவர்கள் பொதுப் பெட்டிகளில் மட்டுமே பயணிக்க முடியும். இதற்கிடையில், முன்பதிவு காலம் 120 நாட்களில் இருந்து 60 நாட்களாகக் குறைக்கப்பட்டுள்ளது, அதே நேரத்தில் ரத்து செய்வதற்கான பணத்தைத் திரும்பப் பெறும் நேரம் வெறும் இரண்டு நாட்களாகக் குறைக்கப்பட்டுள்ளது.

இந்த செய்தியை ஆங்கிலத்தில் படிக்க க்ளிக் செய்யவும்.

கேஸ் சிலிண்டர் விலை:

எல்பிஜி சிலிண்டர்களின் விலை இந்த மாத தொடக்கத்தில் ரூ. 50 உயர்த்தப்பட்டது. பிரதான் மந்திரி உஜ்வாலா யோஜனா திட்டத்தின் கீழ் ஒரு யூனிட் ரூ. 550 ஆக உள்ளது. உஜ்வாலா அல்லாத விலை ஒரு சிலிண்டருக்கு ரூ. 853 ஆக உயர்த்தப்பட்டது. மத்திய அமைச்சர் ஹர்தீப் சிங் பூரி ஏப்ரல் 7 ஆம் தேதி அரசாங்கம் இனி ஒவ்வொரு பதினைந்து நாட்களுக்கும் ஒரு முறை எல்பிஜி விலைகளை மதிப்பாய்வு செய்யும் என்று தெரிவித்தார். அதிகாரப்பூர்வ அறிவிப்பு எதுவும் வெளியிடப்படவில்லை என்றாலும், மே மாதத்தில் எல்பிஜி விலைகள் மீண்டும் உயர வாய்ப்புள்ளது.

நிலையான வைப்பு (FD) விகிதங்கள்:

சில வங்கிகள் நிலையான வைப்பு விகிதங்களை திருத்தி மே 1 முதல் புதிய கொள்கைகளை அறிவித்துள்ளன. ஆர்.பி.எல் வங்கியின் சேமிப்புக் கணக்கு வைத்திருப்பவர்கள் இப்போது அதிகபட்சமாக 7% வட்டியுடன் மாதாந்திர வட்டி செலுத்துதல்களைப் (காலாண்டுக்கு பதிலாக) பெறுவார்கள். இதற்கிடையில், ஸ்ரீராம் ஃபைனான்ஸ் லிமிடெட் சில வாடிக்கையாளர்களுக்கு அதன் எஃப்டி விகிதங்களில் மாற்றத்தை அறிவித்துள்ளதாக கூறப்படுகிறது. மூத்த குடிமக்கள் இனி ஆண்டுக்கு 0.50% கூடுதல் வட்டியையும், பெண் டெபாசிட்டர்கள் ஆண்டுக்கு 0.10% கூடுதல் வட்டியையும் பெறுவார்கள்.

வருமான வரி தாக்கல்:

வருமான வரித்துறை அதிகாரப்பூர்வமாக மதிப்பீட்டு ஆண்டு (AY) 2025-26க்கான ஐடிஆர் படிவங்கள் 1 மற்றும் 4 ஐ ஏப்ரல் 30 அன்று அறிவித்தது. மொத்த ஆண்டு வருமானம் ரூ. 50 லட்சத்துக்கும் குறைவாக உள்ள வரி செலுத்துவோர் மற்றும் நிறுவனங்கள் இப்போது தங்கள் வரி அறிக்கைகளை தாக்கல் செய்ய முடியும். மத்திய நேரடி வரிகள் வாரியம் மே மாதத்தின் முதல் சில நாட்களில் மீதமுள்ள படிவங்களையும் அறிவிக்கும் என்று எதிர்பார்க்கப்படுகிறது.

புதன்கிழமை அறிவிக்கப்பட்ட படிவங்கள் சிறு முதலீட்டாளர்களுக்கு பல வரவேற்கத்தக்க மாற்றங்களை அறிமுகப்படுத்தியுள்ளன. ஒரு நிதியாண்டில் ரூ. 1.25 லட்சம் வரை நீண்ட கால மூலதன ஆதாயங்களை (LTCG) பெற்ற வரி செலுத்துவோர் இப்போது மிகவும் சிக்கலான ஐடிஆர்-2 படிவத்திற்கு பதிலாக பயனர் நட்பு ஐடிஆர்-1 (சஹஜ்) படிவத்தை தாக்கல் செய்ய தகுதி பெறுவார்கள்.

வங்கி இணைப்புகள்:

நிதி அமைச்சகம் அறிமுகப்படுத்திய 'ஒரு மாநிலம், ஒரு ஆர்ஆர்பி' கொள்கை மே 1 முதல் அமலுக்கு வருகிறது. இந்த விதி மாற்றத்தால் 11 மாநிலங்களில் உள்ள 15 பிராந்திய கிராமப்புற வங்கிகள் மாநிலத்திற்கு ஒரு ஆர்ஆர்பி என இணைக்கப்படும். இது இத்தகைய வங்கிகளின் மொத்த எண்ணிக்கையை 43 லிருந்து 28 ஆக குறைக்கும். ஆந்திரப் பிரதேசம், உத்தரப் பிரதேசம், மேற்கு வங்கம், பீகார், குஜராத், ஜம்மு காஷ்மீர், கர்நாடகா, மத்தியப் பிரதேசம், மகாராஷ்டிரா, ஒடிசா மற்றும் ராஜஸ்தான் ஆகியவை பாதிக்கப்பட்ட மாநிலங்களில் அடங்கும்.