ரூ.2,000 நோட்டு வாபஸ்; பொதுமக்களிடம் இருந்த ரொக்கம் ரூ.83,242 கோடி குறைவு

George Mathew , Hitesh Vyas

ரூ.2,000 நோட்டுகளை திரும்பப்பெறும் இந்திய ரிசர்வ் வங்கியின் (RBI) முடிவைத் தொடர்ந்து, அந்த நோட்டுகள் மீண்டும் வங்கிகளுக்கு வந்ததால், ஜூன் 2, 2023 நிலவரப்படி, பொதுமக்களிடம் இருந்த ரொக்கம் ரூ.83,242 கோடி குறைந்து ரூ.32.88 லட்சம் கோடியாக உள்ளது என்று சமீபத்திய ரிசர்வ் வங்கி தரவுகள் தெரிவிக்கின்றன.

வழக்கமாக இந்த நேரத்தில், அதாவது விதைப்பு பருவத்தில் வங்கிகளில் இருந்து அதிகமாக பணம் எடுப்பதால், புழக்கத்தில் உள்ள ரொக்க மதிப்பு உயரும் என்று நிபுணர் ஒருவர் கூறினார். ஆனால், ரூ.2,000 நோட்டுகளை திரும்ப பெறும் முடிவு, இதை ஈடுகட்டியுள்ளது.

இதையும் படியுங்கள்: எஸ்.பி.ஐ வங்கி புதிய லாக்கர் கட்டணம்: முழு தகவல்கள் இங்கே

மே 19 அன்று, திரும்பப் பெறுவதற்கான முடிவை அறிவிக்கும் போது, ​​மார்ச் 31, 2023 நிலவரப்படி புழக்கத்தில் உள்ள இந்த நோட்டுகளின் மொத்த மதிப்பு ரூ. 3.62 லட்சம் கோடி என்று ரிசர்வ் வங்கி கூறியது. சுமார் ரூ.1.8 லட்சம் கோடி, அதாவது ரூ.2,000 ரூபாய் நோட்டுகளில் 50 சதவீதம், அவை திரும்பப் பெறப்படும் என அறிவிக்கப்பட்டதில் இருந்து மீண்டும் வங்கி முறைக்கு புழக்கத்தில் வந்துள்ளதாக ரிசர்வ் வங்கியின் கவர்னர் சக்திகாந்த தாஸ் ஜூன் 8 அன்று தெரிவித்தார்.

இதற்கிடையில், ஜூன் 2, 2023 இல் முடிவடைந்த பதினைந்து நாட்களில் வங்கிகளின் டெர்ம் டெபாசிட் ரூ.2,68,262 கோடி அதிகரித்துள்ளது. மே 19, 2023 அன்று முடிவடைந்த பதினைந்து நாட்களில் அவை ரூ.3,998 கோடி குறைந்து இருந்தது.

புழக்கத்தில் உள்ள மொத்த கரன்சியிலிருந்து வங்கிகளில் பணத்தைக் கழித்த பிறகு பொதுமக்களிடம் உள்ள நாணயம் வந்து சேரும். புழக்கத்தில் உள்ள நாணயம் என்பது பரிவர்த்தனைகளை நடத்துவதற்கு நேரடியாகப் பயன்படுத்தப்படும் ஒரு நாட்டிற்குள் உள்ள பணம் அல்லது நாணயத்தைக் குறிக்கிறது.

“பரந்த அளவில், தற்காலிக அடிப்படையில், சுமார் 85 சதவீத ரூ.2,000 நோட்டுகள் வங்கிக் கணக்குகளில் டெபாசிட்களாக வரும் என்று என்னால் கூற முடியும். இது எங்கள் எதிர்பார்ப்புக்கு ஏற்ப உள்ளது,” என்று சக்திகாந்த தாஸ் கூறியிருந்தார். கடந்த மாதம், ரிசர்வ் வங்கி, ரூ.2,000 மதிப்பிலான ரூபாய் நோட்டுகளில் 89 சதவீதம் மார்ச் 2017க்கு முன் வெளியிடப்பட்டவை என்றும், அவற்றின் ஆயுட்காலம் நான்கு முதல் ஐந்து ஆண்டுகள் வரை இருக்கும் என்றும் கூறியது. இந்த நோட்டுகள் அச்சடிப்பது 2018-19ல் நிறுத்தப்பட்டது.

2,000 ரூபாய் நோட்டுகளை டெபாசிட் செய்யவோ அல்லது மாற்றவோ செப்டம்பர் 30-ம் தேதிக்குள் ரிசர்வ் வங்கி காலக்கெடு விதித்துள்ளது.

எச்.டி.எப்.சி வங்கியின் தலைமைப் பொருளாதார நிபுணர் அபீக் பருவா கூறுகையில், பொதுமக்களிடம் பணமதிப்பு வீழ்ச்சியானது வங்கிகளில் ரூ.2,000 நோட்டுகளின் டெபாசிட் அதிகரிப்பை பிரதிபலிக்கிறது, என்றார்.

"பொதுவாக, இந்த காலகட்டத்தில் (பயிர்) விதைப்பு சீசன் காரணமாக நிறைய பணம் எடுக்கப்படுகிறது. எனவே, பொதுவாக இந்த காலகட்டத்தில் புழக்கத்தில் உள்ள நாணயம் சிறிது உயரும். இருப்பினும், இந்த (ரூ. 2,000 வங்கி நோட்டு டெபாசிட்) குறிப்பிட்ட நிகழ்வின் மூலம், அது அந்த விளைவை (விதைப்பருவத்தின் போது பொதுமக்களுடன் அதிக நாணயம்) ஈடுகட்டியுள்ளது,” என்று அபீக் பருவா கூறினார்..

புழக்கத்தில் உள்ள ரூ.2,000 நோட்டுகள் பெரும்பான்மையாக டெபாசிட் செய்யப்பட்டு இருந்தாலும், பொதுமக்களிடம் கரன்சியில் கடும் சரிவை அவர் எதிர்பார்க்கவில்லை. “இதில் பெரும்பகுதி (ரூ. 2,000 நோட்டுகள் டெபாசிட்) முடிந்துவிட்டது. நீங்கள் இப்போது மெதுவான காலத்தைக் கொண்டிருக்கலாம், பின்னர் விதைப்பு விளைவு எடுத்துக்கொள்ளலாம், எனவே, பொதுமக்களிடம் நாணயத்தில் இந்த கூர்மையான சரிவை நீங்கள் காண முடியாது," அபீக் பருவா கூறினார்.

மே 29 அன்று, பாரத ஸ்டேட் வங்கியின் தலைவர் தினேஷ் காரா, தனது வங்கிக்கு ரூ.14,000 கோடி மதிப்புள்ள ரூ.2,000 நோட்டுகள் டெபாசிட்களாக வந்துள்ளதாகக் கூறினார்.

2000 ரூபாய் நோட்டுகளை புழக்கத்தில் இருந்து திரும்பப் பெறும் ரிசர்வ் வங்கியின் முடிவைத் தொடர்ந்து தனியார் வங்கியான கோடக் மஹிந்திரா வங்கி 5,400 கோடி ரூபாய் டெபாசிட்களை ஈட்டியதாக ஜூன் 15 அன்று பி.டி.ஐ செய்தி வெளியிட்டுள்ளது.

2000 ரூபாய் நோட்டுகள் டெபாசிட் செய்யப்பட்டதன் மூலம் புதிய டெபாசிட்களாக ரூ.128 கோடி கிடைத்துள்ளதாக மற்றொரு அரசு நடத்தும் வங்கியான பாங்க் ஆஃப் மகாராஷ்டிரா தெரிவித்துள்ளது.

பணமதிப்பு நீக்கம் அறிவிக்கப்படுவதற்கு சில நாட்களுக்கு முன்பு, நவம்பர் 4, 2016 அன்று, ரொக்கமாக பணம் செலுத்தும் விருப்பமான முறையில், பொதுமக்களிடம் உள்ள கரன்சி ரூ.17.97 லட்சம் கோடியிலிருந்து 83 சதவீதம் அதிகரித்துள்ளது.

உண்மையில், ரூ.500 மற்றும் ரூ.1,000 நோட்டுகள் திரும்பப் பெறப்பட்ட இரண்டு வாரங்களுக்குப் பிறகு, நவம்பர் 25, 2016 அன்று பதிவான ரூ.9.11 லட்சம் கோடியிலிருந்து பொதுமக்களிடம் உள்ள கரன்சி 261 சதவீதம் அதிகரித்துள்ளது. ஜூன் 2, 2023 நிலவரப்படி, ஆண்டுக்கு ஆண்டு உயர்ந்து பொது மக்களிடம் ரொக்கத்தின் மதிப்பு ரூ.192,379 கோடியாக உள்ளது.

2016 நவம்பரில் ரூ.500 மற்றும் ரூ.1,000 நோட்டுகள் திரும்பப் பெறப்பட்ட பிறகு, நவம்பர் 4, 2016 அன்று ரூ.17.97 லட்சம் கோடியாக இருந்த பொதுமக்களிடம் இருந்த கரன்சி, 2017 ஜனவரியில் ரூ.7.8 லட்சம் கோடியாகக் குறைந்துள்ளது. திடீர் பணமதிப்பு நீக்கம் பொருளாதாரத்தை உலுக்கியதாக பலர் கூறுகிறார்கள், தேவை வீழ்ச்சி, வணிகங்கள் நெருக்கடியை எதிர்கொள்கின்றன மற்றும் மொத்த உள்நாட்டு உற்பத்தி (ஜி.டி.பி) வளர்ச்சி கிட்டத்தட்ட 1.5 சதவீதம் சரிந்துள்ளது என்றும் கூறுகிறார்கள். பணப்புழக்கப் பற்றாக்குறையை உருவாக்கியதால், நோட்டு தடைக்குப் பிறகு பல சிறிய தொழிற்சாலைகள் கடுமையாக பாதிக்கப்பட்டு மூடப்பட்டன.

அரசாங்கமும் இந்திய ரிசர்வ் வங்கியும் (RBI) "குறைந்த பண சமூகம்", பணம் செலுத்துவதை டிஜிட்டல் மயமாக்குதல் மற்றும் பல்வேறு பரிவர்த்தனைகளில் ரொக்கத்தைப் பயன்படுத்துவதற்கான கட்டுப்பாடுகள் ஆகியவற்றிற்கு அழுத்தம் கொடுத்தாலும், அமைப்பில் பணம் படிப்படியாக அதிகரித்து வருகிறது. கோவிட் தொற்றுநோயின் பரவலைச் சமாளிக்க அரசாங்கம் கடுமையான ஊரடங்கை அறிவித்ததால், 2020 ஆம் ஆண்டில் பொதுமக்களின் பணத்திற்கான அவசரத்தால் இந்த முன்னேற்றம் முதன்மையாக உந்தப்பட்டது. உலகெங்கிலும் உள்ள நாடுகள் பிப்ரவரியில் ஊரடங்கை அறிவித்ததால், மக்கள் தங்கள் மளிகை மற்றும் பிற அத்தியாவசிய தேவைகளைப் பூர்த்தி செய்ய பணத்தை குவிக்கத் தொடங்கினர்.

முழுமையான எண்ணிக்கையில் புழக்கத்தில் உள்ள நாணயத்தின் அதிகரிப்பு யதார்த்தத்தின் பிரதிபலிப்பு அல்ல. பணமதிப்பிழப்பு நடவடிக்கைக்குப் பிறகு குறைந்துள்ள பணமதிப்பு மற்றும் ஜி.டி.பி விகிதத்தை கணக்கில் எடுத்துக்கொள்ள வேண்டும் என்று வங்கியாளர் ஒருவர் தெரிவித்தார்.

தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil