தொடர்ந்து 3 நாட்களாக மாறாத தங்கம் விலை: வெள்ளி கிலோ ரூ.91 ஆயிரத்துக்கு விற்பனை

சர்வதேச பொருளாதார சூழல், அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றின் அடிப்படையில் தங்கம் விலை நிர்ணயிக்கப்படுகிறது.

சென்னையில் சனிக்கிழமை (செப். 7) 22 கேரட் ஆபரணத் தங்கம் கிராமுக்கு ரூ.40 குறைந்தது. அதன்படி ஒரு கிராம் தங்கம் ரூ.6,680 ஆகவும், சவரன் ரூ.53,440-க்கும் விற்பனையானது. தொடர்ந்து வாரத்தின் முதல் நாளான நேற்றும் (செப்.9) தங்கத்தின் விலையில் மாற்றம் இல்லாமல் அதே விலையில் விற்பனை செய்யப்பட்டது.

இந்நிலையில் தொடர்ந்து 3வது நாளாக இன்றும் (செப். 10) சென்னையில் 22 கேரட் ஆபரணத் தங்கத்தின் விலை மாற்றமின்றி, ஒரு சவரன் ரூ.53,440-க்கு விற்பனை செய்யப்படுகிறது. ஒரு கிராம் தங்கம் ரூ.6,680 ஆக உள்ளது.

18 காரட் தங்கம் விலையிலும் மாற்றமின்றி ஒரு கிராம் ரூ.5,472 ஆகவும், ஒரு சவரன் ரூ.43,776-க்கும் விற்பனை செய்யப்படுகிறது.

24 காரட் ஒரு கிராம் தங்கத்தின் விலை ரூ.7,135 ஆகவும் 8 கிராம் தங்கத்தின் விலை ரூ.57,080-க்கும் விற்பனை செய்யப்படுகிறது.

அதேநேரம் ஒரு கிராம் வெள்ளியின் விலை கிராமுக்கு ரூ.1 அதிகரித்து ரூ.91 ஆகவும், ஒரு கிலோ வெள்ளியின் விலை ரூ. 500 உயர்ந்து ரூ.91,000-க்கும் விற்பனையாகிறது.