கடன் அறிக்கை தவறுகள்: கண்டறிந்து சரி செய்ய எளிய வழிகள் இதோ

ஒரு கடன் பயனராக, உங்கள் கடன் அறிக்கையை அவ்வப்போது சரிபார்ப்பது உங்களது பொறுப்பு. மேலும், அதில் தவறுகள் இருந்தால், அவற்றை சரிசெய்வது அத்தியாவசியமானது. 

கடன் அறிக்கையில் ஏற்படக் கூடிய ஐந்து தவறுகளையும் அவற்றை எவ்வாறு சரிசெய்வது என்பதையும் இங்கே பட்டியலிட்டுள்ளோம்.

கடன் அறிக்கையில் உள்ள ஐந்து தவறுகள்

1. தனிப்பட்ட தகவல்களில் பிழைகள்: தவறான பெயர், பிறந்த தேதி, தவறான பான் அல்லது முகவரி விவரங்கள் இதில் அடங்கும். இதை சரிசெய்ய, நீங்கள் CRIF High Mark போன்ற கடன் தகவல் நிறுவனத்திற்கு (credit bureau) திருத்த கோரிக்கையை சமர்ப்பிக்க வேண்டும்.

இதற்காக உங்கள் பான் கார்டு மற்றும் ஆதார் போன்ற அடையாள சான்றுகளை வழங்க வேண்டும். 

2. கணக்கு அல்லது கடன் விவரங்களில் பிழைகள்: நீங்கள் விண்ணப்பிக்காத சில கடன் அல்லது கிரெடிட் கார்டு இருக்கலாம். மேலும், நகல் கணக்குகள் அல்லது தவறான கணக்கு நிலை (மூடப்பட்டதற்கு பதிலாக செயல்படும் என்று காட்டுவது) இருக்கலாம்.

இத்தகைய சூழ்நிலையில், கணக்கு மூடல் கடிதங்கள் அல்லது கடன் இல்லா சான்றிதழ்கள் போன்ற ஆவணங்களை சமர்ப்பித்து, கடன் தகவல் நிறுவனத்துடன் ஒரு புகார் கோரிக்கை அளிக்கலாம்.

3. கட்டண வரலாற்றில் தவறுகள்: சரியான நேரத்தில் செலுத்தப்பட்ட கட்டணங்கள் தாமதமாக குறிக்கப்பட்டிருக்கலாம் அல்லது தவறான நாட்கள் நிலுவையில் இருப்பதாக காட்டப்படலாம். 

இதை சரிசெய்ய, உங்கள் வங்கி/கட்டணச் சான்றுகளை (வங்கி அறிக்கை அல்லது உறுதிப்படுத்தல் மின்னஞ்சல் போன்றவை) சேகரிக்க வேண்டும். கடன் தகவல் நிறுவனத்திடம் ஒரு புகாரை எழுப்பி, திருத்தப்பட்ட தரவை கடன் தகவல் நிறுவனத்திற்கு அனுப்ப உங்கள் வங்கியை தொடர்பு கொள்ளலாம்.

4. தவறான கடன் வரம்பு அல்லது கடன் தொகை: கிரெடிட் கார்டுகளில் தவறான கடன் வரம்பு புகாரளிக்கப்பட்டிருக்கலாம். மேலும், தவறான கடன் வழங்கல் அல்லது நிலுவைத் தொகை அல்லது வரம்புப் பிழைகள் காரணமாக மிகைப்படுத்தப்பட்ட பயன்பாட்டு விகிதம் (utilisation ratio) இருக்கலாம்.

இதை சரிசெய்ய, உங்கள் கடன் வழங்குநரிடமிருந்து சரியான கடன் வரம்பு அல்லது தொகை குறித்த எழுத்துப்பூர்வ உறுதிப்படுத்தலைப் பெறலாம். பின்னர் அதை உங்கள் புகார் கோரிக்கையுடன் கடன் தகவல் நிறுவனத்திற்கு அனுப்பலாம்.

5. காலாவதியான தகவல்கள்: ஏற்கனவே தீர்க்கப்பட்ட அல்லது மூடப்பட்ட கணக்குகள் இன்னும் திறந்திருப்பதாகக் காட்டப்படலாம். 

இதை சரிசெய்ய, புதுப்பிக்கப்பட்ட ஆவணங்களை (ஒப்பந்தக் கடிதங்கள் மற்றும் கடன் மூடல் ஆவணங்கள் போன்றவை) சமர்ப்பிக்கலாம்.