கிரெடிட் ஸ்கோர் முதல் சம்பளம் வரை; பெர்சனல் லோன் பெற உதவும் முக்கிய அம்சங்கள்

தனிநபர் கடன் பெறுவது இப்போது எளிதாக தெரிந்தாலும், சில விஷயங்களை நீங்கள் உறுதிப்படுத்திக் கொள்ள வேண்டும். உங்கள் நிதி சுயவிவரத்தை முன்கூட்டியே தயாரிப்பதன் மூலம், உங்கள் கடன் ஒப்புதலுக்கான வாய்ப்புகளை கணிசமாக அதிகரிக்கலாம். அதற்கான வழிகளை இந்தக் குறிப்பில் காணலாம்.

நல்ல கிரெடிட் ஸ்கோரை பராமரிக்கவும்:

கடன் வழங்குநர் முதலில் சரிபார்க்கும் விஷயம் உங்கள் கிரெடிட் ஸ்கோர் ஆகும். உங்களுக்கு அதிக ஸ்கோர் இருந்தால், அதாவது 750க்கு மேல் இருந்தால், நீங்கள் ஒரு பொறுப்பான கடன் வாங்குபவர் என்று அர்த்தம். இந்த வகையான ஸ்கோரை பெற, உங்கள் கிரெடிட் கார்டு பில்கள் மற்றும் இ.எம்.ஐ-கள் அனைத்தையும் சரியான நேரத்தில் செலுத்துவதை உறுதி செய்ய வேண்டும். கிரெடிட் கார்டு பயன்பாட்டை பொறுத்தவரை, அதிகமாக பயன்படுத்துவது நல்லது அல்ல. உங்கள் கடன் வரம்பில் சுமார் 30% மட்டுமே பயன்படுத்த முயற்சிக்கவும். ஒரே நேரத்தில் பல கடன்களுக்கு அல்லது கார்டுகளுக்கு விண்ணப்பிப்பதை தவிர்க்கவும். 

கடன்-வருமான விகிதத்தை (Debt-to-Income Ratio) குறைவாக வைத்திருங்கள்:

உங்கள் இ.எம்.ஐ-கள், கிரெடிட் கார்டு நிலுவைகள் போன்றவை உங்கள் வருமானத்தில் 40% க்கும் அதிகமாக இருந்தால், கடன் வழங்குநர்கள் உங்கள் விண்ணப்பத்தை நிராகரிப்பதற்கான வாய்ப்புகள் அதிகம். உங்கள் கடன்-வருமான விகிதத்தை அந்த சதவீதத்திற்குக் கீழே வைத்திருக்க இலக்கு வையுங்கள். ஒரு புதிய கடனுக்கு விண்ணப்பிக்கும் போது, ஏற்கனவே உள்ள கடன்களைத் திருப்பி செலுத்தியுள்ளீர்கள் என்பதை உறுதிப்படுத்திக் கொள்ளுங்கள்.

சரியான கடன் வழங்குநரையும், கடன் தொகையையும் தேர்வு செய்யவும்:

ஒரு கடன் வழங்குநரை தேர்ந்தெடுக்கும் போது, யாருடைய தகுதி அளவுகோல்கள் உங்கள் சுயவிவரத்துடன் பொருந்துகிறதோ அவரைத் தேர்ந்தெடுக்கவும். மேலும், உங்கள் சுயவிவரத்திற்கு ஏற்ற கடனுக்கு விண்ணப்பிக்கிறீர்கள் என்பதையும் உறுதிப்படுத்திக் கொள்ளுங்கள். அதற்கு அதிகமாக இருந்தால், உங்கள் விண்ணப்பம் நிச்சயமாக நிராகரிக்கப்படும்.

வருமான நிலைத்தன்மையை காட்டுங்கள்:

உங்களுக்கு நிலையான வருமானமும், நிலையான வேலையும் இருப்பதை கடன் வழங்குநர்கள் தெரிந்து கொள்ள விரும்புகிறார்கள். இது கடனை திருப்பி செலுத்தும் திறன் உங்களுக்கு உள்ளது என்பதை அவர்களுக்கு உறுதியளிக்கிறது. நீங்கள் ஒரு புகழ்பெற்ற நிறுவனம் அல்லது அரசுப் பணியில் இருந்தால், கடன் ஒப்புதலுக்கான வாய்ப்புகள் அதிகம். நீங்கள் சுயதொழில் செய்பவராக இருந்தால், உங்கள் வரி வருமானத்தை தவறாமல் தாக்கல் செய்து, அனைத்து நிதி பதிவுகளையும் பராமரிப்பதை உறுதிப்படுத்திக் கொள்ளுங்கள்.