மொத்த வராக்கடனில் முதல் 100 திருப்பி செலுத்தாதவர்களின் பங்கு 43%; ரூ.4 லட்சம் கோடிக்கு மேல்

Dheeraj Mishra

மார்ச் 2019 வரையிலான மொத்த செயல்படாத சொத்துக்களில் (NPA- வராக்கடன்) 43 சதவீதத்திற்கும் அதிகமானவை - ரூ 4.02 லட்சம் கோடி - வெறும் 100 நிறுவனங்களால் மட்டுமே கணக்கிடப்பட்டுள்ளது, மேலும் இந்த கடன் வாங்கியவர்களில் 30 பேர் மொத்த வராக்கடன்களில் 30 சதவீதத்திற்கும் அதிகமாக அதாவது ரூ 2.86 லட்சம் கோடி கடன் வைத்துள்ளனர் என இந்தியன் எக்ஸ்பிரஸ் நடத்திய விசாரணையில் தெரியவந்துள்ளது.

ஆங்கிலத்தில் படிக்க: Express RTI: Top 100 defaulters accounted for 43% of total NPAs, over Rs 4 lakh crore in total

இந்தியாவின் வணிக வங்கிகள் (SCBs) மார்ச் 31, 2019 நிலவரப்படி ரூ. 9.33 லட்சம் கோடி மதிப்பிலான மொத்த வராக்கடன்களைக் கொண்டுள்ளன, இது இந்தியாவின் வங்கி அமைப்பு வரலாற்றில் 2018க்குப் பிறகு பதிவு செய்யப்பட்ட இரண்டாவது மிக அதிகமான மோசமான கடன் தொகையாகும்.

முக்கிய தொழிலதிபர்களால் நடத்தப்படும் பல்வேறு துறைகளைச் சேர்ந்த நாட்டின் சில பெரிய நிறுவனங்களை உள்ளடக்கிய முதல் 100 வங்கிக் கடன் செலுத்தாதவர்கள் மார்ச் 31, 2019 வரை மொத்தம் ரூ. 8.44 லட்சம் கோடி கடன் பெற்றுள்ளனர் என்றும், இதில் கிட்டத்தட்ட பாதி வராக்கடன் அல்லது என்.பி.ஏ என்று அறிவிக்கப்பட்டுள்ளன என்றும் விசாரணை மேலும் காட்டுகிறது. 

அதிக கடன் செலுத்தாதவர்களின் பட்டியலை உன்னிப்பாகக் கவனித்தால், உற்பத்தி, எரிசக்தி மற்றும் கட்டுமானம் ஆகிய மூன்று துறைகளைச் சேர்ந்த 15 நிறுவனங்கள் மட்டுமே இந்த 100 நிறுவனங்களின் மொத்தக் கடனில் 50 சதவீதத்திற்கும் (ரூ. 4.58 லட்சம் கோடி) அதிகமாக பங்களித்துள்ளன.

முதல் முறையாக, தகவல் அறியும் உரிமைச் சட்டத்தின் கீழ், முதல் 100 வங்கிகளில் கடன் செலுத்தாதவர்களின் பட்டியலை இந்தியன் எக்ஸ்பிரஸ் அணுகியுள்ளது. 2019 ஆம் ஆண்டு முதல் நான்கு வருட காலப்பகுதியில் பல ஆர்.டி.ஐ (RTI) விண்ணப்பங்கள் மற்றும் மேல்முறையீடுகள் மூலம் இந்திய ரிசர்வ் வங்கி (RBI) கதவுகளைத் தட்டிய பிறகு இந்தப் பட்டியல் வந்தது. இந்த விவகாரம் மத்திய தகவல் ஆணையம் (CIC) வரை சென்றது மற்றும் பல விசாரணைகளுக்குப் பிறகு, மத்திய அரசு வங்கி நவம்பர் 2023 இல் தகவலை வெளியிட்டது, அதுவும் ஓரளவு மட்டுமே.

மார்ச் 31, 2015 இல் மொத்த வராக்கடன்கள் ரூ. 3.23 லட்சம் கோடியிலிருந்து மார்ச் 31, 2018 நிலவரப்படி ரூ.10.36 லட்சம் கோடியாக உயர்ந்தது, இது எப்போதும் இல்லாத அளவுக்கான உயர்வாகும். வராக்கடன் 2019 இல் குறைந்து, மேலும் மார்ச் 2023 நிலவரப்படி ரூ. 5.71 லட்சம் கோடியாகக் குறைந்துள்ளது.

தகவல் அறியும் உரிமைச் சட்டத்தின் கீழ் அணுகப்பட்ட தரவு, 2019 முதல் மாறியிருக்கும் முதல் 100 வங்கிக் கடனைத் திருப்பிச் செலுத்தாதவர்கள், மார்ச் 31, 2024 நிலவரப்படி ரூ. 1.07 லட்சம் கோடி வராக்கடன்களை வைத்துள்ளனர் என்பதைக் காட்டுகிறது.

உற்பத்தி, எரிசக்தி, கட்டுமானம், ரியல் எஸ்டேட், டெலிகாம், வங்கி அல்லது நிதி ஆகிய துறைகளைச் சேர்ந்த நாட்டின் முன்னணி வணிக நிறுவனங்கள் என்.பி.ஏ.,க்கள் அல்லது வங்கிகள் கடனை செலுத்தாதவர்களின் முதல் 100 பட்டியலில் இடம்பெற்றுள்ளன.

விசாரணையின் முதல் பகுதியில், தி இந்தியன் எக்ஸ்பிரஸ் பட்டியலில் உள்ள மொத்தம் 82 நிறுவனங்கள் திவால் நடவடிக்கைகளின் வெவ்வேறு நிலைகளில் இருப்பதாகவும், ஏறக்குறைய மூன்றில் ஒரு பங்கு நிறுவனங்கள் கலைப்புப் பாதையில் சென்றிருப்பதாகவும், அதாவது வங்கிகள் இந்த விவகாரங்களில் மிகக் குறைந்த பணத்தைத் திரும்பப் பெற்றிருக்கும் என்று வெளிப்படுத்தியது.

ரிசர்வ் வங்கியின் தரவுகளின்படி, ரிலையன்ஸ் கம்யூனிகேஷன் லிமிடெட், கப்பல் கட்டும் நிறுவனமான ரிலையன்ஸ் நேவல் & இன்ஜினியரிங் லிமிடெட் மற்றும் ரிலையன்ஸ் குழுமத்தின் குறைந்தபட்சம் இரண்டு துணை நிறுவனங்கள், ஜேபி குழுமத்தின் ஜெய்பிரகாஷ் அசோசியேட்ஸ் லிமிடெட், ஜெய்பிரகாஷ் பவர் வென்ச்சர் லிமிடெட் மற்றும் ஜேபி இன்ஃப்ராஸ்ட்ரக்சர் லிமிடெட், உள்கட்டமைப்பு நிதி நிறுவனமான ஐ.எல்&எஃப்.எஸ் (IL&FS) இன் ஐ.எல்&எஃப்.எஸ் ஃபைனான்சியல் சர்வீசஸ் லிமிடெட், ஐ.எல்&எஃப்.எஸ் தமிழ்நாடு பவர் கம்பெனி லிமிடெட், ஐ.எல்&எஃப்.எஸ் டிரான்ஸ்போர்ட்டேஷன் நெட்வொர்க்ஸ் லிமிடெட் மற்றும் ஐ.எல்&எஃப்.எஸ் எனர்ஜி டெவலப்மெண்ட் கம்பெனி லிமிடெட், ஜெட் ஏர்வேஸ், ருச்சி சோயா இண்டஸ்ட்ரீஸ் (இப்போது பதஞ்சலி ஃபுட்ஸ்), வீடியோகான் குழுமத்தின் இரண்டு நிறுவனங்கள், ஜிண்டால் இந்தியா தெர்மல் பவர், எஸ்ஸார் குழுமத்தின் நான்கு நிறுவனங்கள், உள்கட்டமைப்பு குழுமமான லான்கோவின் ஐந்து நிறுவனங்கள், மெஹுல் சோக்சியின் கீதாஞ்சலி ஜெம்ஸ், ஆகியவை பட்டியலில் உள்ள நிறுவனங்களில் அடங்கும்.

அதிகபட்சமாக - 34 நிறுவனங்கள் எரிசக்தித் துறையைச் சேர்ந்தவை, 32 நிறுவனங்கள் உற்பத்தித் துறையைச் சேர்ந்தவை, 20 கட்டுமான அல்லது ரியல் எஸ்டேட் நிறுவனங்கள், ஐந்து தொலைத் தொடர்பு நிறுவனங்கள் மற்றும் ஒன்பது நிறுவனங்கள் பிற துறைகளைச் சேர்ந்தவை.

கடன் அளவு

மார்ச் 2019 நிலவரப்படி ரூ.41,400 கோடி கடனுடன் பூஷன் பவர் & ஸ்டீல் லிமிடெட் முதலிடத்தில் உள்ளது. எஸ்ஸார் ஸ்டீல் இந்தியா லிமிடெட் ரூ.69,360 கோடி கடனுடன் இரண்டாவது இடத்தில் உள்ளது. நிறுவனம் பின்னர் 2019 இல் ஆர்சிலர் மிட்டல் நிப்பான் ஸ்டீல் இந்தியா லிமிடெட் நிறுவனத்தால் கையகப்படுத்தப்பட்டது.

வீடியோகான் இண்டஸ்ட்ரீஸ் லிமிடெட் ரூ.58,052 கோடி, வி.ஓ.வி.எல் (VOVL) லிமிடெட் (ரூ.1,189 கோடி கடன்), ஜெய்பிரகாஷ் அசோசியேட்ஸ் லிமிடெட் (கடன் ரூ.36,591 கோடி), கே.எஸ்.கே மகாநதி பவர் கம்பெனி லிமிடெட் (கடன் ரூ.21,390 கோடி), ரிலையன்ஸ் கம்யூனிகேஷன்ஸ் லிமிடெட் (கடன் ரூ. 46,659 கோடி), அலோக் இண்டஸ்ட்ரீஸ் லிமிடெட் (கடன் ரூ. 29,569 கோடி), பிரயாக்ராஜ் பவர் ஜெனரேஷன் கம்பெனி லிமிடெட் (கடன் ரூ. 13,767 கோடி) மற்றும் ஜெய்பிரகாஷ் பவர் வென்ச்சர்ஸ் லிமிடெட் ரூ.23,193 கோடி ஆகியவை டாப் 10ல் உள்ள மற்ற நிறுவனங்கள். 

முதல் 100 வங்கிக் கடனைத் திருப்பிச் செலுத்தாதவர்கள் அவர்களின் நிலுவையில் உள்ள வராக்கடன்களின்படி பட்டியலிடப்பட்டுள்ளனர். பட்டியலில், அதிக கடன் வாங்கும் நிறுவனங்கள் குறைந்த வராக்கடன் தொகையை பிரதிபலிக்கலாம்.

மற்ற அறியப்பட்ட நிறுவனங்களான கீதாஞ்சலி ஜெம்ஸ் லிமிடெட் 13வது இடத்திலும், டிஷ்நெட் வயர்லெஸ் லிமிடெட் 14வது இடத்திலும், ஏர்செல் லிமிடெட் 16வது இடத்திலும், ஜிண்டால் இந்தியா தெர்மல் பவர் லிமிடெட் 18வது இடத்திலும், இன்ஃப்ராஸ்ட்ரக்சர் லீசிங் அண்ட் ஃபைனான்சியல் சர்வீசஸ் லிமிடெட் (IL&FS) 21வது இடத்திலும், ருச்சி சோயா இண்டஸ்ட்ரீஸ் லிமிடெட் 26ம் இடத்திலும், ரிலையன்ஸ் நேவல் அண்ட் இன்ஜினியரிங் லிமிடெட் 30வது இடத்திலும், எஸ்ஸார் பவர் குஜராத் லிமிடெட் 35வது இடத்திலும், லான்கோ அமர்கண்டக் பவர் லிமிடெட் 40வது இடத்திலும், ரோட்டோமாக் பிரைவேட் லிமிடெட் 70வது இடத்திலும், மும்பை மெட்ரோ ஒன் பிரைவேட் லிமிடெட் 79வது இடத்திலும், நக்ஷத்ரா பிராண்ட்ஸ் லிமிடெட் 86வது இடத்திலும், விசா பவர் லிமிடெட் 95வது இடத்திலும், ரேபிட் மெட்ரோரெயில் குர்கான் சவுத் லிமிடெட் 99வது இடத்திலும், மற்றும் கேமன் இந்தியா லிமிடெட் 100வது இடத்திலும் உள்ளன.

இந்த நிறுவனங்கள் கச்சா பெட்ரோலியம் மற்றும் இயற்கை எரிவாயு பிரித்தெடுத்தல், அனல் மற்றும் நீர் மின் உற்பத்தி, நிலக்கரி சுரங்கம், எண்ணெய் மற்றும் எரிவாயு ஆய்வு, கப்பல் கட்டுதல், உரங்கள் போன்ற பல முக்கியமான திட்டங்களில் ஈடுபட்டுள்ளன.

இந்த 100 நிறுவனங்களின் 2023 ஆம் ஆண்டின் கடன் நிலையை பகுப்பாய்வு செய்து, அவற்றின் வருடாந்திர அறிக்கைகள் மற்றும் நிறுவனங்களின் பதிவாளரிடம் தாக்கல் செய்யப்பட்ட வருடாந்திர அறிக்கைகள் மூலம் மொத்தம் 51 நிறுவனங்கள் FY23ல் ரூ 3.58 லட்சம் கோடி கடனைக் கொண்டுள்ளன என்பதை பதிவுகள் காட்டுகின்றன.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“