அதிகப்படியான ஏற்றுமதி எதிரொலி: துருக்கியுடனான வர்த்தக தடையை தவிர்க்கும் இந்தியா

இந்தியா, துருக்கியுடன் வர்த்தக உறவுகளை துண்டிக்கும் எந்தவொரு நடவடிக்கையையும் எடுக்க தயக்கம் காட்டுகிறது. தேசிய பாதுகாப்பு காரணங்களுக்காக துருக்கிய நிறுவனங்களின் பங்கை உள்கட்டமைப்பு திட்டங்களில் குறைப்பதற்கான நகர்வுகள் இருந்தபோதிலும், இருதரப்பு வர்த்தகத்தில் இதே அணுகுமுறையை நீட்டிக்க அரசாங்கம் விரும்பவில்லை. இதற்குக் காரணம், இந்தியா துருக்கியுடன் 2.73 பில்லியன் டாலர் மதிப்பிலான வர்த்தக உபரியைக் கொண்டிருப்பதுடன், எந்தவொரு வர்த்தக தடையும் இந்தியாவுக்கு எதிர்மறையாக அமையலாம் என்பதே ஆகும்.

இந்தச் செய்தியை ஆங்கிலத்தில் படிக்க கிளிக் செய்யவும்

"துருக்கியில் இருந்து இறக்குமதியை தடை செய்ய வேண்டும் என்று பல கோரிக்கைகள் வந்துள்ளன. ஹிமாச்சலப் பிரதேசத்தின் ஆப்பிள் உற்பத்தியாளர்கள் துருக்கிய ஆப்பிள் இறக்குமதிக்கு தடை கோரியுள்ளனர். ஆனால், இந்தியா துருக்கியுடன் வர்த்தக உபரியைக் கொண்டுள்ளது. மேலும், எங்கள் ஏற்றுமதியாளர்களின் நலன்களையும் நாங்கள் மனதில் கொள்ள வேண்டும். ஒரு வர்த்தக தடை வலுவான புவிசார் அரசியல் செய்தியாக இருக்கலாம். ஆனால், நீங்கள் அதை எவ்வளவு தூரம் கொண்டு செல்ல விரும்புகிறீர்கள் என்பது முக்கியம்" என்று ஒரு அரசு அதிகாரி இந்தியன் எக்ஸ்பிரஸ் நாளிதழிடம் தெரிவித்துள்ளார்.

இந்த வர்த்தக உபரிக்கு முக்கியத்துவம் என்னவென்றால், இந்தியாவின் துருக்கிக்கு செல்லும் ஏற்றுமதிகள் பெரும்பாலும் பொறியியல் பொருட்கள், மின்னணுவியல், கரிம மற்றும் கனிம ரசாயனங்கள் போன்ற தொழில்துறை ஏற்றுமதிகளாகும். இவை கடந்த ஐந்து ஆண்டுகளில் அதிகரித்துள்ளன. இதற்கு மாறாக, துருக்கியின் இந்தியாவுக்கான ஏற்றுமதிகள் பெரும்பாலும் பழங்கள், விதைகள், தங்கம் மற்றும் பளிங்கு பொருட்களாகும். உக்ரைன் போருக்குப் பிறகு துருக்கி இந்தியாவில் இருந்து பெட்ரோலியப் பொருட்கள் இறக்குமதியை அதிகரித்திருந்தாலும், 2025 நிதியாண்டில் இந்த வகை கணிசமாகக் குறைந்துள்ளது.

கடந்த மாதம், ஹிமாச்சல பிரதேசத்தை சேர்ந்த ஆப்பிள் உற்பத்தியாளர்கள் மத்திய வர்த்தக அமைச்சக அதிகாரிகளைச் சந்தித்து ஆப்பிள் இறக்குமதிக்கு தடை கோரினர். துருக்கியில் இருந்து மானியத்துடன் வரும் ஆப்பிள்கள் உள்நாட்டு தோட்டக்கலை பொருளாதாரத்தை முடக்கி, அம்மாநில தோட்ட உரிமையாளர்களை நிதி நெருக்கடிக்கு தள்ளுவதாக அவர்கள் தெரிவித்தனர். ஆப்பிள் ஒரு வணிகப் பயிர் மட்டுமல்ல, மலைப்பகுதிகளில் உள்ள மாநிலங்களின் பொருளாதார முதுகெலும்பு என்று அவர்கள் வாதிட்டனர்.

உதய்பூரைச் சேர்ந்த பளிங்கு உற்பத்தியாளர்களும், கடந்த மாதம் பிரதமர் அலுவலகத்திற்கு (PMO) கடிதம் எழுதினர். துருக்கியிலிருந்து பளிங்கு இறக்குமதிக்கு கட்டுப்பாடு கோரி, ஆபரேஷன் சிந்தூரின் போது பாகிஸ்தானுக்கு துருக்கி அளித்த ஆதரவை சுட்டிக்காட்டினர். இந்தியா தனது பெரும்பாலான பளிங்குகளை துருக்கியில் இருந்து இறக்குமதி செய்கிறது.

அதிகாரப்பூர்வ வர்த்தக தரவுகளின்படி, 2025 நிதியாண்டில் துருக்கிக்கான ஏற்றுமதிகள் 5.72 பில்லியன் டாலராகும். இதில், பொறியியல் ஏற்றுமதிகள் 3 பில்லியன் டாலருடன் 50 சதவீதத்திற்கும் மேலாக உள்ளன. குறிப்பிடத்தக்க வகையில், நுண், சிறு மற்றும் நடுத்தர தொழில் நிறுவனங்கள் (MSME) இந்த பிரிவில் ஆதிக்கம் செலுத்தி, கிட்டத்தட்ட 35-40 சதவீதம் பங்களித்துள்ளன.

கடந்த நிதியாண்டில் துருக்கியில் இருந்து இறக்குமதிகள் 2.99 பில்லியன் டாலராகும். பழங்கள் மற்றும் விதைகள் பிரிவில் இறக்குமதிகள் 107.12 மில்லியன் டாலராக இருந்தன. இது முந்தைய நிதியாண்டில் 96.82 மில்லியன் டாலராக இருந்ததை விட கிட்டத்தட்ட 10 சதவீதம் அதிகம். இந்தியா, 2025 நிதியாண்டில் துருக்கியிலிருந்து 270.83 மில்லியன் டாலர் மதிப்பிலான தங்கத்தையும் இறக்குமதி செய்தது. இது 2024 நிதியாண்டில் இறக்குமதி செய்யப்பட்ட 104.56 மில்லியன் டாலர் மதிப்பிலான தங்கத்தை விட 159.02 சதவீதம் அதிகம்.

கடந்த மாதம், சிவில் விமானப் போக்குவரத்து பாதுகாப்பு பணியகம் (BCAS), துருக்கியை தளமாகக் கொண்ட விமான நிலைய தரை கையாளுதல் நிறுவனமான செலேபி ஏவியேஷன் ஹோல்டிங்கின் இந்தியப் பிரிவின் பாதுகாப்பு அனுமதியை "தேசிய பாதுகாப்பு" காரணங்களுக்காக ரத்து செய்தது.

இருப்பினும், மே 26 அன்று, மும்பை உயர் நீதிமன்றம், மும்பை சர்வதேச விமான நிலைய லிமிடெட் (MIAL) தரை கையாளுதல் சேவைகளுக்கான டெண்டர்களை இறுதி செய்வதை தற்காலிகமாக நிறுத்தி வைத்தது. நீதிமன்றம் ஜூன் மாதம் மீண்டும் திறக்கப்பட்டதும், செலேபியின் ஒப்பந்த ரத்து குறித்த மனு விசாரிக்கப்படும் வரை இந்த நிறுத்தம் நீடிக்கும்.

கடந்த மாதம், இந்தியன் எக்ஸ்பிரஸ் நாளிதழ், இந்திய சுற்றுலா பயணிகள் துருக்கி மற்றும் அஜர்பைஜான் ஆகிய நாடுகளுக்கு திட்டமிட்டிருந்த விடுமுறை பயணங்களை ரத்து செய்து வருவதாக செய்தி வெளியிட்டது. பாகிஸ்தானுக்கு ஆதரவளித்த இந்த நாடுகள் மீதான அதிருப்தி இதன் பின்னணியில் உள்ளது. 2024 இல் துருக்கிக்கு 3 லட்சம் இந்திய சுற்றுலா பயணிகளும், அஜர்பைஜானுக்கு 2.44 லட்சம் பேரும் வருகை தந்தனர். இந்த எண்ணிக்கையில் ஒரு பகுதி இப்போது கஜகஸ்தான் மற்றும் உஸ்பெகிஸ்தான் போன்ற மத்திய ஆசிய நாடுகளுக்குத் திருப்பி விடப்படும் என்று தொழில்துறை பிரதிநிதிகள் எதிர்பார்க்கின்றனர்.