Chennai Ford Tamil News: அமெரிக்காவை சேர்ந்த ஃபோர்டு நிறுவனத்தின் ஆலை சென்னை அருகேயுள்ள மறைமலை நகரில் இயங்கி வருகிறது. இந்த ஃபோர்டு நிறுவனம் இந்தியாவில் இருந்து வெளியேறுவதாக கடந்த ஆண்டு அறிவித்தது. இதையடுத்து, ஊழியர்களுக்கு இழப்பீட்டுத் தொகையும் அறிவித்தது. எனினும், தங்களுக்கு போதிய இழப்பீடு வழங்கப்பட வேண்டும் என கடந்த மே 30ஆம் தேதி முதல் ஃபோர்டு ஆலை ஊழியர்கள் போராட்டம் நடத்தி வந்தனர். இதனால் ஆலையில் உற்பத்தி பாதிக்கப்பட்டது.
பின்னர், போராட்டம் செய்த ஊழியர்களில் ஒரு பிரிவினர் மட்டும் வேலைக்கு திரும்பியதால் ஜூன் 14ஆம் தேதி முதல் டபுள் ஷிஃப்ட் முறையில் மீண்டும் சென்னை ஃபோர்டு ஆலையில் கார் உற்பத்தி தொடங்கியது. மேலும், ஜூலை இறுதி வரை உற்பத்தியை நீட்டிக்க முடிவு செய்ததாகவும் அந்த நிறுவனம் தெரிவித்தது.
இந்நிலையில், சென்னை ஃபோர்டு நிறுவனம் அதன் தொழிற்சாலை தொழிற்சங்கம் தொழிலாளர்களுக்கான இறுதி துண்டிப்பு ஊதியத்தை வழங்க ஒப்புக்கொண்டதாக கடந்த வாரம் வெளியிட்டு இருந்த செய்தி குறிப்பில் தெரிவித்து இருந்தது.
ஃபோர்டு நிறுவனம் வெளியிட்டுள்ள செய்திக்குறிப்பில், “கடந்த செப்டம்பர் 2021ல் வணிக மறுசீரமைப்பு அறிவிக்கப்பட்டதிலிருந்து, நியாயமான துண்டிப்புப் பேக்கேஜ் பேச்சுவார்த்தை நடத்துவதற்கான முயற்சிகளை ஃபோர்டு தொடர்ந்து மேற்கொண்டுள்ளது என்றும் யூனியனுடன் தீர்வை எட்டுவதில் மகிழ்ச்சி அடைகிறது என்றும் குறிப்பிட்டு இருந்தது.
“ஒப்புக்கொள்ளப்பட்ட தீர்வின்படி, நிறுவனம் 130 நாட்களின் தற்போதைய சலுகையிலிருந்து ஒரு நிறைவு செய்யப்பட்ட ஆண்டுக்கு 140 நாட்கள் மொத்த ஊதியத்திற்குச் சமமான இறுதித் துண்டிப்பு தீர்வை வழங்கும். 1.5 லட்சம் ரூபாய் கூடுதல் ஒரு முறை மொத்தத் தொகையும் இறுதித் தீர்வில் சேர்க்கப்படும். ஒவ்வொரு பணியாளருக்கான ஒட்டுமொத்த துண்டிப்புத் தொகை குறைந்தபட்சத் தொகை ரூ. 34.5 லட்சம் மற்றும் அதிகபட்சமாக ரூ. 86.5 லட்சம். (அதாவது, சராசரியாக ஒரு பணியாளருக்கு ரூ. 44.8 லட்சமாக கணக்கிடப்பட்டுள்ளது.).
திருத்தப்பட்ட தீர்வு ஒவ்வொரு பணியாளருக்கும் சராசரியாக 5.1 ஆண்டுகள் / 62-மாத சம்பளம் (குறைந்தபட்சம் 3.9 ஆண்டுகள் அதாவது 47 மாதங்கள் முதல் அதிகபட்சம் 8.7 ஆண்டுகள் வரை அதாவது 105 மாதங்கள் வரை) என கணக்கிடப்பட்டுள்ளது.
முறையான தீர்வு ஒப்பந்தம் இந்த மாத இறுதிக்குள் (அதாவது, செப்டம்பர் 2022) செயல்படுத்த திட்டமிடப்பட்டுள்ளது. நிறுவனம் அடுத்த படிநிலைகளை ஊழியர்களுக்கு தெரிவிக்கும் மற்றும் செப்டம்பர் 30, 2022க்குள் வெளியேறும் முறைகளை முடிக்க எதிர்நோக்கும். வெளியேறும் முறைகளை ஆதரிப்பதற்காக நிறுவனம் அனைத்து ஊழியர்களுக்கும் செப்டம்பர் 30, 2022 வரை தொடர்ந்து ஊதியம் வழங்கும். மேலும், தொழிற்சங்கம் மற்றும் தமிழ்நாடு அரசு மற்றும் தொழிலாளர் அதிகாரிகளின் ஆதரவுக்கு நன்றி தெரிவித்துக் கொள்கிறது.” என்று தெரிவித்து இருந்தது.
ஒப்பந்தத்தை நிறைவேற்றிய ஃபோர்டு நிறுவனம்
இந்த நிலையில், சென்னை ஃபோர்டு நிறுவனம் அதன் ஊழியர்கள் உடனான தீர்வு ஒப்பந்தத்தை நிறைவேற்றியுள்ளது. ஃபோர்டு இந்தியா மற்றும் சென்னை ஃபோர்டு ஊழியர் சங்கம் (CFEU) இடையே 2,592 மணிநேர நிரந்தர ஊழியர்களைப் பிரதிநிதித்துவப்படுத்தும் ஒப்பந்தம் கையெழுத்தானது. மேலும். ஒரு மாத மொத்த ஊதியத்திற்கு இணையான கூடுதல் தொகையை கையொப்ப நன்மையாக செலுத்துவதாகவும் நிறுவனம் கூறியுள்ளது.
இது தொடர்பாக ஃபோர்டு இந்தியாவின் ட்ரான்ஸ்பர்மேஷன் அதிகாரி பாலசுந்தரம் ராதாகிருஷ்ணன் வெளியிட்டுள்ள செய்தி குறிப்பில், ஃபோர்டு நிறுவனத்திற்கும் சென்னை யூனியனுக்கும் இடையே இன்று கையெழுத்திடப்பட்ட துண்டிப்பு தீர்வு ஒப்பந்தம், சம்பந்தப்பட்ட அனைவருக்கும் ஒரு முக்கியமான மைல்கல் மற்றும் வெற்றியாகும். ஃபோர்டு குழுவிற்கும், சென்னை ஃபோர்டு ஊழியர் சங்கத்திற்கும் நல்ல நம்பிக்கையுடன் பேச்சுவார்த்தை நடத்தி, ஊழியர்களின் சிறந்த நலனை இதயத்தில் வைத்திருக்கும் ஒரு தீர்வு முடிவை எட்டியதற்காக நான் நன்றி கூறுகிறேன்.
இன்று கையொப்பமிடப்பட்ட இறுதி தீர்வுத் தொகுப்பு (சராசரியாக 140 நாட்களுக்குச் சமமான மொத்த ஊதியம் மற்றும் ஒரு பணியாளருக்கு ரூ.1.5 இலட்சம் கூடுதல்) ஒவ்வொரு பணியாளருக்கும் சராசரியாக சுமார் 5.2 ஆண்டுகள் / 62-மாத சம்பளம் ஆகும்.குறைந்தபட்சம் 4.1 ஆண்டுகள், அதாவது, 49 மாதங்கள் முதல் அதிகபட்சம் 9.0 ஆண்டுகள், அதாவது 108 மாதங்கள்) இவ்வாறு ஒவ்வொரு பணியாளருக்கும் தங்களின் எதிர்கால நடவடிக்கைகளைத் திட்டமிடுவதற்குப் போதுமான நிதி நிலை மற்றும் நேரத்தை உத்தரவாதம் செய்கிறது. அனைத்து ஊழியர்களுக்கும் வேலை செய்வதற்கான கடைசி தேதி செப்டம்பர் 30, 2022 ஆகும். மேலும் நிறுவனம் அடுத்த படிகளை ஊழியர்களுக்கு அறிவித்து, வெளியேறும் முறைகளை முடிக்க எதிர்நோக்குகிறது.
வரவிருக்கும் பண்டிகை மாதத்தை மனதில் வைத்து, நிறுவனம், ஒரு நல்லெண்ண நடவடிக்கையாக, அக்டோபர் 14, 2022க்குள் வெளியேறும் செயல்முறையை நிறைவு செய்யும் ஊழியர்களுக்கு 1 மாத மொத்த ஊதியத்திற்கு இணையான கூடுதல் தொகையை கையொப்பமிடும் பலனாக வழங்கவும் முடிவு செய்துள்ளது. இந்தச் செயல்பாட்டில் பொறுமை மற்றும் ஆதரவிற்காக எங்கள் ஊழியர்களுக்கு முன்கூட்டியே நன்றி தெரிவித்துக் கொள்கிறோம், வழிகாட்டுதலுக்காக தமிழ்நாடு அரசு மற்றும் தொழிலாளர் அதிகாரிகளுக்கு நன்றி தெரிவித்துக் கொள்கிறோம்.” என அவர் கூறியுள்ளார்.
தமிழ் இந்தியன் எக்ஸ்பிரஸின் அனைத்துசெய்திகளையும்உடனுக்குடன் டெலிகிராம் ஆப்பில் பெறhttps://t.me/ietamil
