தமிழகத்தில் ரூ.15,000 கோடிக்கு புதிய முதலீடா? - அமைச்சர் டி.ஆர்.பி. ராஜா அறிவிப்புக்கு ஃபாக்ஸ்கான் விளக்கம்

தைவான் மின்னணு உற்பத்தியாளரான ஃபாக்ஸ்கான் (Foxconn) நிறுவனம், தமிழகத்தில் ரூ.15,000 கோடி முதலீடு மற்றும் 14,000 வேலை வாய்ப்புகளை வழங்குவதாக மாநிலத் தொழில்துறை அமைச்சர் டி.ஆர்.பி. ராஜா அறிவித்ததற்கு மறுநாளே, புதிய முதலீடுகள் குறித்து தமிழக அரசுடன் எந்த விவாதமும் நடத்தப்படவில்லை என இன்று (அக்.14) அதிகாரப்பூர்வமாகத் தெரிவித்துள்ளது.

ஃபாக்ஸ்கான் விளக்கம்:

இதுதொடர்பாக ஃபாக்ஸ்கான் நிறுவனம் வெளியிட்டுள்ள அதிகாரப்பூர்வ அறிக்கையில், "ஃபாக்ஸ்கானின் புதிதாக நியமிக்கப்பட்ட இந்தியப் பிரதிநிதி ராபர்ட் வூ, தமிழக முதலமைச்சர் அலுவலகத்துடனும் அவரது குழுவுடனும் உரையாடினார். இந்தக் கூட்டத்தின் போது, புதிய முதலீடு குறித்து விவாதிக்கப்படவில்லை" என்று தெளிவாகக் குறிப்பிடப்பட்டுள்ளது.

அமைச்சரின் அறிவிப்பு: 

ஃபாக்ஸ்கானின் இந்த விளக்கமானது, தொழில்துறை அமைச்சர் டி.ஆர்.பி. ராஜா 'எக்ஸ்' தளத்தில் வெளியிட்ட பதிவுக்குப் பிறகு வந்துள்ளது. அப்பதிவில், ஃபாக்ஸ்கான் நிறுவனத்தின் திட்டத்தை, தமிழகத்தின் பொறியியல் பணிகளுக்கான 'சாதனை அளவிலான உறுதிப்பாடு' என்று அவர் விவரித்திருந்தார். அமைச்சர் தனது பதிவில், "தமிழகத்திற்கான மிகப் பெரிய பொறியியல் வேலைவாய்ப்பு உறுதிப்பாடு! ஃபாக்ஸ்கான் ரூ.15,000 கோடி முதலீடு மற்றும் 14,000 உயர்மதிப்புள்ள வேலைவாய்ப்புகளுக்கு உறுதியளித்துள்ளது. இன்ஜினியர்களே தயாராகுங்கள் என்று குறிப்பிட்டிருந்தார்.

✨LARGEST EVER #engineering#JobsForTN commitment for Tamil Nadu ! #Foxconn commits Rs. 15,000 CRORE in investments and 14,000 JOBS high value jobs ! Engineers get ready !

Tamil Nadu’s investment promotion agency @Guidance_TN will be the "first in India" to have a dedicated… pic.twitter.com/hCK79Mc3Kk

— Dr. T R B Rajaa (@TRBRajaa) October 13, 2025

இந்தத் திட்டத்தைச் 'செயல்பாட்டு முறையில்' (Mission-mode Execution) விரைவுபடுத்தவும், அனுமதிகளை விரைவாகப் பெறவும், தமிழகத்தின் முதலீட்டு மேம்பாட்டு நிறுவனமான 'கைடன்ஸ் தமிழ்நாடு' (Guidance Tamil Nadu)-இல் பிரத்யேகமாக "ஃபாக்ஸ்கான் மேசை (Foxconn Desk)" ஒன்றை அரசு அமைக்கும் என்றும் அமைச்சர் ராஜா அறிவித்திருந்தார். ஃபாக்ஸ்கானின் அடுத்த கட்ட மதிப்புக்கூட்டப்பட்ட உற்பத்தியில் ஆராய்ச்சி மற்றும் மேம்பாடு (R&D) ஒருங்கிணைப்பு மற்றும் AI மூலம் இயக்கப்படும் மேம்பட்ட தொழில்நுட்பச் செயல்பாடுகள் ஆகியவை தமிழகத்தில் அடங்கும் என்றும் அமைச்சர் குறிப்பிட்டிருந்தார்.

தற்போதைய நிலை:

இருப்பினும், ஃபாக்ஸ்கான் அறிக்கையானது, அதன் இந்தியப் பிரதிநிதி ராபர்ட் வூ முதலமைச்சர் மு.க. ஸ்டாலினுடனான சந்திப்பின்போது புதிய உறுதிமொழிகள் எதுவும் வழங்கப்படவில்லை என்று மறைமுகமாக கூறியுள்ளது. தமிழகத்திலுள்ள முந்தைய முதலீட்டுத் திட்டங்கள் தொடர்ந்து நடைபெறுகிறதா என்பது குறித்தும் ஃபாக்ஸ்கான் பிரதிநிதிகள் விளக்கமளிக்கவில்லை. ஃபாக்ஸ்கானின் இந்த அறிக்கைக்குப் பிறகு தமிழக அரசு சார்பில் எந்தத் தனி விளக்கமும் வெளியிடப்படவில்லை.