எஸ்.பி.ஐ. கஸ்டமரா நீங்க? இனி இந்த சேவைக்கு கட்டணம் இல்லை!

இந்தியாவின் மிகப்பெரிய பொதுத்துறை வங்கியான பாரத ஸ்டேட் வங்கி (SBI), தனது வாடிக்கையாளர்களுக்கான உடனடி கட்டண சேவை (IMPS) கட்டணங்களை மாற்றியமைத்துள்ளது. ஆகஸ்ட் 15 முதல் அமலுக்கு வந்துள்ள இந்த மாற்றத்தின்படி, ஆன்லைன் வழியாக நடைபெறும் அதிக மதிப்புள்ள பணப்பரிவர்த்தனைகளுக்கு மட்டும் கட்டணங்கள் விதிக்கப்படும். சிறிய அளவிலான பணப்பரிவர்த்தனைகளுக்கு கட்டணங்கள் எதுவும் இல்லை என்று வங்கி தெளிவுபடுத்தி உள்ளது. இந்நடவடிக்கை, டிஜிட்டல் பணப் பரிவர்த்தனைகளை ஊக்குவிப்பதுடன், சிறு வணிகர்கள் மற்றும் தனிநபர்களுக்கு பெரும் உதவியாக இருக்கும் என எதிர்பார்க்கப்படுகிறது.

ஐ.எம்.பி.எஸ். என்றால் என்ன?

ஐ.எம்.பி.எஸ் (IMPS) என்பது இந்திய தேசிய கொடுப்பனவு கழகத்தால் (NPCI) நிர்வகிக்கப்படும் நிகழ்நேர பணப் பரிவர்த்தனை முறையாகும். இதன் மூலம், வங்கிகளுக்கு இடையிலான பணப் பரிமாற்றங்களை நொடிப்பொழுதில், விடுமுறை நாட்களிலும், வங்கி நேரம் முடிந்த பிறகும் கூட மேற்கொள்ள முடியும். இது, அவசரத் தேவைகளுக்காகப் பணத்தை உடனடியாக அனுப்ப அல்லது பெறுவதற்கு மிகவும் பயனுள்ள ஒரு சேவையாகும்.

புதிய கட்டண விவரங்கள்

எஸ்.பி.ஐ.யின் புதிய விதிமுறைகளின்படி, அனைத்து வாடிக்கையாளர்களும் ஆன்லைன் வழியாக ரூ.25,000 வரையிலான ஐ.எம்.பி.எஸ். பணப் பரிவர்த்தனைகளை எந்தவிதக் கட்டணமும் இல்லாமல் தொடர்ந்து மேற்கொள்ளலாம். இந்த இலவச வரம்பு, தினசரி சிறிய, நடுத்தர அளவிலான பரிவர்த்தனைகளை மேற்கொள்பவர்களுக்கு பெரிய நன்மையளிக்கிறது. ஆனால், ரூ.25,000-க்கு மேல் உள்ள பரிவர்த்தனைகளுக்கு மட்டுமே வங்கி கட்டணம் வசூலிக்கும். அந்த கட்டண விவரங்கள் பின்வருமாறு:

ரூ.25,000-க்கும் மேல் ரூ.1,00,000 வரை: ரூ.2 + ஜிஎஸ்டி

ரூ.1,00,000-க்கும் மேல் ரூ.2,00,000 வரை: ரூ.6 + ஜிஎஸ்டி

ரூ.2,00,000-க்கும் மேல் ரூ.5,00,000 வரை: ரூ.10 + ஜிஎஸ்டி

ரூ.5,00,000-க்கும் மேல்: ரூ.20 + ஜிஎஸ்டி வரை கட்டணம் விதிக்கப்படலாம்.

இந்தக் கட்டணங்கள், ஆன்லைன் பணப் பரிவர்த்தனைகளுக்கு மட்டுமே பொருந்தும். கிளைகள், ஏ.டி.எம்.கள் மற்றும் ஐவிஆர் (IVR) மூலம் மேற்கொள்ளப்படும் பரிவர்த்தனைகளுக்கான கட்டணங்களில் எந்தவித மாற்றமும் செய்யப்படவில்லை என்பது குறிப்பிடத்தக்கது.

யாருக்கெல்லாம் கட்டண விலக்கு?

இந்த புதிய கட்டண விதிமுறைகள், எஸ்பிஐ-யின் சில சிறப்பு கணக்கு வைத்திருப்பவர்களுக்குப் பொருந்தாது. பல்வேறு அரசு, பாதுகாப்பு மற்றும் பெருநிறுவனங்களுக்கான சம்பள தொகுப்பு கணக்கு வைத்திருப்பவர்கள் ஆன்லைன் IMPS பரிவர்த்தனைகளுக்கான தள்ளுபடிகளைத் தொடர்ந்து அனுபவிப்பார்கள். இவர்களுக்கு கட்டண விலக்கு அளிக்கப்படுகிறது.

தள்ளுபடி பெறும் கணக்கு வகைகள்:

பாதுகாப்பு சம்பள தொகுப்பு (DSP)

துணை ராணுவ சம்பள தொகுப்பு (PMSP)

இந்திய கடலோர காவல்படை சம்பள தொகுப்பு (ICGSP)

மத்திய அரசு சம்பள தொகுப்பு (CGSP)

காவல்துறை சம்பள தொகுப்பு (PSP)

ரயில்வே சம்பள தொகுப்பு (RSP)

சௌர்யா குடும்ப ஓய்வூதிய கணக்குகள்

கார்ப்பரேட் சம்பள தொகுப்பு (CSP)

மாநில அரசு சம்பள தொகுப்பு (SGSP)

தொடக்க சம்பள தொகுப்பு (SUSP)

குடும்ப சேமிப்பு கணக்குகள் (SBI Rishte)

இந்திய தேசிய கொடுப்பனவு கழகம் (NPCI), IMPS சேவையை மேலும் மேம்படுத்தி, இந்திய குடிமக்கள் நாள் முழுவதும் ரூ.5 லட்சம் வரை பரிவர்த்தனை வரம்புடன் பயன்படுத்த வழிவகை செய்துள்ளது. இந்த சேவைகளை எஸ்.எம்.எஸ், ஐ.வி.ஆர். சேனல்களிலும் பயன்படுத்தலாம். வாடிக்கையாளர்கள் தங்கள் பணப் பரிவர்த்தனைகளுக்கு விதிக்கப்படும் கட்டணங்களைத் தவிர்ப்பதற்காக, தங்கள் கணக்கு வகைக்கு பொருந்தக்கூடிய விலக்குகளைச் சரிபார்த்துக் கொள்ளுமாறு வங்கி அறிவுறுத்துகிறது.