ஏப்ரல் மாத ஜி.எஸ்.டி வசூல் 2.10 கோடியாக உயர்வு; புதிய சாதனை

இந்தியாவின் மொத்த சரக்கு மற்றும் சேவை வரி (ஜி.எஸ்.டி) வசூல் ஏப்ரல் மாதத்தில் (மார்ச் மாதத்தில் ஆண்டு இறுதி விற்பனைக்காக) ரூ. 2.10 லட்சம் கோடியாக உயர்ந்துள்ளது, என புதன்கிழமை (மே 1) நிதி அமைச்சகம் வெளியிட்ட தரவு காட்டுகிறது.

ஆங்கிலத்தில் படிக்க: GST collection hits record high of Rs 2.10 lakh crore in April

முக்கியமாக உள்நாட்டு பரிவர்த்தனைகளின் அதிகரிப்பு, இது ஆண்டுக்கு ஆண்டு 13.4 சதவீதம் அதிகரித்தது மற்றும் அதிகாரிகளால் வரி ஏய்ப்பு எதிர்ப்பு நடவடிக்கைகளின் பின்னணியில் அதிக இணக்கத்துடன், ஏப்ரல் மாதத்தில் மொத்த ஜி.எஸ்.டி வசூல் 12.4 சதவீதம் அதிகரித்துள்ளது.

மறைமுக வரி விதிப்பு கொண்டு வந்த ஜூலை 2017க்குப் பிறகு பதிவுசெய்யப்பட்ட ஜி.எஸ்.டி வசூலின் அதிகபட்ச நிலை இதுவாகும். ஜி.எஸ்.டி.,யின் கீழ் பதிவு செய்யப்பட்ட முந்தைய அதிகபட்ச அளவு ஏப்ரல் 2023 இல் ரூ 1.87 லட்சம் கோடியாக இருந்தது, இது மார்ச் 2023 இன் ஆண்டு இறுதி விற்பனையைப் பிரதிபலிக்கிறது.

ரீஃபண்டுகளைக் கணக்கிட்ட பிறகு, ஏப்ரல் 2024க்கான நிகர ஜி.எஸ்.டி வருவாய் ரூ. 1.92 லட்சம் கோடியாக இருந்தது, இது கடந்த ஆண்டின் இதே காலத்தை விட 17.1 சதவீதம் அதிகமாகும்.

“மொத்த சரக்கு மற்றும் சேவை வரி (ஜி.எஸ்.டி) வசூல் 2024 ஏப்ரலில் 2.10 லட்சம் கோடி ரூபாயை எட்டியது. இது ஆண்டுக்கு ஆண்டு குறிப்பிடத்தக்க 12.4 சதவீத வளர்ச்சியைக் குறிக்கிறது, உள்நாட்டு பரிவர்த்தனைகள் (13.4 சதவீதம் வரை) மற்றும் இறக்குமதிகளில் (8.3 சதவீதம் வரை) வலுவான அதிகரிப்பால் இந்த வளர்ச்சி நிகழ்ந்துள்ளது” என்று நிதி அமைச்சகம் ஒரு அறிக்கையில் தெரிவித்துள்ளது.

முந்தைய மாதத்தில், நிகர அடிப்படையில், ரீஃபண்டுகளின் தாக்கத்தை கணக்கில் எடுத்துக்கொண்டால், ஜி.எஸ்.டி வருவாய் 18.4 சதவீதம் உயர்ந்து ரூ.1.65 லட்சம் கோடியாக இருந்தது. 2023-24 முழு நிதியாண்டில், நிகர ஜி.எஸ்.டி வருவாய் ரூ.18.01 லட்சம் கோடியாக இருந்தது, இது கடந்த ஆண்டின் இதே காலத்தை விட 13.4 சதவீதம் வளர்ச்சியாகும்.

ஏப்ரல் மாதத்தில், 38 மாநிலங்கள்/யூனியன் பிரதேசங்களில் (மத்திய அரசின் அதிகார வரம்பு உட்பட), 19 மாநிலங்கள்/யூனியன் பிரதேசங்கள் ஜி.எஸ்.டி வசூலில் தேசிய சராசரியான 12.4 சதவீத வளர்ச்சியை விட அதிக வளர்ச்சியைப் பதிவு செய்துள்ளன.

முழுமையான அடிப்படையில், மகாராஷ்டிரா ரூ.37,671 கோடி (13 சதவீத வளர்ச்சி), கர்நாடகா ரூ.15,978 கோடி (9 சதவீத வளர்ச்சி) மற்றும் ரூ.13,301 கோடி (13 சதவீத வளர்ச்சி) வசூலுடன் முதலிடத்தில் உள்ளன. 

உத்தரபிரதேசம் ரூ.12,290 கோடி வசூலுடன் (19 சதவீத வளர்ச்சி), தமிழ்நாடு ரூ.12,210 கோடி (6 சதவீத வளர்ச்சி), ஹரியானா ரூ.12,168 கோடி வசூல் (21 சதவீத வளர்ச்சி) பெற்றுள்ளன.

பொருளாதார நடவடிக்கைகள் மற்றும் அதிகாரிகளின் ஜி.எஸ்.டி தணிக்கை ஆகியவை இந்த அதிக வசூல் சாதனையில் பிரதிபலித்துள்ளதாக வரி நிபுணர்கள் தெரிவித்துள்ளனர்.

"ஜி.எஸ்.டி வசூல்களின் நிலையான வளர்ச்சி, இது எப்போதும் இல்லாத அதிகபட்ச வசூலாக இருப்பது ஒரு பெரிய உற்சாகம் மற்றும் வலுவான உள்நாட்டுப் பொருளாதாரத்தைப் பிரதிபலிக்கிறது, குறிப்பாக உள்நாட்டு பரிவர்த்தனைகளின் கணக்கில் வளர்ச்சி 13.4 சதவீதமாக உள்ளது, இது இறக்குமதியுடன் ஒப்பிடும்போது 8.3 சதவீதமாக உள்ளது. இந்த வளர்ச்சிக்கான மற்றொரு குறிப்பிடத்தக்க காரணம் ஜி.எஸ்.டி தணிக்கைக்கான காலக்கெடு மற்றும் இந்த ஆண்டில் வெளியிடப்பட்ட அறிவிப்புகளுடன் இணைக்கப்படலாம்,” என்று KPMG இன் மறைமுக வரியின் பங்குதாரர் மற்றும் தேசியத் தலைவர் அபிஷேக் ஜெயின் கூறினார்.

ஒட்டுமொத்தமாக, ஏப்ரல் மாதத்தில் மொத்த ஜி.எஸ்.டி வசூல் ரூ.2,10,267 கோடியாக இருந்தது, இதில் மாநிலங்களுக்கு இடையேயான பொருட்கள் மற்றும் சேவைகளுக்கு மத்திய அரசு விதிக்கும் வரியான மத்திய ஜி.எஸ்.டி - ரூ.43,846 கோடி, மாநிலங்களுக்கு இடையேயான சரக்குகள் மற்றும் சேவைகளுக்கு விதிக்கப்படும் மாநில வரியான மாநில ஜி.எஸ்.டி - ரூ. 53,538 கோடி, அனைத்து மாநிலங்களுக்கு இடையேயான சரக்குகள் மற்றும் சேவைகளின் மீது விதிக்கப்பட்ட வரியான ஒருங்கிணைந்த ஜி.எஸ்.டி - ரூ. 99,623 கோடி (பொருட்களின் இறக்குமதியில் சேகரிக்கப்பட்ட ரூ. 37,826 கோடி உட்பட) மற்றும் செஸ் (பொருட்களின் இறக்குமதியில் வசூலான ரூ.1,008 கோடி உட்பட) ரூ.13,260 கோடியாக இருந்தது.

ஏப்ரல் மாதத்தில், ஒருங்கிணைந்த ஜி.எஸ்.டி.,யில் இருந்து மத்திய ஜி.எஸ்.டி.,க்கு ரூ.50,307 கோடியும், மாநில ஜி.எஸ்.டி.,க்கு ரூ.41,600 கோடியும் அரசு செட்டில் செய்தது. இதன் விளைவாக, தீர்வுக்குப் பிந்தைய மாதத்திற்கான மொத்த வருவாய் மத்திய அரசுக்கு ரூ.94,153 கோடியாகவும், மாநில ஜி.எஸ்.டி.,க்கு ரூ.95,138 கோடியாகவும் இருந்தது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“