ஜிஎஸ்டி 2.0 அறிமுகம்: இனி 2 வரி அடுக்குகள் மட்டுமே- இன்சூரன்ஸ், வீட்டு உபயோகப் பொருட்கள் விலை இனி குறையும்

எட்டு ஆண்டுகளாகப் பல்வேறு சிக்கல்களுடன் இயங்கிவந்த ஜி.எஸ்.டி. வரிவிதிப்பு முறையில், மக்களுக்குச் சாதகமான பெரும் மாற்றங்கள் கொண்டுவரப்பட்டுள்ளன. 56-வது ஜி.எஸ்.டி. கவுன்சில் கூட்டத்தில், நடுத்தர மக்களின் வரிச்சுமையைக் குறைக்கும் வகையில், பல்வேறு முக்கிய முடிவுகள் எடுக்கப்பட்டுள்ளன. நிதி அமைச்சர் நிர்மலா சீதாராமன் தலைமையில் நடந்த இந்தக் கூட்டம், வழக்கமான இரண்டு நாட்களுக்குப் பதிலாக, ஒரே நாளில் 10 மணி நேரத்திற்கும் மேலாக நீடித்தது. பல்வேறு மாநிலங்கள் வருவாய் இழப்பு குறித்த கவலையை எழுப்பிய போதிலும், மக்களின் நலனை மையமாகக் கொண்டு இந்த சீர்திருத்தங்கள் நிறைவேற்றப்பட்டுள்ளன.

என்னென்ன மாற்றங்கள்?

ஒரே வரி, குறைவான சுமை: இனி ஜி.எஸ்.டி.யில் 5%, 12%, 18%, 28% என நான்கு வரி அடுக்குகள் இருக்காது. மாறாக, 5% மற்றும் 18% என இரண்டு அடுக்குகள் மட்டுமே இருக்கும். ஆடம்பரப் பொருட்கள் மற்றும் புகையிலை போன்ற பொருட்களுக்கு மட்டும் 40% வரி தொடரும். இந்த மாற்றங்கள் செப்டம்பர் 22, 2025 முதல் அமலுக்கு வரும். இது, நவராத்திரியின் முதல் நாள் என்பதால், இது ஒரு புதிய பொருளாதாரப் பயணத்திற்கான தொடக்கமாக இருக்கும் என்று பலரும் கூறுகின்றனர்.

அன்றாடப் பொருட்களுக்கு வரி குறைப்பு: பழச்சாறுகள், வெண்ணெய், சீஸ், பாஸ்தா, தேங்காய் தண்ணீர் போன்ற உணவுப் பொருட்களுக்கும், மருத்துவப் பொருட்களான ஆக்ஸிஜன், பேண்டேஜ், நோயறிதல் கருவிகளுக்கும் ஜி.எஸ்.டி. 12%-ல் இருந்து 5% ஆகக் குறைக்கப்பட்டுள்ளது. மேலும், அல்ட்ரா-ஹை டெம்பரேச்சர் பால், பன்னீர், ரொட்டி, ரப்பர் போன்ற பொருட்களுக்கு ஜி.எஸ்.டி. முற்றிலும் நீக்கப்பட்டுள்ளது.

வீட்டு உபயோகப் பொருட்கள் மலிவு: சோப்பு, ஷாம்பூ, பற்பசை, சைக்கிள்கள், சமையலறை உபகரணங்கள் போன்ற பொருட்களுக்கு ஜி.எஸ்.டி. 12% அல்லது 18%-ல் இருந்து 5% ஆகக் குறைக்கப்பட்டுள்ளது. ஏ.சி, தொலைக்காட்சி, டிஷ்வாஷர் போன்ற மின்சாதனப் பொருட்களுக்கு வரி 28%-ல் இருந்து 18% ஆக குறைந்துள்ளது.

வாகனத் துறையில் சலுகை: 1200 சிசி-க்கு குறைவான பெட்ரோல் கார்கள், 1500 சிசி-க்கு குறைவான டீசல் கார்கள் இனி 18% வரி அடுக்கில் வரும். 350 சிசி-க்கு குறைவான மோட்டார் சைக்கிள்கள் மற்றும் அனைத்து வாகன உதிரி பாகங்களுக்கும் வரி 18% ஆகக் குறைக்கப்பட்டுள்ளது.

காப்பீட்டுக்கு இனி வரி இல்லை: தனிநபர் சுகாதார காப்பீடு (ஃபேமிலி ஃபுளோட்டர் உள்பட), ஆயுள் காப்பீட்டுத் திட்டங்கள் ஆகியவற்றுக்கு ஜி.எஸ்.டி. வரி முற்றிலும் நீக்கப்பட்டு பெரும் நிவாரணம் அளிக்கப்பட்டுள்ளது. ஜிம்கள், சலூன்கள், யோகா மையங்கள் போன்ற சேவைகளுக்கான வரியும் 18%ல் இருந்து 5% ஆகக் குறைக்கப்பட்டுள்ளது.

ஜி.எஸ்.டி. கவுன்சிலின் இந்த முடிவுகள் குறித்துப் பேசிய பிரதமர் நரேந்திர மோடி, "இந்த சீர்திருத்தங்கள் பொதுமக்களுக்கும், விவசாயிகளுக்கும், சிறு வணிகர்களுக்கும், இளைஞர்களுக்கும் பயனளிக்கும். இது குடிமக்களின் வாழ்க்கையை மேம்படுத்துவதுடன், வர்த்தகம் செய்வதை எளிதாக்கும்" என்று தெரிவித்துள்ளார்.

வருவாய் இழப்பு இல்லை:

சில மாநிலங்கள் வருவாய் இழப்பு ஏற்படும் என்று கவலை தெரிவித்தாலும், மத்திய வருவாய் துறை செயலாளர் அரவிந்த் ஸ்ரீவாஸ்தவா, "இந்த சீர்திருத்தங்களால் சுமார் ரூ. 48,000 கோடி நிகர வருவாய் கிடைக்கும் என்று மதிப்பிடப்பட்டுள்ளது. இது நிதி ரீதியாக நிலையானது" என்று கூறியுள்ளார்.

இந்த புதிய ஜி.எஸ்.டி. சீர்திருத்தங்கள், வரி அமைப்பை எளிமையாக்கி, மக்களுக்குப் பெரும் பொருளாதார நிவாரணம் அளிக்கும் என்று எதிர்பார்க்கப்படுகிறது.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.