ஐ.டி.ஆர். ஃபைலிங்: 'ஆண்டுத் தகவல் அறிக்கை' ஈஸியா டவுன்லோட் செய்ய டிப்ஸ்

வருமான வரி தாக்கல் செய்வதற்கான காலக்கெடு நெருங்கிவிட்டது! செப்டம்பர் 15-ஆம் தேதிக்குப் பிறகு அபராதம் செலுத்த நேரிடலாம். வருமான வரி தாக்கல் செய்யத் தேவையான தகவல்களைச் சேகரிக்க சிரமப்படுபவர்களுக்கு ஒரு எளிய வழி இருக்கிறது! அதுதான் 'ஆண்டுத் தகவல் அறிக்கை' (Annual Information Statement) அல்லது 'AIS'. வருமான வரித் துறை வெளியிடும் இந்த அறிக்கை, உங்கள் வரி தாக்கலை எளிதாக்க உதவுகிறது.

ஆண்டுத் தகவல் அறிக்கை (AIS) என்றால் என்ன?

ஆண்டுத் தகவல் அறிக்கை (AIS) என்பது, ஒரு நிதியாண்டில் உங்கள் பான் கார்டுடன் (PAN) தொடர்புடைய அனைத்து நிதிப் பரிவர்த்தனைகளின் விரிவான தொகுப்பு ஆகும். இதில் சம்பளம் மட்டுமன்றி, வட்டி வருமானம், டிவிடெண்ட் வருமானம், பங்குகள் மற்றும் சொத்துக்களின் விற்பனை/வாங்குதல், வெளிநாடுகளிலிருந்து வரும் பணம் போன்ற பல்வேறு தகவல்களும் அடங்கும். இந்தத் தகவல்கள் அனைத்தும் உங்கள் கணக்குகள் உள்ள வங்கிகள், பரஸ்பர நிதி நிறுவனங்கள் (Mutual Funds), பங்குச் சந்தைகள் போன்ற பல்வேறு நிறுவனங்களால் வருமான வரித் துறைக்குச் சமர்ப்பிக்கப்படுகின்றன.

ஆண்டுத் தகவல் அறிக்கை (AIS) அறிக்கையைப் பெறுவது எப்படி? 
 
வருமான வரி இ-தாக்கல் இணையதளத்திற்குச் செல்லவும்.

உங்கள் பயனர் பெயர் (User ID) மற்றும் கடவுச்சொல்லை (Password) உள்ளிட்டு உள்நுழையவும்.

டாஷ்போர்டில் உள்ள 'Annual Information Statement' என்பதைக் கிளிக் செய்யவும். அல்லது, 'e-File' மெனுவில் 'Income Tax Return' என்பதைத் தேர்ந்தெடுத்து, பிறகு 'View AIS' என்பதைத் தேர்ந்தெடுக்கவும்.

'proceed' என்ற பட்டனைக் கிளிக் செய்தால், நீங்கள் AIS போர்ட்டலுக்குத் திருப்பி விடப்படுவீர்கள்.

புதிய இணையப்பக்கம் திறந்ததும், AIS இணைப்பைக் கிளிக் செய்யவும்.

இறுதியாக, அறிக்கையை PDF அல்லது JSON/CSV வடிவத்தில் பதிவிறக்கம் செய்ய, 'download' என்ற விருப்பத்தை அழுத்தவும்.

ஆண்டுத் தகவல் அறிக்கை (AIS) ஆவணத்தைத் திறப்பது எப்படி?

நீங்கள் பதிவிறக்கம் செய்யும் ஆண்டுத் தகவல் அறிக்கை ஆவணம் கடவுச்சொல் மூலம் பூட்டப்பட்டிருக்கும். இதைக் கடவுச்சொல்லால் மட்டுமே திறக்க முடியும்.

தனிநபர்களுக்கு, கடவுச்சொல் என்பது உங்கள் பான் எண் (PAN) ஆங்கிலச் சிறிய எழுத்துக்களில், அதனுடன் உங்கள் பிறந்த தேதி (DDMMYYYY) சேர்த்து எழுத வேண்டும்.

உதாரணமாக, உங்கள் பான் எண் AAAAA0000A மற்றும் பிறந்த தேதி 01.01.2025 என்றால், உங்கள் கடவுச்சொல் aaaaa0000a01012025.

நிறுவனங்கள் அல்லது தனிநபர் அல்லாத வரி செலுத்துவோருக்கு, இது நிறுவனத்தின் தேதி அல்லது உருவாக்கப்பட்ட தேதியாக இருக்கும்.

இந்த ஆண்டு தகவல் அறிக்கையானது, வருமான வரி தாக்கல் செய்வதை எளிதாக்குவதோடு, நீங்கள் வருமானம் ஈட்டிய அனைத்து வழிகளையும் ஒற்றை ஆவணத்தில் பார்க்க உதவுகிறது. இது வருமான வரி தாக்கல் செய்யும் செயல்முறையை இன்னும் எளிதாகவும், துல்லியமாகவும் ஆக்குகிறது.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.