7.3 கோடி பேர் வருமான வரி தாக்கல்… ஆனாலும் இ-ஃபைலிங் குளறுபடிகள்: கடைசி நிமிடப் போராட்டத்தைத் தவிர்க்க இந்த 3 வழிகளை யூஸ் பண்ணுங்க

இந்த ஆண்டு வருமான வரி தாக்கல் கடைசி தேதி நெருங்க நெருங்க, பரபரப்புக்கு பஞ்சமே இல்லை. வருமான வரித் துறை, வரி செலுத்துவோரின் புகார்களையும், கடைசி நேர நெரிசலையும் கருத்தில் கொண்டு, வருமான வரி தாக்கல் செய்வதற்கான காலக்கெடுவை ஒரு நாள் நீட்டித்து செப்டம்பர் 16, 2025 வரை அவகாசம் அளித்தது. ஆனால், இந்த நீட்டிப்புக்கு ஒரு நாள் முன்னதாகவே, வருமான வரித் துறை ஒரு புதிய சாதனையை எட்டியுள்ளது. கடந்த ஆண்டு (2024) ஜூலை 31 வரை தாக்கல் செய்யப்பட்ட 7.28 கோடி ITR-களைக் கடந்து, இந்த ஆண்டு (மதிப்பீட்டு ஆண்டு 2025-26) இதுவரை 7.3 கோடி (தற்காலிக எண்ணிக்கை) வருமான வரி அறிக்கைகள் தாக்கல் செய்யப்பட்டுள்ளன. இது, நாடு முழுவதும் வரி செலுத்துபவர்களின் எண்ணிக்கை, விழிப்புணர்வு, மற்றும் இணக்கம் அதிகரிப்பதை தெளிவாகக் காட்டுகிறது.

தொழில்நுட்ப சவால்களுக்கு மத்தியில் ஒரு சாதனை:

கடைசி நேர அவசரத்தில், வருமான வரி இ-ஃபைலிங் போர்ட்டலில் ஏற்பட்ட தொழில்நுட்பக் கோளாறுகள், லாகின் சிக்கல்கள், மற்றும் போர்ட்டல் மெதுவாகச் செயல்பட்டது போன்ற காரணங்களால் பலர் சிரமப்பட்டனர். சமூக வலைத்தளங்களில், வரி செலுத்துவோர் மற்றும் வரி ஆலோசகர்கள் தங்கள் அதிருப்தியை வெளிப்படுத்தினர். சிலர், பல மணிநேரம் முயற்சித்தும், கணக்குகளைத் தாக்கல் செய்ய முடியாமல் போனதாக புகார் தெரிவித்தனர். இந்த தொழில்நுட்ப சவால்களுக்கு மத்தியிலும், வருமான வரி தாக்கல் எண்ணிக்கை கடந்த ஆண்டை விட அதிகரித்திருப்பது பாராட்டத்தக்கது.

கடந்த சில ஆண்டுகளாக, வருமான வரி தாக்கல் செய்பவர்களின் எண்ணிக்கை தொடர்ந்து அதிகரித்து வருகிறது.

*2023-24 மதிப்பீட்டு ஆண்டு: 6.77 கோடி 

*2024-25 மதிப்பீட்டு ஆண்டு: 7.28 கோடி 

*2025-26 மதிப்பீட்டு ஆண்டு: இதுவரை 7.3 கோடி ITRகள் தாக்கல் செய்யப்பட்டுள்ளன.

இந்த புள்ளிவிவரங்கள், தொழில்நுட்ப முன்னேற்றங்கள், அரசின் விழிப்புணர்வு பிரச்சாரங்கள் மற்றும் வரி செலுத்துவோர் மத்தியில் அதிகரித்து வரும் பொறுப்புணர்ச்சி ஆகியவற்றைக் காட்டுகிறது.

நிபுணர்களின் கூற்றுப்படி, வருமான வரி தாக்கல் அதிகரிப்பதற்கு சில முக்கிய காரணங்கள் உள்ளன:

அதிகரிக்கும் வரி இணக்கம்: ஊதியம் பெறும் ஊழியர்கள், தொழில் வல்லுநர்கள், சிறு வணிக உரிமையாளர்கள் ஆகியோர் அபராதங்களைத் தவிர்க்கவும், வரி திரும்பப் பெறுவதைத் துரிதப்படுத்தவும் சரியான நேரத்தில் தங்கள் வருமான வரிகளை தாக்கல் செய்கின்றனர்.

விரிவடையும் வரி அடிப்படை: இந்தியாவில் வரி செலுத்துவோரின் எண்ணிக்கை தொடர்ந்து அதிகரித்து வருகிறது.

டிஜிட்டல் பயன்பாடு: தொழில்நுட்பக் கோளாறுகள் இருந்தபோதிலும், இ-ஃபைலிங் போர்ட்டலின் பயன்பாடு அதிகரித்துள்ளது.

கடைசி நிமிடப் போராட்டத்தைத் தவிர்ப்பது எப்படி?

மத்திய நேரடி வரிகள் வாரியம் (CBDT) காலக்கெடுவை நீட்டித்தாலும், கடைசி நிமிட அவசரத்தைத் தவிர்க்க வரி செலுத்துவோருக்கு சில ஆலோசனைகளை வழங்கியுள்ளது.

கேஷை க்ளியர்: உங்கள் பிரவுசரின் கேஷை (cache) மற்றும் குக்கீகளை நீக்குவது போர்ட்டலை வேகமாக அணுக உதவும்.

வேறு பிரவுசர்: வேறு பிரவுசரைப் பயன்படுத்தலாம் அல்லது இன்காக்னிடோ பயன்முறையில் முயற்சி செய்யலாம்.

நெட்வொர்க் இணைப்பு: வேறு இணைய இணைப்பை (Wi-Fi அல்லது மொபைல் ஹாட்ஸ்பாட்) பயன்படுத்த முயற்சிப்பது தொழில்நுட்ப சிக்கல்களைத் தீர்க்க உதவும்.

காலக்கெடுவைத் தவறவிட்டால் என்ன நடக்கும்?

செப்டம்பர் 16-ஆம் தேதிக்கு பிறகு வருமான வரி தாக்கல் செய்பவர்கள் கடுமையான விளைவுகளை சந்திக்க நேரிடும்.

அபராதம்: தாமதமாக தாக்கல் செய்தால் ரூ. 5,000 வரை அபராதம் விதிக்கப்படலாம்.

வட்டி: செலுத்தப்படாத வரித் தொகைக்கு மாதத்திற்கு 1% வட்டி விதிக்கப்படும்.

இழப்பு: மூலதன இழப்புகள் போன்ற நடப்பு ஆண்டின் இழப்புகளை எதிர்கால ஆண்டுகளில் ஈடுசெய்யும் வாய்ப்பை இழக்க நேரிடும்.

ஆய்வுக்கு உட்படும் அபாயம்: வருமான வரித் துறையிலிருந்து நோட்டீஸ் அல்லது ஆய்வுக்கு உட்படும் அபாயம் அதிகரிக்கலாம்.

எனவே, இந்த கடைசி அவகாசத்தை பயன்படுத்தி, அனைத்து வரி செலுத்துவோரும் தங்கள் வருமான வரிகளை உடனடியாக தாக்கல் செய்வது அவசியம்.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.