![nirmala sitaraman budget 2024](https://img-cdn.thepublive.com/fit-in/1280x960/filters:format(webp)/indian-express-tamil/media/media_files/xbgPMApKVyr8LsVOYy2F.jpg)
மத்திய நிதியமைச்சர் நிர்மலா சீதாராமன் செவ்வாயன்று 2024-25 ஆம் ஆண்டுக்கான மத்திய பட்ஜெட்டை அமைச்சரவை ஒப்புதல் அளித்த பிறகு தாக்கல் செய்தார். நிர்மலா சீதாராமன் தனது பட்ஜெட் உரையில் பல வேலை வாய்ப்புகளை உருவாக்கும் நடவடிக்கைகளை பட்டியலிட்டார். இந்தியாவில் வேலைவாய்ப்பை உருவாக்குவதற்கு அரசாங்கம் எடுக்கவிருக்கும் சில முக்கிய நடவடிக்கைகள் இங்கே கொடுக்கப்பட்டுள்ளன.
1). ஊக்கத்தொகையுடன் இன்டர்ன்ஷிப் திட்டம்
நிர்மலா சீதாராமன், “மோடி அரசின் 5வது புதிய திட்டத்தின் கீழ் 500 முன்னணி நிறுவனங்களில் இன்டர்ன்ஷிப் ஊக்குவிக்கப்படும். 1 கோடி இளைஞர்கள் அரசின் இன்டர்ன்ஷிப் திட்டத்தில் பயன்பெறுவார்கள். இன்டர்ன்ஷிப் திட்டத்தின் கீழ் மாதம் ரூ.5000 மற்றும் ஒருமுறை உதவியாக ரூ.6,000 வழங்கப்படும். அரசாங்கத்தின் இன்டர்ன்ஷிப் திட்டத்தின் கீழ் நிறுவனங்கள் தங்கள் சி.எஸ்.ஆர் (CSR) நிதியில் இருந்து பயிற்சி செலவுகளை ஏற்க வேண்டும்,” என்று தெரிவித்தார்.
2). இளைஞர் திறன் திட்டம்
அரசு ஊக்குவித்த நிதியிலிருந்து உத்தரவாதத்துடன் ரூ. 7.5 லட்சம் வரையிலான கடன்களை எளிதாக்கும் வகையில் இளைஞர் திறன் திட்ட ஒதுக்கீடு, உயர்த்தப்பட்ட மாதிரி திறன் கடன் திட்டம் என திருத்தப்படும் என்று நிதியமைச்சர் கூறினார். மாதிரி திறன் கடன் திட்டம் மூலம் ஆண்டுக்கு 25,000 மாணவர்கள் பயன்பெறுவார்கள்.
3). வேலை வாய்ப்பு வளர்ச்சிக்கான திட்டம்
நிர்மலா சீதாராமன், ஒருவர் வேலையில் சேர்ந்த முதல் நான்கு ஆண்டுகளில் பணியாளர் மற்றும் நிறுவனம் ஆகிய இருவருக்கும் குறிப்பிட்ட அளவில் ஊக்கத்தொகை வழங்கப்படும் என்று கூறினார். “மாதம் ரூ. 1 லட்சம் சம்பளத்தில் உள்ள அனைத்து வேலைகளும் கணக்கிடப்படும். மாதம் 3,000 ரூபாயை நிறுவனங்களுக்கு அரசாங்கம் திருப்பிச் செலுத்த வேண்டும். ஒவ்வொரு கூடுதல் பணியாளருக்கும் இரண்டு ஆண்டுகளுக்கு இ.பி.எஃப்.ஓ பங்களிப்பு வழங்கப்படும்,” என்று நிர்மலா சீதாராமன் தெரிவித்தார்.
4). வேலைவாய்ப்பை உருவாக்குவதற்கான மூன்று திட்டங்கள்
நிதியமைச்சர் கூறுகையில், “வேலைவாய்ப்பை உருவாக்க 3 திட்டங்களை அரசு அமைக்க உள்ளது. அனைத்துத் துறைகளிலும் புதிதாகப் பணிபுரியும் அனைத்து நபர்களுக்கும் 1 மாத ஊதியம் வழங்குவதற்கான முதல் முறை பணியாளர்களுக்கான திட்டம் செயல்படுத்தப்படும். 2.1 கோடி இளைஞர்கள் பயன்பெறும் வகையில் முதல்முறை வேலைவாய்ப்புத் திட்டம் செயல்படுத்தப்படும்,” என்றார்.
அடுத்த ஐந்து ஆண்டுகளில் அரசாங்கம் 24 பில்லியன் டாலர்களை வேலை வாய்ப்பை ஊக்குவிக்கவும் மற்றும் கிராமப்புற செலவுகளை அதிகரிக்கவும் செலவழிக்கும் என்று நிதியமைச்சர் நிர்மலா சீதாராமன் செவ்வாய்க்கிழமை தெரிவித்தார்.
பிரதமர் நரேந்திர மோடி தலைமையிலான பாரதிய ஜனதா கட்சியின் (BJP) அறுதிப் பெரும்பான்மையை இழக்கச் செய்து, கூட்டணிக் கட்சிகளைச் சார்ந்து ஆட்சி அமைப்பதற்கு, கிராமப்புறங்களில் ஏற்பட்டுள்ள நெருக்கடி மற்றும் பலவீனமான வேலைச் சந்தை ஆகியவை மோசமான தேர்தல் செயல்திறனுக்கு காரணம் என்று ஆய்வாளர்கள் குற்றம் சாட்டினர்.
அரசாங்கம் 2.66 டிரில்லியன் ரூபாயை ($32 பில்லியன்) கிராமப்புற மேம்பாட்டிற்காக செலவிடும் என்று நிர்மலா சீதாராமன் கூறினார், அதே நேரத்தில் இரண்டு முக்கிய கூட்டணி கட்சிகள் தலைமையிலான மாநிலங்களுக்கான புதிய திட்டங்களை வெளியிட்டார்.
வேலைவாய்ப்பைத் தூண்டும் வகையில், உற்பத்தித் துறையில் உள்ள நிறுவனங்கள் உட்பட நிறுவனங்களுக்கு அரசாங்கம் ஊக்கத்தொகையை வழங்கும், திறன்களை மேம்படுத்துவதற்கான திட்டங்கள் செயல்படுத்தப்படும், உயர்கல்விக்கான மானியக் கடன்கள் வழங்கப்படும் என்று நிர்மலா சீதாராமன் கூறினார்.
நகர்ப்புறங்களில் இந்தியாவின் அதிகாரப்பூர்வ வேலையின்மை விகிதம் 6.7% ஆகும், ஆனால் தனியார் நிறுவனமான சென்டர் ஃபார் மானிட்டரிங் இந்தியன் எகானமி இதை 8.4% ஆக உயர்த்துகிறது.
2017-18 நிதியாண்டிலிருந்து ஒவ்வொரு ஆண்டும் 20 மில்லியன் புதிய வேலை வாய்ப்புகள் உருவாகியுள்ளதாக இந்த மாதம் அரசாங்கத் தரவுகள் காட்டுகின்றன, ஆனால் தனியார் பொருளாதார வல்லுநர்கள் சுய வேலைவாய்ப்பு மற்றும் தற்காலிக பண்ணை பணியமர்த்தல் ஆகியவை இந்த எண்ணிக்கையின் பெரும்பகுதிக்கு காரணம் என்று கூறியுள்ளனர்.
இந்தியாவின் நுகர்வோர் பங்குகள் 1.5% உயர்ந்து சாதனை படைத்தது.
நீண்ட கால உள்கட்டமைப்பு திட்டங்களுக்கான செலவினத்தை 11.11 டிரில்லியன் ரூபாயில் அரசாங்கம் பராமரிக்கும், அத்தகைய செலவினங்களுக்கு நிதியளிப்பதற்காக மாநிலங்களுக்கு 1.5 டிரில்லியன் ரூபாய் நீண்ட கால கடன்களை வழங்குகிறது.
இந்தக் கடன்களில் சில சீர்திருத்தத்தில் எட்டப்பட்ட மைல்கற்களுடன் இணைக்கப்படும், நிலம் மற்றும் தொழிலாளர் போன்ற பகுதிகளை உள்ளடக்கியதாக இருக்கும், அரசாங்கம் தனது மூன்றாவது பதவிக்காலத்தில் இதனை தொடர உத்தேசித்துள்ளதாக நிர்மலா சீதாராமன் கூறினார்.
அரசாங்கத்தின் கூட்டணி கட்சிகளுக்கு ஒரு சலுகையில், கிழக்கு மாநிலமான பீகார் மற்றும் தெற்கு மாநிலமான ஆந்திரப் பிரதேசத்திற்கான பலதரப்பு துறைகளிடமிருந்து கடன்களை விரைவாக வழங்குவதாக நிர்மலா சீதாராமன் கூறினார்.
2024-25 ஆம் ஆண்டில் நிதிப் பற்றாக்குறையை மொத்த உள்நாட்டு உற்பத்தியில் 4.9% ஆக குறைக்க அரசாங்கம் திட்டமிட்டுள்ளது, இது பிப்ரவரியின் இடைக்கால பட்ஜெட்டில் 5.1% ஆக இருந்தது. அதன் மொத்தச் சந்தைக் கடன்களை 14.01 டிரில்லியன் ரூபாயாகக் குறைத்தது.
கூடுதல் தகவல்கள்: ராய்ட்டர்ஸ்
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
Stay updated with the latest news headlines and all the latest Lifestyle news. Download Indian Express Tamil App - Android or iOS.