ரத்தன் டாடாவுக்கு பின் தலைவராக நோயல் தேர்வு; டாடா குழுமத்தில் அதிக பங்குகளை வைத்திருப்பது யார்?

டாடா குழுமம் சமீபத்தில் அதன் தலைவரான ரத்தன் டாடாவை இழந்தது, இந்தியாவின் மிகவும் பிரியமான கோடீஸ்வரரான ரத்தன் டாடா தனது 86 வயதில் அக்டோபர் 9 (புதன்கிழமை) அன்று மும்பை மருத்துவமனையில் காலமானார். அடுத்த நாள், ரத்தன் டாடா, மும்பையின் வொர்லியில் உள்ள மின்சார மயானத்தில் முழு அரசு மரியாதையுடன் தகனம் செய்யப்பட்டார்.

கடந்த மூன்று தசாப்தங்களில் வணிகத்தைப் பற்றி படித்து வருபவர்களுக்கு, ரத்தன் டாடா, டாடா குழுமத்தை உள்நாட்டு வணிக நிறுவனமாக இருந்து உலகளாவிய குழுமமாக எப்படி மாற்றினார் என்பது தெரியும், இன்று டாடா குழுமம் $403 பில்லியன் (ரூ. 33.7 டிரில்லியன்களுக்கு மேல்) மதிப்புடையது. மேலும் 30 நிறுவனங்கள் 100க்கும் மேற்பட்ட நாடுகளில் பரவியுள்ளன. ரத்தன் டாடாவின் மறைவுக்குப் பிறகு, $403 பில்லியன் டாடா குழுமத்தின் பெரும்பான்மை பங்குதாரர்களான டாடா டிரஸ்ட்ஸின் தலைவராக அவரது ஒன்றுவிட்ட சகோதரர் நோயல் டாடா நியமிக்கப்பட்டுள்ளார்.

ஆனால் டாடா குழுமம் மற்றும் டாடா சன்ஸ் ஆகியவற்றின் பெரும்பான்மை பங்குதாரர் யார்?. ஆச்சரியப்படும் விதமாக பதில் ரத்தன் டாடாவோ அல்லது அவரது ஒன்றுவிட்ட சகோதரர் நோயல் டாடாவோ அல்லது டாடா குடும்பத்தைச் சேர்ந்த வேறு யாரோ இல்லை. உண்மையில், டாடா சன்ஸ் பங்குகளில் முறையே 27.98% மற்றும் 23.56% பங்குகளை சர் டோராப்ஜி டிரஸ்ட் மற்றும் சர் ரத்தன் டாடா டிரஸ்ட் வைத்திருக்கின்றன.

ரத்தன் டாடாவைப் போலவே, டாடா குழுமம் அதன் சமூக சேவை முயற்சிகளுக்கு புகழ்பெற்றது, இதன் விளைவாக குழுவின் 66 சதவீத பங்குகள் பல்வேறு தொண்டு மற்றும் சமூக நடவடிக்கைகளில் ஈடுபட்டுள்ள டாடா அறக்கட்டளைகளால் கூட்டாக உள்ளன. மார்ச் 31, 2024 நிலவரப்படி, சர் டோராப்ஜி டிரஸ்ட் மற்றும் சர் ரத்தன் டாடா டிரஸ்ட் ஆகியவை டாடா சன்ஸ் நிறுவனத்தின் 27.98% மற்றும் 23.56% பங்குகளை வைத்திருக்கும் மிகப்பெரிய பங்குதாரர்களாக உள்ளன. ஜே.ஆர்.டி டாடா அறக்கட்டளை 4.01%, டாடா கல்வி அறக்கட்டளை மற்றும் டாடா சமூக நல அறக்கட்டளை 3.73% பங்குகளை வைத்துள்ளன. எம்.கே டாடா டிரஸ்ட் 0.6% மற்றும் சர்வஜனிக் சேவா டிரஸ்ட் 0.1% பங்குகளை வைத்துள்ளன.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“