தொடரும் தொழிலாளர்கள் போராட்டம்; தமிழகத்தில் சாம்சங் நிறுவனத்தின் எதிர்காலம் கேள்விக்குறி

தமிழகத்தில் உள்ள சாம்சங் நிறுவனத்தில் தற்போது நடைபெற்று வரும் தொழிலாளர் வேலைநிறுத்தம் தீர்க்கப்படாமல் இருந்தால் சாம்சங் எலக்ட்ரானிக்ஸ் நிறுவனம் அதன் ஒரு பகுதி அல்லது அனைத்து உற்பத்தி செயல்பாடுகளையும் தமிழ்நாட்டிற்கு வெளியே நகர்த்தக்கூடும் என்று பல அறிக்கைகள் தெரிவிக்கின்றன என ஃபினான்ஷியல் எக்ஸ்பிரஸ் செய்தி வெளியிட்டுள்ளது.

தமிழக அரசின் முக்கிய அமைச்சர்கள் தலையிட்டும், சாம்சங்கின் சென்னை ஆலையில் ஏற்பட்ட பிரச்சனைகளை தீர்க்கத் தவறியதை அடுத்து, தொழிலாளர் வேலைநிறுத்தம் வியாழக்கிழமை இரண்டாவது மாதத்தை எட்ட உள்ளது.

அண்டை மாநிலமான ஆந்திரப் பிரதேசம், குஜராத்துடன் இணைந்து, சாம்சங் நிறுவனத்தை தங்கள் பிராந்தியங்களில் உற்பத்தித் தளங்களை நிறுவ ஊக்குவிப்பதாக நிலைமையை நன்கு அறிந்த வட்டாரம் தெரிவித்துள்ளது. ஏற்கனவே நொய்டாவில் சாம்சங் ஸ்மார்ட்போன் உற்பத்தி ஆலையைக் கொண்ட உத்தரபிரதேசமும் போட்டியாளர்களில் ஒன்றாகும் என்று அந்த ஆதாரம் தெரிவித்துள்ளது.

சாம்சங் இந்தியா நிறுவனம் மற்ற மாநில அரசுகளுடன் பேச்சுவார்த்தை நடத்தி வருகிறதா அல்லது தமிழ்நாட்டில் இருந்து நடவடிக்கைகளை மாற்றத் திட்டமிடுகிறதா என்பது குறித்து நேரடியாக கருத்து தெரிவிக்கவில்லை. “உற்பத்தி, ஆராய்ச்சி & மேம்பாடு, பொறுப்புள்ள குடியுரிமை மற்றும் மாற்றத்திற்கான கண்டுபிடிப்புகள் ஆகியவற்றில் முதலீடுகள் மூலம் தேசத்தைக் கட்டியெழுப்புவதற்கான அவர்களின் பார்வையை உணர, இந்திய அரசு மற்றும் நாங்கள் இருக்கும் பல்வேறு மாநிலங்களுடன் நாங்கள் தொடர்ந்து பணியாற்றுவோம். தமிழக அரசின் ஆதரவுக்கு நாங்கள் நன்றி தெரிவித்துக் கொள்கிறோம்,” என்று சாம்சங் இந்தியாவின் செய்தித் தொடர்பாளர் ஃபினான்ஷியல் எக்ஸ்பிரஸ்ஸிடம் கூறினார்.

சாம்சங்கின் சென்னை ஆலையில் உற்பத்தி கணிசமாக பாதிக்கப்பட்டுள்ளது, 1,500 க்கும் மேற்பட்ட தொழிலாளர்கள் அல்லது 80% க்கும் அதிகமான தொழிலாளர்கள் செப்டம்பர் 9 முதல் வேலைநிறுத்தத்தில் உள்ளனர். தொழிலாளர்கள் சிறந்த ஊதியம், மேம்பட்ட வேலை நிலைமைகள் மற்றும் தங்கள் தொழிற்சங்கத்தின் அங்கீகாரம் ஆகியவற்றைக் கோரி போராடி வருகின்றனர். குளிர்சாதனப் பெட்டிகள், சலவை இயந்திரங்கள் மற்றும் ஏர் கண்டிஷனர்கள் போன்ற நுகர்வுப் பொருட்களை உற்பத்தி செய்யும் சென்னை ஆலை, இந்தியாவில் சாம்சங்கின் FY23க்கான $12 பில்லியன் விற்பனையில் ஐந்தில் ஒரு பங்கைக் கொண்டிருந்ததாக மதிப்பிடப்பட்டுள்ளது.
எவ்வாறாயினும், உற்பத்தித் தளத்தை மற்ற மாநிலங்களுக்கு மாற்றுவது பற்றிய அறிக்கைகள் அரசாங்கத்தையும் தொழிலாளர்களையும் தனக்குச் சாதகமாக மாற்றுவதற்கான, தென் கொரிய நிறுவனமான சாம்சங் நிறுவனத்தின் தந்திரமாக இருக்கலாம் என்று ஒரு நிர்வாக ஆலோசகர் குறிப்பிட்டார்.

திங்களன்று, சாம்சங் எலக்ட்ரானிக்ஸ் இந்தியா ஒரு தொழிலாளர்கள் குழுவுடன் ஒப்பந்தத்தில் (MoA) கையெழுத்திட்டது, அக்டோபர் 2024 முதல் மார்ச் 2025 வரை மாதாந்திர 'உற்பத்தி உறுதிப்படுத்தல் ஊக்கத்தொகை' ரூபாய் 5,000 உட்பட பல சலுகைகளை வழங்க வேண்டும், குளிரூட்டப்பட்ட பேருந்து வழித்தடங்களை ஐந்தில் இருந்து 108க்கு விரிவுபடுத்த வேண்டும் மற்றும் ஒரு தொழிலாளி இறந்தால் உடனடி உதவியாக ரூ.1 லட்சம் வழங்க வேண்டும் ஆகியவை குறித்து ஒப்பந்தங்கள் கையெழுத்தாகின.

இந்த ஒப்பந்தம் தமிழ்நாடு தொழில்துறை அமைச்சர் டி.ஆர்.பி ராஜா மற்றும் இரண்டு அமைச்சர்கள் தலைமையில் சாம்சங் நிர்வாகம் மற்றும் தொழிலாளர்களின் ஒரு பிரிவினருடன் தொழிலாளர் அமைதியின்மையை முடிவுக்குக் கொண்டுவருவதற்கான பலகட்ட சந்திப்புகளைத் தொடர்ந்து வந்தது.

எவ்வாறாயினும், போராட்டங்களை ஆதரிக்கும் இந்திய தொழிற்சங்கங்களின் மையம் (சி.ஐ.டி.யு), சாம்சங் இந்தியா தொழிலாளர் சங்கத்தின் (SIWU) அங்கீகாரம் என்ற முக்கிய பிரச்சினையை தீர்க்கத் தவறியதைக் காரணம் காட்டி, ஒப்பந்தத்தை நிராகரித்தது. நீதிமன்றத்தில் வழக்கு நிலுவையில் உள்ளதால் தொழிற்சங்க விவகாரத்தில் அரசு தலையிட முடியாது என்று அமைச்சர் டி.ஆர்.பி ராஜா கூறினார்.

சி.ஐ.டி.யு தமிழ்நாடு மாநில செயலாளரும், அங்கீகரிக்கப்படாத எஸ்.ஐ.டபிள்யூ.யு தலைவருமான முத்துக்குமார், வேலைநிறுத்தம் வழக்கம் போல் தொடர்கிறது என்று ஃபினான்ஷியல் எக்ஸ்பிரஸ்ஸிடம் இடம் கூறினார். தொழிலாளர் குழு முழு தொழிலாளர்களையும் பிரதிநிதித்துவப்படுத்தவில்லை என்று வாதிட்டு, தொழிலாளர்களின் ஒப்பந்தத்தை நிராகரித்துள்ளதாக முத்துக்குமார் கூறினார்.

இதற்கிடையில், ஸ்ரீபெரும்புதூர் ஆலைக்கு அருகில் உள்ள தற்காலிக கூடாரத்தில் நூற்றுக்கணக்கான தொழிலாளர்கள் ஒன்று கூடினர், அங்கு தொழிலாளர்கள் செப்டம்பர் 9 முதல் போராட்டத்தில் ஈடுபட்டுள்ளனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“