யூபிஐ பரிவர்த்தனை வரம்பு அதிகரிப்பு: இனி ரூ. 10 லட்சம் வரை பணம் அனுப்பலாம்!

இந்திய டிஜிட்டல் பணப் பரிவர்த்தனையின் தூணாக விளங்கும் யூபிஐ (UPI) சேவையில், செப்டம்பர் 15 முதல் பெரிய மாற்றங்கள் அமலுக்கு வந்துள்ளன. அதிக மதிப்புள்ள பரிவர்த்தனைகளை எளிதாக்கும் நோக்கில், பர்சன்-டு-மெர்சன்ட் (P2M) பரிவர்த்தனைகளுக்கான வரம்பை அதிகரிப்பதாக தேசியப் பணப் பரிவர்த்தனைக் கழகம் (என்பிசிஐ) அறிவித்துள்ளது. இதன் மூலம், இனி பெரிய தொகைகளை செலுத்துவதற்கு பல வழிகளைத் தேட வேண்டிய அவசியம் இல்லை.

இருப்பினும், தனிநபருக்கு இடையேயான (P2P) பரிவர்த்தனைகளுக்கான ஒரு நாளைக்கான ஒரு லட்சம் ரூபாய் வரம்பு மாறவில்லை.

புதிய உச்ச வரம்புகள்:

பெரும்பாலான நேரங்களில், பயனர்கள் பெரிய தொகைகளைச் செலுத்தும்போது, அதைப் பல தவணைகளாகப் பிரித்துச் செலுத்துவார்கள். அல்லது காசோலை, வங்கிக் கணக்கு மூலம் பணம் செலுத்தும் பழங்கால முறைகளுக்கு மாறுவார்கள். இந்த வரம்பு உயர்வு, நீண்டகாலமாக இருந்துவந்த இந்தப் பிரச்சினையைத் தீர்க்கிறது.

பங்குச் சந்தை, காப்பீடு: பங்குச் சந்தை முதலீடுகள் மற்றும் காப்பீட்டுத் தொகை செலுத்துதலுக்கான ஒரு பரிவர்த்தனை வரம்பு 2 லட்சத்திலிருந்து 5 லட்சமாக உயர்த்தப்பட்டுள்ளது. ஒரு நாளைக்கு அதிகபட்சமாக 10 லட்சம் ரூபாய் வரை செலுத்தலாம்.

அரசு மின்னணு சந்தை (GeM): அரசு மின்னணு சந்தை, வரி செலுத்துதல் போன்றவற்றுக்கு, ஒரு பரிவர்த்தனைக்கான வரம்பு 1 லட்சத்திலிருந்து 5 லட்சமாக உயர்த்தப்பட்டுள்ளது.

பயணம்: பயணத் துறையில், விமான டிக்கெட், ஹோட்டல் முன்பதிவுகளுக்கான பரிவர்த்தனை வரம்பு 1 லட்சத்திலிருந்து 5 லட்சமாக அதிகரிக்கப்பட்டுள்ளது. ஒரு நாளைக்கு அதிகபட்சமாக 10 லட்சம் ரூபாய் வரை செலுத்தலாம்.

கிரெடிட் கார்ட் பில் செலுத்துதல்: கிரெடிட் கார்ட்  பில் செலுத்துதலுக்கும், ஒரு பரிவர்த்தனையில் 5 லட்சம் ரூபாய் வரை அனுமதிக்கப்பட்டுள்ளது. ஒரு நாளில் அதிகபட்சமாக 6 லட்சம் ரூபாய் வரை செலுத்தலாம்.

கடன், இஎம்ஐ: கடன் மற்றும் இஎம்ஐ தொகையை, ஒரு பரிவர்த்தனைக்கு 5 லட்சம் ரூபாய் வரையும், ஒரு நாளில் 10 லட்சம் ரூபாய் வரையும் செலுத்தலாம்.

நகை வாங்குதல்: நகை வாங்குதலுக்கான யுபிஐ வரம்பு ஒரு பரிவர்த்தனைக்கு 1 லட்சத்திலிருந்து 2 லட்சமாகவும், ஒரு நாளைக்கு 6 லட்சமாகவும் அதிகரிக்கப்பட்டுள்ளது.

வங்கி சேவை: டிஜிட்டல் முறையிலான வங்கிச் சேவைகளில், கால வைப்பு (term deposits) போன்றவற்றுக்கு, ஒரு பரிவர்த்தனைக்கும் ஒரு நாளுக்கும் 5 லட்சம் ரூபாய் வரை செலுத்த முடியும். இதற்கு முன்னர் 2 லட்சம் ரூபாய் மட்டுமே இருந்தது.

பாதுகாப்புக்கு கூடுதல் கவனம்:

இந்த வரம்பு அதிகரிப்பால், மோசடி அபாயங்கள் கூடும் என்ற கவலைகள் எழுந்துள்ளன. ஆனால், என்.பி.சி.ஐ இதையும் கருத்தில் கொண்டு பல புதிய பாதுகாப்பு நடவடிக்கைகளை அறிமுகப்படுத்தியுள்ளது.

அதிக மதிப்புள்ள பரிவர்த்தனைகளுக்கு கட்டாய மல்டி ஃபேக்டர் ஆதெண்டிகேஷன் (Multi-Factor Authentication).

மெஷின் லர்னிங் அல்காரிதம் (Machine Learning Algorithms) மூலம் தொடர் பரிவர்த்தனை கண்காணிப்பு.

வணிகர்களை சரிபார்க்கும் செயல்முறையை மேலும் கடுமையாக்குதல்.

பயனர்களுக்கு என்ன நன்மை?

பணத்தை பிரித்து அனுப்ப வேண்டிய அவசியம் இல்லை: பெரிய தொகைகளை செலுத்தும்போது பல பரிவர்த்தனைகளாகப் பிரித்து அனுப்ப வேண்டிய சிக்கல் இனி இருக்காது.

வேகமும் வசதியும்: வங்கிக் கணக்கு மாற்றங்கள் அல்லது காசோலைகள் போன்ற பாரம்பரிய முறைகளைக் காட்டிலும், நொடிப் பொழுதில் பணம் செலுத்துவது சாத்தியமாகிறது.

விரிவான பயன்கள்: சிறு கடைகள் முதல் பெரிய வணிக நிறுவனங்கள் வரை UPI இப்போது அனைத்து வகையான பணப் பரிவர்த்தனைகளுக்கும் ஒரு முழுமையான தீர்வாக உருவெடுத்துள்ளது.

இந்த நடவடிக்கை, இந்தியாவின் டிஜிட்டல் பொருளாதார வளர்ச்சிக்கு மேலும் ஊக்கம் அளிக்கும். நிதிச் சேவைகளின் ஆழமான ஊடுருவலுக்கு இது வழிவகுக்கும் என நிதித் தொழில்நுட்ப வல்லுநர்கள் கருத்து தெரிவித்துள்ளனர். UPI-யை வெறும் சில்லறை வர்த்தகத்திற்கு மட்டும் என்ற நிலை மாறி, இப்போது அதிக மதிப்புள்ள பரிவர்த்தனைகளுக்கும் ஒரு நம்பகமான தளமாக நிலைநிறுத்தப்பட்டுள்ளது. இது இந்தியாவின் நிதிச் சூழலில் ஒரு புதிய அத்தியாயத்தைத் தொடங்கி வைத்துள்ளது என்பதில் சந்தேகமில்லை.