டி.சி.எஸ் நிறுவனத்திற்கு அமெரிக்கா புதிய நெருக்கடி: 'அமெரிக்கர்களை பணிநீக்கம் செய்துவிட்டு தெற்கு ஆசியர்களை சேர்ப்பதா?'

H-1B விசா ஆட்சேர்ப்பு விளம்பரங்களை டி.சி.எஸ் மறைக்கிறதா, அமெரிக்க ஊழியர்களுக்குப் பதிலாக வெளிநாட்டு ஊழியர்களை நியமிக்கிறதா அல்லது H-1B பணியமர்த்தலை மூன்றாம் தரப்பு பணியமர்த்தல் நிறுவனங்களிடம் ஒப்படைக்கிறதா என்றும் அமெரிக்கச் சட்டமியற்றுபவர்கள் விசாரித்து வருகின்றனர்.

அமெரிக்க செனட்டர்கள் H-1B விசா திட்டத்திற்கு எதிராக முக்கிய அமெரிக்க நிறுவனங்களின் உயர்மட்ட நிர்வாகத்திடம் சண்டையிட்டு வருகின்றனர். செனட் நீதித்துறை கமிட்டியின் தலைவரான சக் கிராஸ்லி மற்றும் தரவரிசை உறுப்பினரான டிக் டர்பின் ஆகியோர் அமேசான், ஆப்பிள், காக்னிசென்ட் டெக்னாலஜி சொல்யூஷன்ஸ், டெலாய்ட், கூகிள், ஜேபி மோர்கன் சேஸ், மெட்டா, மைக்ரோசாப்ட், டாடா கன்சல்டன்சி சர்வீசஸ் (டி.சி.எஸ்) மற்றும் வால்மார்ட் உள்ளிட்ட 10 முக்கிய அமெரிக்க நிறுவனங்களுக்குக் கடிதம் எழுதியுள்ளனர்.

நிறுவனங்களுக்கு அனுப்பப்பட்ட கடிதங்கள்

இந்த 10 அமெரிக்க நிறுவனங்களின் தலைமைச் செயல் அதிகாரிகளுக்கு (சி.இ.ஓ) அனுப்பப்பட்ட கடிதங்களில் இருந்து வெளிப்படும் மிகப்பெரிய கவலை என்னவெனில், அமெரிக்கத் தொழிலாளர்கள் கணிசமாகப் பணிநீக்கம் செய்யப்பட்டதைத் தொடர்ந்து, இந்த அமெரிக்க நிறுவனங்கள் ஆயிரக்கணக்கான H-1B திறன்சார் விசா மனுக்களைப் பதிவு செய்யும் நடைமுறையாகும்.

வெளிநாட்டு ஊழியர்களைப் பணியமர்த்துவதற்கான H-1B விசா திட்டம், அமெரிக்காவின் குடியேற்றம் இல்லாத தற்காலிக ஊழியர்களுக்கு எதிரான இந்தச் சர்ச்சையின் மையமாக உள்ளது. அமெரிக்க நிறுவனங்கள், அமெரிக்கத் தொழிலாளர்களைக் குறைந்த ஊதியத்தில் உள்ள குறைந்த திறன் கொண்ட வெளிநாட்டு ஊழியர்களைக் கொண்டு மாற்றுவதாகக் குற்றம் சாட்டப்படுகின்றன.

அமெரிக்க நிறுவனங்களுக்கு அனுப்பப்பட்ட கடிதங்களில், அமெரிக்கச் சட்டமியற்றுபவர்கள் சமீபத்திய ஆண்டுகளில் நிறுவனத் தலைவர்களால் வழிநடத்தப்பட்ட பெரிய அளவிலான பணிநீக்கங்களைக் குறிப்பிட்டு, தொழில்நுட்ப ஊழியர்கள் மற்றும் சமீபத்திய ஸ்டெம் (STEM) பட்டதாரிகளிடையே அதிகரித்து வரும் வேலையின்மையை எடுத்துரைத்துள்ளனர்.

இந்தக் கடிதங்களை அனுப்பியுள்ள ஒன்பது அமெரிக்க நிறுவனங்களில் டாடா கன்சல்டன்சி சர்வீசஸ் (டி.சி.எஸ்) மட்டுமே இந்திய நிறுவனம் ஆகும். அனைத்து நிறுவனங்களும் அக்டோபர் 10-க்குள் பதிலளிக்குமாறு கேட்கப்பட்டுள்ளன.

டி.சி.எஸ்-க்கு அனுப்பப்பட்ட கடிதத்தில் கூறப்பட்டுள்ளதாவது:

“டி.சி.எஸ் நிறுவனம் சமீபத்தில் அமெரிக்க ஊழியர்கள் உட்பட, உலகளவில் 12,000-க்கும் மேற்பட்ட ஊழியர்களைப் பணிநீக்கம் செய்வதாக அறிவித்தது. உதாரணமாக, கடந்த மாதம் ஜாக்சன்வில்லில் உள்ள டி.சி.எஸ் அலுவலகத்தில் மட்டும் சுமார் ஐந்து டஜன் ஊழியர்களைப் பணிநீக்கம் செய்தது.

அமெரிக்க ஊழியர்களை நீங்கள் பணிநீக்கம் செய்த அதே வேளையில், ஆயிரக்கணக்கான வெளிநாட்டு ஊழியர்களுக்கான H-1B விசா மனுக்களைப் பதிவு செய்து வருகிறீர்கள். நிதி ஆண்டு 2025-ல், டி.சி.எஸ் 5,505 H-1B ஊழியர்களைப் பணியமர்த்த ஒப்புதல் பெற்றது, இதன் மூலம் டி.சி.எஸ் புதிதாக அங்கீகரிக்கப்பட்ட H-1B பயனாளிகளின் இரண்டாவது பெரிய நிறுவனமாகத் திகழ்கிறது.

உள்நாட்டு அமெரிக்கத் திறமையாளர்கள் அனைவரும் புறக்கணிக்கப்படும்போது, இந்தக் காலியிடங்களை நிரப்பத் தகுதிவாய்ந்த அமெரிக்கத் தொழில்நுட்ப ஊழியர்களை டி.சி.எஸ்-ஆல் கண்டுபிடிக்க முடியவில்லை என்பதை நம்புவது கடினமாக உள்ளது.

டி.சி.எஸ் ஏற்கனவே, அதிக வயதுடைய அமெரிக்க ஊழியர்களைப் பணிநீக்கம் செய்துவிட்டு, அதற்குப் பதிலாகப் புதிதாகப் பணியமர்த்தப்பட்ட தெற்காசிய H-1B ஊழியர்களை நியமித்ததாகக் கூறி சம வேலைவாய்ப்பு வாய்ப்பு ஆணையத்தின் விசாரணையில் உள்ளது. இந்த விசாரணை நடந்து கொண்டிருக்கும்போது, அமெரிக்கர்களுக்குப் பதிலாக H-1B ஊழியர்களை நியமிப்பது டி.சி.எஸ்-க்குச் சாதகமாக அமையாது.

விளக்கம் அளிப்பதற்கான வாய்ப்பை நாங்கள் உங்களுக்கு வழங்க விரும்புகிறோம். பொருத்தமான தரவுகளுடன், பின்வரும் கேள்விகளுக்கு அக்டோபர் 10, 2025-க்குள் பதிலளிக்கவும்."

கேட்கப்பட்ட கேள்விகள்

கடந்த சில ஆண்டுகளாக நூறாயிரக்கணக்கான அமெரிக்கத் தொழில்நுட்ப ஊழியர்கள் பணிநீக்கம் செய்யப்பட்டுள்ள நிலையில், டி.சி.எஸ் ஏன் வெளிநாட்டுத் தொழில்நுட்ப ஊழியர்களைப் பணியமர்த்துகிறது?

H-1B மனுக்களைத் தாக்கல் செய்வதற்கு முன், காலியாக உள்ள இடங்களை அமெரிக்கர்களைக் கொண்டு நிரப்ப டி.சி.எஸ் நல்லெண்ண முயற்சி எடுக்கிறதா? விரிவாக விளக்கமளிக்கவும்.

பொதுவான ஆட்சேர்ப்பு விளம்பரங்களில் இருந்து H-1B ஆட்சேர்ப்பு விளம்பரங்களைத் தனியாகப் பட்டியலிட்டு டி.சி.எஸ் மறைக்கிறதா?

டி.சி.எஸ் ஏதேனும் அமெரிக்க ஊழியர்களை H-1B ஊழியர்களைக் கொண்டு இடம்பெயரச் செய்துள்ளதா?

உங்கள் நிறுவனத்தில் H-1B ஊழியர்களுக்கு, அதே தகுதியுடைய அமெரிக்க ஊழியர்களுக்கு வழங்கப்படும் அதே ஊதியம் மற்றும் சலுகைகள் வழங்கப்படுகின்றனவா? குறிப்பிட்ட விவரங்களை வழங்கவும்.

டி.சி.எஸ்-இல் நிலை ஒன்று (Level one) ஊதியத்தில் எத்தனை H-1B ஊழியர்கள் பணியமர்த்தப்பட்டனர்? அந்த ஊழியர்களில் எத்தனை பேர் இன்னும் நிலை ஒன்று ஊதியத்தில் பணிபுரிகிறார்கள்?

உங்கள் நிறுவனத்தில் H-1B ஊழியர்களை பணியமர்த்தும் ஒப்பந்தக்காரர்கள் அல்லது பணியமர்த்தல் நிறுவனங்களிடம் டி.சி.எஸ் ஏதேனும் அவுட்சோர்சிங் செய்கிறதா?

தற்போது டி.சி.எஸ்-இல் பணிபுரியும் H-1B ஊழியர்களில், எத்தனை பேர் நேரடியாக டி.சி.எஸ்-ஆல் பணியமர்த்தப்பட்டு, ஊதியம் வழங்கப்படுகிறார்கள்?

2025-இல் டி.சி.எஸ் ஒப்புதல் பெற்ற H-1B மனுக்களில், எத்தனை ஊழியர்கள் மற்ற நிறுவனங்களுக்கு அவுட்சோர்ஸ் செய்யப்பட்டனர், மேலும் எத்தனை ஊழியர்களின் ஊதியம் டி.சி.எஸ் தவிர வேறு ஒரு நிறுவனத்தால் வழங்கப்பட்டது?