யூஸ்டு கார்களுக்கு லோன்: எந்தெந்த வங்கிகளில் கிடைக்கும்? அப்பளை செய்வது எப்படி?

கார் வாங்குவது பலரின் வாழ்வில் ஒரு முக்கிய கனவாகும். ஆனால், ஒரு புதிய காரை மட்டுமே வாங்க வேண்டும் என்பதில்லை. புதிய காரின் விலை சற்று அதிகமாக இருப்பதாக நினைப்பவர்களுக்கு பழைய கார் வாங்குவது ஒரு சிறந்த தேர்வாக இருக்கிறது. மேலும், நிதி பற்றாக்குறை உள்ளவர்களுக்கு, பயன்படுத்தப்பட்ட கார் கடன் (Used Car Loan) இப்பணியை சுலபமாக்க உதவும். எளிமையாகச் சொல்ல வேண்டுமானால், பயன்படுத்தப்பட்ட கார் கடன் என்பது, ஒரு செகண்ட்-ஹேண்ட் வாங்குவதற்காக வழங்கப்படும் நிதி வசதியாகும். இதன் மூலம் எந்தச் சிரமமும் இல்லாமல் கடன் பெற்று வாகனத்தை வாங்கலாம்.

பயன்படுத்தப்பட்ட கார் கடன்கள் குறிப்பிட்ட நோக்கங்களுக்காக வழங்கப்படுவதால், பொதுவான வாகனக் கடன்களுக்குச் சிறந்த விதிமுறைகளை வழங்குகின்றன. இருப்பினும், பல நிதிப் பொறுப்புகளை நிர்வகிப்பவர்களுக்கு, தனிநபர் கடன் (Personal Loan) ஒரு மாற்றுத் தீர்வாக இருக்கும்.

இந்தியாவில் பயன்படுத்தப்பட்ட கார் கடன்களை வழங்குபவர்கள் யார்?

இந்தியாவில் பல வங்கிகள் மற்றும் நிதி நிறுவனங்கள் பயன்படுத்தப்பட்ட வாகனங்களை வாங்குவதற்கு நிதி வசதிகளை வழங்குகின்றன. ஒவ்வொன்றும் மாறுபட்ட வட்டி விகிதங்கள், கடன் காலங்கள் மற்றும் தகுதித் தேவைகளை கொண்டுள்ளன. அவற்றில் சிலவற்றை இங்கே பார்க்கலாம்:

ஹெச்.டி.எஃப்.சி வங்கி: ரூ. 2.5 கோடி வரை பயன்படுத்தப்பட்ட கார் கடன்களை வழங்குகிறது. காரின் மதிப்பில் 100% வரை நிதி கிடைக்கும். வட்டி விகிதங்கள் ஆண்டுக்கு 11.50% முதல் 17.50% வரை, விண்ணப்பதாரரின் சுயவிவரத்தைப் பொறுத்து மாறுபடும்.

எஸ்,பி.ஐ: ரூ. 3 லட்சம் முதல் ரூ. 1 கோடி வரை பயன்படுத்தப்பட்ட கார் கடன்களை எஸ்,பி.ஐ வழங்குகிறது. வட்டி விகிதங்கள் ஆண்டுக்கு 11.75% முதல் 15.25% வரை மாறுபடும்.

ஐ.சி.ஐ.சி.ஐ வங்கி: இந்த வங்கி ஆண்டுக்கு 11.25% வட்டி விகிதத்தில் இருந்து தொடங்கும்  பயன்படுத்தப்பட்ட கார் கடன்களை வழங்குகிறது. துல்லியமான வட்டி விகிதம் விண்ணப்பதாரரின் சிபில் ஸ்கோர் மற்றும் காரின் வகையைப் பொறுத்து அமையும். 12 முதல் 84 மாதங்கள் வரை கடன்களைப் பெறலாம், காரின் மதிப்பில் 100% வரை நிதி கிடைக்கும்.

ஆக்சிஸ் வங்கி: பயன்படுத்தப்பட்ட காரின் மதிப்பில் 100% வரை கடன்களை வழங்குகிறது. வட்டி விகிதங்கள் ஆண்டுக்கு 13.55% முதல் 15.80% வரை இருக்கும்.

டி.வி.எஸ் கிரெடிட்: காரின் மதிப்பில் 95% வரை நிதி கிடைக்கும். டி.வி.எஸ் கிரெடிட், வருமானச் சான்று இல்லாமல் கடன்களை வழங்குகிறது. கடனாளிகள் 12 முதல் 60 மாதங்கள் வரையிலான திருப்பிச் செலுத்தும் காலத்தைத் தேர்வு செய்யலாம், வட்டி விகிதங்கள் 13% முதல் 18% வரை இருக்கும்.

ஸ்ரீராம் ஃபைனான்ஸ்: கடன் பெறும் நபர் தகுதியைப் பொறுத்து 85% வரை நிதி வழங்குகிறது. வட்டி விகிதங்கள் ஆண்டுக்கு 10% இல் இருந்து தொடங்குகின்றன. கடன் காலம் 48 மாதங்கள் வரை நீட்டிக்கப்படுகிறது.

மேற்கண்டவற்றுடன், பல தேசியமயமாக்கப்பட்ட மற்றும் தனியார் வங்கிகளும் பல்வேறு வாடிக்கையாளர் தேவைகளுக்கு ஏற்ப பயன்படுத்தப்பட்ட கார் கடன்களை வழங்குகின்றன.

பயன்படுத்தப்பட்ட கார் கடன்களுக்கான நிபந்தனைகள்:

பெரும்பாலான கடன் வழங்குநர்கள் பயன்படுத்தப்பட்ட கார் கடன் விண்ணப்பதாரர்களுக்கு ஒரே மாதிரியான நிபந்தனைகளை பின்பற்றுகின்றன. 

1. 21 முதல் 65 வயதுக்குட்பட்டவராக இருக்க வேண்டும்.

2. நிலையான வருமானம் கொண்ட சம்பளம் பெறுபவராக அல்லது சுயதொழில் செய்பவராக இருக்க வேண்டும்.

3. திருப்திகரமான சிபில் ஸ்கோர் (பொதுவாக 700 க்கு மேல்) கொண்டவராக இருக்க வேண்டும்.

கடன் விண்ணப்ப செயல்முறைகள்:

தகுதி அளவுகோல்களைச் சரிபார்க்கவும்: உங்கள் வருமானம், கிரெடிட் ஸ்கோர் மற்றும் கடன் வழங்குநரின் குறிப்பிட்ட தேவைகளுடன் நீங்கள் பொருந்துகிறீர்களா என்பதை உறுதிப்படுத்தவும்.

கடன் விதிமுறைகளைச் சரிபார்க்கவும்: அதிகபட்ச LTV (Loan-to-Value), கடன் காலம் மற்றும் வருமானச் சான்று அல்லது வாகன ஆய்வு தேவைப்படுகிறதா என்பது குறித்த கடன் வழங்குநரின் கொள்கைக்கு அதிக கவனம் செலுத்துங்கள்.

உங்கள் ஆவணங்களைத் தயார் செய்யவும்: அடையாளச் சான்று (ஆதார் அட்டை, பாஸ்போர்ட்), முகவரிச் சான்று (மின்சாரக் கட்டணங்கள், வாடகை ஒப்பந்தம்), வயதுச் சான்று (PAN அட்டை, ஓட்டுநர் உரிமம்), வருமானச் சான்று (வங்கிக் கணக்கு அறிக்கைகள், ITR), வாகன ஆவணங்கள் (RC புத்தகம், காப்பீடு)  போன்றவை அவசியமாகும்.

விண்ணப்பத்தைச் சமர்ப்பிக்கவும்: ஆன்லைனில் அல்லது நேரில் விண்ணப்பப் படிவத்தைப் பூர்த்தி செய்து தேவையான ஆவணங்களை பதிவேற்றவும் அல்லது சமர்ப்பிக்கவும்.

மதிப்பீடு மற்றும் ஒப்புதல்: கடன் வழங்குநர் வாகனத்தின் தற்போதைய மதிப்பை, பெரும்பாலும் ஒரு நேரடி ஆய்வு மூலம், மதிப்பீடு செய்து பின்னர் உங்கள் விண்ணப்பத்தைச் செயல்படுத்துவார். ஒப்புதல் கிடைத்தவுடன், அனுமதிக்கப்பட்ட கடன் தொகை உங்கள் வங்கிக் கணக்கிற்கு அல்லது கார் விற்பனையாளருக்கு நேரடியாக வரவு வைக்கப்படும். 

இ.எம்.ஐ மற்றும் கடன் திருப்பிச் செலுத்துதல் குறித்து அறிந்துகொள்ளுதல்:

பயன்படுத்தப்பட்ட கார் கடன்கள், மற்ற வாகனக் கடன்களைப் போலவே, சமமான மாதாந்திர தவணைகள் (இ.எம்.ஐ) மூலம் திருப்பிச் செலுத்தப்படுகின்றன. ஒவ்வொரு மாதமும் நீங்கள் எவ்வளவு திருப்பிச் செலுத்துவீர்கள் என்பதைப் புரிந்துகொள்ள, வங்கிகள் அல்லது நிதி இணையதளங்கள் வழங்கும் ஆன்லைன் இ.எம்.ஐ கால்குலேட்டர்களைப் பயன்படுத்தவும். இந்த கருவிகள் கடன் தொகை, வட்டி விகிதம், செயலாக்கக் கட்டணம் மற்றும் காலம் ஆகியவற்றின் அடிப்படையில் உங்கள் மாதாந்திர செலவை மதிப்பிட உதவுகின்றன.