புதிய உச்சத்தை நோக்கி தங்கம் விலை... மலிவு விலையில் நாணயம் வாங்கலாம்; எப்படி தெரியுமா?

சரியாக ஒரு மாதத்திற்கு முன்பு, அதாவது ஏப்ரல் 22 அன்று, இந்தியாவில் 10 கிராம் தங்கத்தின் விலை வரலாறு காணாத உச்சமாக ரூ. 1 லட்சத்தைத் தொட்டது. அப்போது, "தங்கம் மலிவானது இல்லை" என்று நீங்கள் நினைத்திருக்கலாம்.

அதிக தங்க விலை என்பது பணவீக்கம் போன்றது – அதே ரூபாய்க்கு நீங்கள் குறைவாகவே வாங்க முடிகிறது. 2020 இல், நீங்கள் ரூ. 50,000 க்கு பத்து கிராம் தங்கம் வாங்க முடிந்த நிலையில்; இன்று அதே தொகைக்கு 5 கிராம் மட்டுமே கிடைக்கிறது.

அப்படியானால் நீங்கள் என்ன செய்ய வேண்டும்? தங்கம் வாங்குவது ஒரு முறை நடக்கும் செயல் அல்ல. உங்கள் ஒட்டுமொத்த நிதித் திட்டத்தின் ஒரு பகுதியாக காலப்போக்கில் அதைச் சேர்த்துக்கொண்டே இருக்க வேண்டும்.

நீங்கள் ஏன் தங்கம் வாங்க வேண்டும் என்பதில் தெளிவு வேண்டும் – இது முதலீட்டு நோக்கத்திற்காகவா அல்லது அணியும் நகையாகவா அல்லது திருமண நோக்கத்திற்காகவா?

நீங்கள் தங்க நகை வாங்க விரும்பினால், நகைகளில் 5% முதல் 20% வரை 'செய் கூலி' உள்ளது. இது உங்கள் முதலீட்டு தொகையை குறைக்கும். எனவே, தங்க நாணயங்களை வாங்குவதைக் கருத்தில் கொள்ளலாம்.

தங்க நாணயங்கள்

உங்கள் பணப்பையில் இருக்கும் ரூ. 1, ரூ. 5, அல்லது ரூ. 20 நாணயங்களைப் போன்று தான் தங்க நாணயங்கள் காட்சியளிக்கும். பெரிய வித்தியாசம் என்னவென்றால், இவை தூய தங்கத்தால் ஆனவை.

தங்க நாணயங்கள் 0.5 கிராம் முதல் 100 கிராம் வரை பல்வேறு அளவுகளிலும், 22 அல்லது 24 காரட் என வெவ்வேறு தூய்மை நிலைகளிலும் கிடைக்கின்றன.

இதுதான் அவற்றை மலிவானதாக ஆக்குகிறது. மேலும், அவற்றை பணமாக மாற்றுவதும் எளிது. உங்கள் பணப்புழக்கத் தேவைகளைப் பூர்த்தி செய்ய சில நாணயங்களை விற்றால் போதும்.

"தங்க நாணயங்களுக்கு நிச்சயமாக அதிக தேவை இருப்பதை காண முடிகிறது. குறிப்பாக தங்க விலைகள் உயர்ந்து வருவதால், வாடிக்கையாளர்கள் அவற்றை ஒரு சிறந்த, குறைந்த ஆபத்துள்ள முதலீடாகப் பார்க்கிறார்கள். தேவைப்படும்போது அவற்றை எளிதாக விற்கவும் முடியும். பல்வேறு எடைகளில் கிடைப்பதால், சிறிய முதலீட்டாளர்களும் அவற்றை வாங்கலாம் என்பது சிறப்பு" என பிபி ஜுவல்லர்ஸ் பை பவன் குப்தா (PP Jewellers by Pawan Gupta) நிறுவனத்தின் இயக்குனர் பியூஷ் குப்தா தெரிவித்துள்ளார்.

அப்படியானால் எங்கு வாங்குவது?

"புகழ்பெற்ற கடைகளில் இருந்து வாங்கப்படும் தங்க நாணயங்கள், விற்பனை செய்வதை எளிதாக்கும். மேலும் சிறந்த மறுவிற்பனை மதிப்பையும் பெற்றுத்தரும்" என்கிறார் வென்ச்சுரா (Ventura) நிறுவனத்தின் கமாடிட்டி டெஸ்க் மற்றும் சி.ஆர்.எம் தலைவர் என்.எஸ். ராமசாமி.

தங்க நாணயங்கள் வாங்குவது ஒரு சிக்கலான காரியமாக இருக்கலாம். ஒவ்வொரு அளவு மற்றும் அதற்கான தூய்மைக்கும் வெவ்வேறு  விலைகள் உள்ளன. ஒரு சிக்கலான வடிவமைப்பு கொண்ட நாணயம், அதன் அளவு மற்றும் தூய்மை ஒரே மாதிரியாக இருந்தாலும் விலை அதிகமாக இருக்கலாம். இதில் கவனமாக இருங்கள்.

"24 காரட் தூய்மையை (999 அல்லது 999.9 ஃபைனஸ்) பாருங்கள், விரிவான இன்வாய்ஸ் கேளுங்கள், மற்றும் நம்பகத்தன்மை சான்றிதழ் பெறுவதை உறுதிப்படுத்திக் கொள்ளுங்கள். மேலும், ஜி.எஸ்.டி மற்றும் பிற பொருந்தக்கூடிய கட்டணங்களைப் புரிந்து கொள்ளுங்கள். புத்திசாலித்தனமான முதலீட்டிற்கு, விற்பனையாளரின் திரும்ப வாங்கும் கொள்கையை (buy-back policy) எப்போதும் சரிபார்க்கவும் - ஏனெனில் பணப்புழக்கம் முக்கியம்" என்று ஆஸ்பெக்ட் குளோபல் வென்ச்சர்ஸ் (Aspect Global Ventures) நிர்வாகத் தலைவரான அக்ஷா கம்போஜ் கூறியுள்ளார்.

தங்க விலைகள்

தங்கம் தற்போது 3,360 டாலரில் வர்த்தகமாகிறது. இது ஏப்ரல் 22 அன்று பதிவான 3,500 டாலர் என்ற உச்ச விலையை விட சற்று குறைவாகும். தங்க விலை மேலும் உயருமா என்று யாரும் உறுதியாகச் சொல்ல முடியாது. ஆனால் சுங்க வரிகள் முதல் அமெரிக்க கடன் நெருக்கடி மோசமடைவது வரையிலான தற்போதைய நிச்சயமற்ற சூழ்நிலை தங்க விலைகளுக்கு ஒரு ஊக்கத்தை அளிக்கலாம்.

இந்தியாவில் இன்றைய 24 காரட் தங்க விலை ரூ 95,950 ஆகும். உங்கள் நிதி திட்டத்தில் பொருந்தினால், காலப்போக்கில் தங்கத்தை சேர்த்துக்கொண்டே வரலாம். தங்க நாணயங்களை வாங்குவது ஒரு எளிய, சுலபமான மற்றும் மலிவான அணுகுமுறையாகும். சேமிப்பு சிரமங்கள் குறைவு மற்றும் அவசர காலங்களில் போதுமான பணப்புழக்கத்துடன் வருகிறது.

மிகச் சிறந்த பகுதி என்னவென்றால், அவை பணத்திற்கு சமமான ஒரு சொத்தாக உங்கள் வசம் உள்ளது. "தங்கம் என்பது பணம். மற்ற அனைத்தும் கடன்" என்று ஜே.பி. மார்கன் 1912 இல் கூறியது நினைவுகூரத்தக்கது.