ரூ.600 கோடி முதலீடு: பூங்காக்கள், ரிசார்ட்களுடன் சென்னையை கலக்க வரும் வொண்டர்லா

வெயிலுக்கும் மழைக்கும் இடையிலான ஊஞ்சல் ஆட்டம் போல, இந்த காலாண்டில் வொண்டர்லா ஹாலிடேஸ் நிறுவனம் சற்று விசித்திரமான முடிவுகளைச் சந்தித்திருக்கிறது. இந்தியாவின் மிகப்பெரிய பொழுதுபோக்கு பூங்காக்களில் ஒன்றான வொண்டர்லா, முதல் காலாண்டு முடிவுகளில், ஒருபுறம் சரிவையும், மறுபுறம் அபார வளர்ச்சியையும் ஒரே நேரத்தில் காட்டியுள்ளது.

மழைக்கு பயந்து பூங்காவுக்கு வரத் தயங்கிய மக்கள்...

இந்த ஆண்டு வழக்கத்திற்கு மாறாக, தென்மேற்கு பருவமழை முன்கூட்டியே தொடங்கியதால், வொண்டர்லா பூங்காக்களுக்கு வருகை தந்தவர்களின் எண்ணிக்கை 8% சரிந்தது. கடந்த ஆண்டின் இதே காலகட்டத்துடன் ஒப்பிடுகையில், இந்த முறை 9.17 லட்சம் பேர் மட்டுமே பூங்காவுக்கு வந்திருக்கின்றனர். இது, விடுமுறை நாட்களில் குடும்பத்துடன் வெளியே செல்ல விரும்பும் மக்களின் திட்டங்களை வெகுவாகப் பாதித்திருக்கிறது.

வருகை குறைந்தது வருத்தமான செய்தி என்றாலும், வந்தவர்கள் மனதார செலவு செய்திருக்கிறார்கள். ஒரு வாடிக்கையாளரின் சராசரி செலவு (ARPU) 6% அதிகரித்து ரூ.1,775 ஆக உயர்ந்துள்ளது. இதுவே வொண்டர்லாவின் வெற்றி ரகசியம்.

டிக்கெட் அல்லாத வருமானம் – அதாவது, பூங்காவிற்குள் உணவு, குடிநீர், நினைவுப் பொருட்கள், மற்றும் ரிசார்ட் ஆகியவற்றில் வாடிக்கையாளர்கள் செலவு செய்த தொகை 11% உயர்ந்து, ஒரு நபருக்கு ரூ.493 ஆக அதிகரித்துள்ளது. இந்த அதிரடிச் செலவு, ஒட்டுமொத்த வருவாயில் ஏற்பட்ட சரிவை பெருமளவு ஈடுகட்டியது. இதன் காரணமாக, மொத்த வருவாய் வெறும் 3% மட்டுமே குறைந்து ரூ.169 கோடியாக உள்ளது. நிகர லாபம் ரூ.52.6 கோடியாக இருந்தபோதிலும், அதன் லாப விகிதம் ஆரோக்கியமான 29% ஆக நிலைநிறுத்தப்பட்டுள்ளது.

வண்டர்லாவின் புதிய வியூகம்

வொண்டர்லா இப்போது வெறும் சவாரி மற்றும் ஸ்லைடுகள் கொண்ட பூங்காவாக மட்டும் இல்லாமல், ஒரு முழுமையான பொழுதுபோக்கு பிராண்டாக மாற முயன்று வருகிறது. இதன் ஒரு பகுதியாக, பெங்களூரில் புதிதாக தொடங்கப்பட்ட ‘தி ஐல்’ (The Isle) என்ற சொகுசு ரிசார்ட், ஏற்கனவே 70% பேர் தங்கியுள்ளனர். மேலும், பழைய ரிசார்டை விட இரண்டு மடங்கு கட்டணத்தை வசூலித்தாலும், வாடிக்கையாளர்கள் மத்தியில் அதற்கு நல்ல வரவேற்பு கிடைத்துள்ளது.

இது ஒருபுறம் இருக்க, சென்னையிலும் ஒரு பிரம்மாண்டமான புதிய பூங்காவை அமைப்பதற்கு ரூ.600 கோடி முதலீடு செய்துள்ளது. இந்த பூங்கா 2025-ஆம் ஆண்டின் இறுதியில் திறக்கப்படும் என எதிர்பார்க்கப்படுகிறது. இது வெற்றிகரமாகச் செயல்பட்டால், வொண்டர்லாவின் வளர்ச்சிக்கு ஒரு புதிய பாதையை அமைத்து, ஐந்து நகரங்களில் தனது இருப்பை நிலைநிறுத்தும்.

பூங்கா வாரியான செயல்பாடுகள்

பெங்களூரு: வொண்டர்லாவின் முதன்மை பூங்காவான இங்கு பார்வையாளர்களின் எண்ணிக்கை 10% சரிந்தாலும், ஒரு பார்வையாளரிடமிருந்து கிடைக்கும் வருமானம் (ARPU) ரூ. 1,893 ஆக உயர்ந்துள்ளது. இது, குறைந்த மக்கள் வந்தாலும், அவர்களிடமிருந்து அதிக வருவாயை ஈட்ட பெங்களூரு பூங்காவால் முடிந்துள்ளது என்பதைக் காட்டுகிறது. இங்கு ரூ. 20 கோடி மதிப்பில் ஒரு புதிய ரோலர் கோஸ்டர் அமைக்கப்பட உள்ளது.

கொச்சி: வொண்டர்லாவின் முதல் பூங்காவான இங்கு பார்வையாளர்கள் 14% குறைந்தனர். ஆனால் சராசரி வருமானம் 7% அதிகரித்து ரூ. 1,648 ஆக உயர்ந்தது. இப்பூங்கா பழைய நிலையில் இருந்தாலும், தொடர்ச்சியான லாபத்தை ஈட்டும் ஒரு உறுதியான ஆதாரமாகத் திகழ்கிறது.

ஹைதராபாத்: இங்கு பார்வையாளர்கள் 13% குறைந்தாலும், சராசரி வருமானம் 6% அதிகரித்து ரூ. 1,881 ஆக உயர்ந்துள்ளது. நகரின் வளர்ந்து வரும் நடுத்தர வர்க்கத்தினரை ஈர்க்கும் வகையில், எதிர்காலத்தில் இங்கு ஒரு தங்கும் விடுதியை அமைக்கவும் திட்டமிடப்பட்டுள்ளது.

புவனேஷ்வர்: 2024-ல் திறக்கப்பட்ட இந்தப் பூங்கா, ஒரு வருடத்திற்குள் EBITDA-வில் லாபம் ஈட்டியது. இது வொண்டர்லாவின் வணிக மாதிரி, புதிய பகுதிகளிலும் வெற்றிபெறும் என்பதை நிரூபித்துள்ளது. இங்கு வரும் மக்கள் தாராளமாக செலவு செய்கின்றனர்.

முதலீட்டாளர்களுக்கு ஒரு பார்வை

வொண்டர்லாவின் வணிகம் அதன் முதலீட்டுக்கு அதிக மூலதனம் தேவைப்படும் ஒன்று. பருவமழை, நுகர்வோர் மனநிலை, மற்றும் அரசின் கட்டுப்பாடுகள் போன்ற வெளிப்புற காரணிகள் இதன் செயல்பாட்டை பாதிக்கலாம்.

இருப்பினும், இந்தியாவில் பொழுதுபோக்கு சந்தை இன்னும் ஆரம்ப நிலையில்தான் உள்ளது. இளம் மக்கள் தொகை, அதிகரித்து வரும் வருமானம் மற்றும் அனுபவத்திற்காக செலவு செய்யும் ஆர்வம் ஆகியவை வளர்ச்சிக்கு சாதகமான காரணிகள்.

சென்னை பூங்கா வெற்றிகரமாக செயல்பட்டால், வொண்டர்லாவின் வளர்ச்சிப் பாதை மேலும் வலுப்பெறும். அதன் கடன் இல்லாத இருப்புநிலைக் குறிப்பும், ஆடம்பர விடுதி போன்ற புதிய முயற்சிகளும் முதலீட்டாளர்களுக்கு ஒரு நம்பிக்கையை அளிக்கின்றன.

இந்த காலாண்டு முடிவுகள், வொண்டர்லாவின் கதைக்கு இரு பக்கங்கள் உண்டு என்பதை நமக்குக் காட்டுகின்றன. மக்கள் வருகை குறைந்தாலும், வருவாய் உயர்ந்துள்ளது. லாபம் சற்றே குறைந்தாலும், அதன் எதிர்காலத் திட்டங்கள் வலுப்பெற்றுள்ளன.

வொண்டர்லாவின் பயணம் ஒரு சுவாரசியமான ரோலர் கோஸ்டர் சவாரி போலத் தான். இந்த நீண்ட பயணத்தில் உறுதியுடன் இருப்பவர்களுக்கு இது நல்ல பலனைத் தரும் என்றே எதிர்பார்க்கலாம்.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.