![ukraine mbbs students](https://img-cdn.thepublive.com/fit-in/1280x960/filters:format(webp)/indian-express-tamil/media/media_files/WDTgCUBOna2IqUSC9Fw1.jpg)
உக்ரைனில் இருந்து ஜார்ஜியாவுக்கு மாற்றப்பட்ட இந்திய மருத்துவ மாணவர்கள் சிலர். (எக்ஸ்பிரஸ் புகைப்படம் - அஞ்சு அக்னிஹோத்ரி சாபா)
Anju Agnihotri Chaba , Divya Goyal
பஞ்சாபைச் சேர்ந்த பால் கடை உரிமையாளரின் மகனும், சண்டிகர் காவல்துறை அதிகாரியின் மகளும் இதுவரை சந்தித்துக் கொண்டதில்லை. ஆயினும்கூட, அவர்கள் ஒரே சூழ்நிலைகளால் பிணைக்கப்பட்டுள்ளனர்: பிப்ரவரி 24, 2022 முதல் ரஷ்யாவுடனான போரின் காரணமாக உக்ரைனில் மருத்துவம் படிக்க வேண்டும் என்ற அவர்களின் கனவுகள் தடம் புரண்டன.
ஆங்கிலத்தில் படிக்க: 2022 Ukraine evacuees, new students flock to ‘safer’ countries for MBBS dreams
குர்தாஸ்பூர் மாவட்டத்தைச் சேர்ந்த 22 வயதான வாசு சைனி, மீதமுள்ள ஐந்து செமஸ்டர்களை முடிக்க, நவம்பர் 2023 இல் தான் படித்து வந்த உக்ரைன் பல்கலைக்கழகத்தில் இருந்து ஜார்ஜியாவில் உள்ள பல்கலைக்கழகம் ஒன்றிற்கு மாற்றப்பட்டுள்ள நிலையில், சண்டிகரை சேர்ந்த புதிய மாணவரான 19 வயது ஷகுன் ராணா, உக்ரைனுக்குப் பதிலாக செர்பியாவில் தனது எம்.பி.பி.எஸ் பட்டப்படிப்பை தொடர முடிவு செய்தார். .
புதிய பிடித்த இடங்கள்
இரண்டு ஆண்டுகளுக்குப் பிறகும் யுத்தம் முடிவடைவதற்கான அறிகுறிகளைக் காட்டாத நிலையில், வெளியேற்றப்பட்ட மருத்துவ மாணவர்களும் புதிய மாணவர்களும் மத்திய ஆசியாவில் உள்ள கிர்கிஸ்தான், தென்கிழக்கு ஐரோப்பாவில் செர்பியா மற்றும் டிரான்ஸ்கான்டினென்டல் ஜார்ஜியா போன்ற "பாதுகாப்பான" ஆனால் "குறைவான கட்டணம்" கொண்ட நாடுகளைத் தங்களின் கல்வியைத் தொடர தேர்வு செய்யத் தொடங்கியுள்ளனர். கல்விக் கட்டணம், விசா, விமான டிக்கெட், வீட்டு வாடகை மற்றும் உணவு போன்ற செலவுகள் இருந்தாலும், இந்த நாடுகளில் இருந்து எம்.பி.பி.எஸ் படிப்பது இந்தியாவில் உள்ள தனியார் கல்லூரியை விட மலிவானது என்று மாணவர்கள் கூறுகிறார்கள்.
![Indian students currently enrolled for an MBBS course at Kyrgyzstan’s International Medical University. Special Arrangement](https://img-cdn.thepublive.com/filters:format(webp)/indian-express-tamil/media/post_attachments/8e3ac085e2e420bce8980dc63f063811295cb5be5560e1b35dea79908a83e0f9.jpeg)
தற்போது கிர்கிஸ்தானின் சர்வதேச மருத்துவப் பல்கலைக்கழகத்தில் எம்.பி.பி.எஸ் படிப்பில் சேர்ந்துள்ள இந்திய மாணவர்கள். (சிறப்பு ஏற்பாடு)
2019 ஆம் ஆண்டு உக்ரைனுக்குச் சென்ற வாசு சைனி, பிப்ரவரி 26, 2022 மற்றும் மார்ச் 11, 2022 க்கு இடையில் இந்திய அரசாங்கத்தின் ஆபரேஷன் கங்காவின் கீழ் 18,000 மருத்துவ மாணவர்கள் உட்பட கிட்டத்தட்ட 20,000 இந்தியர்களுடன் வெளியேற்றப்பட்டார்.
“வெளியேறிய பிறகு ஒரு வருடம் வீட்டில் (தினா நகர்) இருந்தேன். எனது பட்டப்படிப்பை முடிக்க உக்ரைனுக்குத் திரும்ப முயற்சித்தேன், ஆனால் பயனில்லை. அதனால் உக்ரைனுடன் ஒப்பிடும்போது அங்கு கல்விச் செலவு அதிகமாக இருந்தாலும், ஜார்ஜியாவிலுள்ள டிபிலிசியில் உள்ள ஆல்டே பல்கலைக்கழகத்தை எனது பட்டப்படிப்பை முடிக்க தேர்வு செய்தேன்,” என்று வாசு சைனி கூறினார்.
போர் தொடங்கியபோது நீட் எனப்படும் தேசிய தகுதி மற்றும் நுழைவுத் தேர்வில் (NEET) தேர்ச்சி பெற்ற ஷகுன் ராணா, "ரஷ்யா-உக்ரைன் போர் தொடங்கிய பிறகு மருத்துவம் படிக்க உக்ரைனுக்குச் செல்லும் முடிவை மாற்றிக் கொண்டேன்" என்று கூறினார்.
இப்போது செர்பியாவின் க்ராகுஜெவாக் பல்கலைக்கழகத்தில் முதலாம் ஆண்டு மருத்துவ மாணவியான ஷகுன் ராணா, தனது முதல் வருடத்திற்கான கட்டணமாக 5,000 யூரோக்கள் (சுமார் ரூ. 5 லட்சம்) செலுத்தியதாக கூறுகிறார். “எம்.பி.பி.எஸ் பட்டப்படிப்புக்கு (தனியார் கல்லூரியில் 5.5 ஆண்டுகளுக்கு) இந்தியாவில் சுமார் ரூ. 1 கோடி செலவாகும். ஜார்ஜியா மற்றும் போலந்துடன் ஒப்பிடும்போது செர்பியா ஒப்பீட்டளவில் மலிவானது. இங்கு சைவ உணவைக் கண்டுபிடிப்பது கடினம், ஆனால் இது அமைதியான நாடு என்பதில் என் பெற்றோர் மகிழ்ச்சியடைகிறார்கள்,” என்று ஷகுன் ராணா கூறுகிறார்.
![Indian students currently enrolled for an MBBS course at the University of Kragujevac in Serbia. Special Arrangement](https://img-cdn.thepublive.com/filters:format(webp)/indian-express-tamil/media/post_attachments/adf8fdc65d8d3e547b654ebe00f5d0b3ff01409e32837af77b8ce7468938877a.jpg)
தற்போது செர்பியாவில் உள்ள கிராகுஜெவாக் பல்கலைக்கழகத்தில் எம்.பி.பி.எஸ் படிப்பில் சேர்ந்துள்ள இந்திய மாணவர்கள். (சிறப்பு ஏற்பாடு)
2022 இல் உக்ரைனில் இருந்து வெளியேற்றப்பட்டபோது 18,000 மருத்துவ மாணவர்களில் கிட்டத்தட்ட 4,000 பேர் இறுதி செமஸ்டர்களில் இருந்தனர். ஒரு முறை விதிவிலக்காக, கட்டாய வெளிநாட்டு மருத்துவ பட்டதாரி தேர்வில் தேர்ச்சி பெற்றிருந்தால், அவர்களை இந்தியாவிலே பயிற்சியை முடிக்க இந்தியா அனுமதித்தது. முதல் மற்றும் இரண்டாவது செமஸ்டர்களில் உள்ளவர்கள் நீட் தேர்வை மீண்டும் எழுதினர் அல்லது மாற்று படிப்புப் பாதைகளைத் தேர்ந்தெடுத்தனர். கடைசி இரண்டு செமஸ்டர்களில் படித்து வந்த சிலர் உக்ரைனிலிருந்தே தங்கள் படிப்புகளை முடிக்க முடிந்தது என்றாலும், நவம்பர் 2023 இல் இந்தியா அவர்களுக்கு இடமாற்ற விதிமுறைகளை தளர்த்திய பிறகு, மூன்றாவது மற்றும் நான்காவது ஆண்டுகளில் படித்து வந்தவர்கள் மற்ற நாடுகளுக்கு மாற்றப்பட்டனர். இப்போது புதிய மருத்துவ ஆர்வலர்கள் கூட தங்கள் பட்டப்படிப்பைத் தொடர "பாதுகாப்பான" நாடுகளைத் தேர்வு செய்கிறார்கள்.
எக்செல் எஜுகேஷன் சர்வீசஸ் மற்றும் மொஹாலியில் உள்ள கல்வி ஆலோசனை நிறுவனமான சன் எஜுகேஷன் உரிமையாளர் அம்ரீக் சிங் தில்லான் கூறுகையில், “வெளியேற்றப்பட்ட மாணவர்களில் கிட்டத்தட்ட 70% பேர் மற்ற நாடுகளுக்கு மாற்றப்பட்டனர். குறைந்தது 300-350 மாணவர்கள் (இரண்டு இடமாற்றங்கள் மற்றும் புதிய சேர்க்கைகள்) செர்பியாவில் உள்ளனர், கிர்கிஸ்தானில் சுமார் 1,500-2,000 பேர் மற்றும் ஜோர்ஜியாவில் கிட்டத்தட்ட 1,000 பேர் உள்ளனர்,” என்றார்.
![Some of the Indian medical students who transferred to Georgia from Ukraine.](https://img-cdn.thepublive.com/filters:format(webp)/indian-express-tamil/media/post_attachments/8a38493a57b32c1548ed99e3fefa1e03e66beaf87058d85faed328de9ae2bf37.jpg)
உக்ரைனில் இருந்து ஜார்ஜியாவுக்கு மாற்றப்பட்ட இந்திய மருத்துவ மாணவர்கள் சிலர்.
இந்த நாடுகளுக்கு, இந்திய மாணவர்களின் வருகை, நடந்துகொண்டிருக்கும் போரின் எதிர்பாராத விளைவு. செர்பியாவின் க்ராகுஜேவாக் பல்கலைக்கழகத்தின் மருத்துவ அறிவியல் பீடத்தின் டீன் பேராசிரியர் விளாடிமிர் ஜாகோவ்ல்ஜெவிக் தி இந்தியன் எக்ஸ்பிரஸிடம், “போருக்கு முன்பு நாங்கள் ஆங்கிலத்தில் பாடங்களை நடத்தவில்லை. இந்த ஆண்டு முதல் முறையாக 146 இந்திய மாணவர்களை சேர்த்துள்ளோம்” என்று கூறினார்.
இந்த புதிய இடங்கள் தங்கள் பிள்ளைகள் உக்ரைனில் படிக்கப் போகிறார்கள் என்ற எண்ணத்தில் பெற்றோர்கள் உணர்ந்த கவலையைப் போக்க உதவியது என்று, செர்பியாவின் நிஸ் பல்கலைக்கழகத்தின் ஐந்தாம் ஆண்டு மாணவர் பெங்களூரைச் சேர்ந்த அதுல் சர்மா மற்றும் கிர்கிஸ்தானின் சர்வதேச மருத்துவ பல்கலைக்கழகத்தின் (IMU) ஐந்தாம் ஆண்டு மாணவர் பீகாரைச் சேர்ந்த ரவிக்குமார் ஆகியோர் கூறுகின்றனர்.
“போர் இருந்தபோதிலும் எனது படிப்பை முடிக்க நான் உக்ரைனுக்கு திரும்பினேன், ஆனால் எனது பெற்றோருக்கு கவலைகள் அதிகரிக்கத் தொடங்கியது. அவர்களின் மன ஆரோக்கியத்திற்காக, நான் IMU க்கு மாற்றப்பட்டேன்,” என்று ரவிக்குமார் கூறுகிறார்.
![Indian students currently enrolled for an MBBS course at Serbia’s Nis University. Special Arrangement](https://img-cdn.thepublive.com/filters:format(webp)/indian-express-tamil/media/post_attachments/ee44175fa01a3b2efcd806f481c85c6c46960c8111568bb8203fe981ae8801da.jpeg)
தற்போது செர்பியாவின் நிஸ் பல்கலைக்கழகத்தில் எம்.பி.பி.எஸ் படிப்பில் சேர்ந்துள்ள இந்திய மாணவர்கள். (சிறப்பு ஏற்பாடு)
இருப்பினும், உக்ரைனுடன் ஒப்பிடும்போது, இந்த நாடுகளில் கல்விச் செலவு சற்று அதிகம் என்று ஆர்வலர்கள் கூறுகின்றனர், அங்கு அவர்கள் ஆறு வருட படிப்புக்கு ஆண்டுக்கு $4,000-6,000 (கிட்டத்தட்ட ரூ. 3-5 லட்சம்) செலுத்தினர். போலந்து மற்றும் ஜார்ஜியாவை விட செர்பியாவில் பட்டம் பெறுவது மலிவானது. செர்பியாவில் ஆண்டுக் கல்விக் கட்டணம் கிட்டத்தட்ட € 5,000-7,000 (சுமார் ரூ. 5-6 லட்சம்) என்று மாணவர்கள் கூறுகின்றனர்.
கிர்கிஸ்தானில் தால் மக்னி
கிர்கிஸ்தான் மற்றொரு பிடித்தமான நாடு, ஏனெனில் இங்கு ஆண்டு கட்டணம் செர்பியாவை விட குறைவாக உள்ளது, அதாவது சுமார் $2,500-4,500 (கிட்டத்தட்ட ரூ. 3-4 லட்சம்). கிர்கிஸ்தானில் குறுகிய படிப்பு (ஐந்து ஆண்டுகள்), எளிதான விசா செயல்முறை மற்றும் தளர்வான சேர்க்கை அளவுகோல் உள்ளிட்ட பிற "நன்மைகளும்" உள்ளன.
உதாரணமாக, IMU கிர்கிஸ்தானுக்கு 12 ஆம் வகுப்பில் (அறிவியல் மற்றும் ஆங்கிலத்துடன்) 50% மதிப்பெண் மற்றும் NEET தகுதி மதிப்பெண் தேவை. கிர்கிஸ்தானின் எம்.பி.பி.எஸ் படிப்பு இந்திய மருத்துவ கவுன்சிலால் (MCI) அங்கீகரிக்கப்பட்டுள்ளது என்று ஐ.எம்.யு.,வின் சர்வதேச துறையின் தலைவர் ஜுமாலிவ் பார்ஸ்பெக் கூறுகிறார்.
![ukraine](https://img-cdn.thepublive.com/filters:format(webp)/indian-express-tamil/media/post_attachments/17757b513b5beab182bf0d2a0dc0e3a223719328041bd8a823421e35eaf2fb17.jpg?resize=600,338)
இந்திய மருத்துவ மாணவர்கள் தங்கள் மருத்துவப் பட்டப்படிப்பைத் தொடர உக்ரைன் செல்ல விரும்பினர், ஆனால் ரஷ்யா-உக்ரைன் போரின் காரணமாக ஜார்ஜியாவுக்குச் சென்றனர். (எக்ஸ்பிரஸ் புகைப்படம் - அஞ்சு அக்னிஹோத்ரி சாபா)
"2020 மற்றும் 2021 ஆம் ஆண்டுகளில் IMU இல் இந்திய மாணவர்கள் இல்லை. 2022 இல் 18 புதிய மாணவர்கள் மற்றும் 302 இடமாற்றங்களுடன் முதல் சேர்க்கை நடந்தது. 2023-24 அமர்வுக்கு 333 இந்திய மாணவர்களை அனுமதித்துள்ளோம். பெரும்பாலான இடமாற்றங்கள், குறிப்பாக உக்ரைனில் இருந்து வந்தவை, ஆனால் 54 புதிய சேர்க்கைகளும் உண்டு. இந்திய மாணவர்களின் திடீர் எழுச்சியைக் கருத்தில் கொண்டு, நாங்கள் அவர்களுக்காக ஒரு புதிய விடுதியைத் திறந்துள்ளோம், மேலும் எங்கள் மெஸ் இப்போது ராஜ்மா சாதம், கறி சாதம், பருப்பு மக்னி, ரொட்டி போன்ற இந்திய உணவுகளை வழங்குகிறது,” என்று பார்ஸ்பெக் தி இந்தியன் எக்ஸ்பிரஸிடம் கூறினார்.
மாணவர்கள் ஜார்ஜியாவைத் தேர்வு செய்கிறார்கள், ஆனால் இங்கு கட்டணம் அதிகம். ஜோர்ஜியாவின் பிசினஸ் சேம்பர், ஜார்ஜியாவின் தலைவரான தர்பன் பராஷர் கூறுகையில், ”2021 ஆம் ஆண்டில் ஜார்ஜியாவின் மருத்துவப் பல்கலைக்கழகங்களில் சுமார் 8,000 இந்திய மாணவர்கள் மட்டுமே இருந்தனர். புதுதில்லியில் உள்ள ஜார்ஜியா தூதரகம், தற்போது அங்குள்ள 21 பல்கலைக்கழகங்களில் 20,000க்கும் மேற்பட்ட இந்திய மாணவர்கள் மருத்துவப் படிப்புகளில் சேர்ந்துள்ளனர்,” என்றார்.
ஜார்ஜியாவின் திபிலிசியில் உள்ள ஆல்டே பல்கலைக்கழகத்தின் சர்வதேச மாணவர்கள் ஆட்சேர்ப்பு மேலாளர் மரியம் கோராவா கூறுகிறார், “சுமார் இரண்டு டஜன் இந்திய மாணவர்கள் உக்ரைனில் இருந்து பரிமாற்ற திட்டத்தின் கீழ் சேர்ந்துள்ளனர். மேலும் சேர்க்கை எதிர்பார்க்கப்படுகிறது.”
ஜார்ஜியாவுக்கு மாற்றப்பட்ட வாசு சைனி கூறுகிறார், “ஜார்ஜியாவில் கல்வித் தரம் கடுமையானது மற்றும் வாழ்க்கைச் செலவுகள் அதிகம். உக்ரைனில், ஆறு வருட படிப்புக்கு எனது மொத்த செலவு, வாழ்க்கை மற்றும் கல்வி கட்டணம் உட்பட ரூ.30 லட்சம் வந்திருக்கும். ஜார்ஜியாவில், மீதமுள்ள ஐந்து செமஸ்டர்களுக்கும் நான் அதே அளவை செலுத்த வேண்டும்.”
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
Stay updated with the latest news headlines and all the latest Lifestyle news. Download Indian Express Tamil App - Android or iOS.