சி.பி.எஸ்.இ. 'கூடுதல் பாடம்' தேர்வு ரத்து: ஒரே நாளில் 2,700 மாணவர்களின் எதிர்காலம் கேள்விக்குறி?

சிபிஎஸ்இ வாரியம், தனித் தேர்வர்களுக்கான ‘கூடுதல் பாடம்’ (additional subject) தேர்வு வாய்ப்பை 2026 ஆம் ஆண்டு முதல் ரத்து செய்துள்ளது. இந்த முடிவு மாணவர்கள் மத்தியில் கடும் அதிருப்தியை ஏற்படுத்தியுள்ளது.

பின்னணி:

சிபிஎஸ்இ 12ஆம் வகுப்பு தேர்வில் தேர்ச்சி பெற்ற மாணவர்கள், அவர்களுக்குத் தேவைப்படும் ஒரு பாடத்தை, அடுத்த இரண்டு ஆண்டுகளுக்குள் மீண்டும் தனித் தேர்வராக எழுதிக் கொள்ளும் வாய்ப்பு இதுவரை இருந்து வந்தது. உதாரணமாக, இயற்பியல், வேதியியல், உயிரியல் படித்த மாணவர்கள், JEE போன்ற பொறியியல் நுழைவுத் தேர்வுகளை எழுத கணிதம் ஒரு கூடுதல் தகுதியாகத் தேவைப்பட்டால், அதனைத் தேர்வு செய்து எழுத முடியும். இதனால் மாணவர்கள் தங்கள் எதிர்கால படிப்புகளுக்கு தேவையான தகுதிகளை எளிதாகப் பெற முடிந்தது. 

புதிய விதிமுறைகள்:

2026ஆம் ஆண்டு முதல், இந்த வாய்ப்பு 10 மற்றும் 12ஆம் வகுப்பு தனித் தேர்வர்களுக்கு ரத்து செய்யப்பட்டுள்ளது. சிபிஎஸ்இ வாரியத்தின் மூத்த அதிகாரி ஒருவர், “தனித் தேர்வர்களுக்கு உள் மதிப்பீடு மதிப்பெண்கள் (internal assessment marks) வழங்க முடியாது என்பதால் இந்த முடிவு எடுக்கப்பட்டுள்ளது. வாரியம் வெறும் தேர்வுகளை நடத்துவதில் மட்டும் கவனம் செலுத்தாமல், முழுமையான பள்ளிப் படிப்பை ஊக்குவிக்கிறது” எனத் தெரிவித்துள்ளார்.

புள்ளிவிவரங்கள்:

வாரியத்தின் தரவுகளின்படி, கடந்த சில ஆண்டுகளாக இந்த வாய்ப்பைப் பயன்படுத்திய மாணவர்களின் எண்ணிக்கை அதிகரித்து வருகிறது.

2025ஆம் ஆண்டு:

12ஆம் வகுப்பு: 2,768 தனித் தேர்வர்கள் கூடுதல் பாடத்திற்குப் பதிவு செய்தனர். அவர்களில் 78% பேர் (2,161 பேர்) தேர்வில் பங்கேற்றனர்.

10ஆம் வகுப்பு: 375 பேர் பதிவு செய்து, 311 பேர் தேர்வு எழுதினர்.

2024ஆம் ஆண்டு:

12ஆம் வகுப்பு: 2,225 பேர் பதிவு செய்து, 74% பேர் (1,657 பேர்) தேர்வு எழுதினர்.

10ஆம் வகுப்பு: 330 பேர் பதிவு செய்து, 267 பேர் தேர்வு எழுதினர்.

ஏற்கனவே ஒரு வருடம் படிப்புக்கு ஒதுக்கி 2026ஆம் ஆண்டு தேர்வு எழுதத் தயாராகி வந்த மாணவர்கள், இந்த முடிவால் பெரும் பாதிப்படைந்துள்ளனர். “இந்த முடிவு மாணவர்களுக்கு இருந்த நெகிழ்வுத்தன்மையை (flexibility) நீக்குகிறது. இந்த அறிவிப்பு இன்னும் முன்னதாகவே வெளியிடப்பட்டிருக்க வேண்டும்” என மாணவர்கள் கோரிக்கை வைத்துள்ளனர்.

இந்த விவகாரத்தில் சிபிஎஸ்இ வாரியம் மீண்டும் பரிசீலிக்க வேண்டும் என மாணவர்கள் வலியுறுத்தி வருகின்றனர்.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.